Nouvel Rwayonm No. 36

Nouvo Milener—Ki Lavenir i Rezerve pour Ou?

Nouvo Milener—Nesans en Nouvo Lepok?

MINWI le 31 Desanm, 1999, 20 tyenm syek ti terminen.a I ti en syek ki ti annan bokou troub. Me ti osi annan nesans bann nouvo teknolozi, lavans medikal remarkab, en lanpler enpresyonan dan sistenm lenformasyon, e en lagrandisman rapid dan lekonomi global. Nouvo milener in alor ganny akeyir par bokou, koman en senbol lespwar ek sanzman. Eski petet nou ava vwar lafen lager, lapovrete, polisyon lanvironnman, ek maladi?

Bokou dimoun i annan lespwar. Me ki probabilite i annan, ki nouvo milener pou prodwir bann sanzman ki pou benefisye ou—sanzman ki pou fer lavi an sekirite e stab pour ou ek ou fanmiy? Annou konsider lanpler imans, detrwa problenm ki nou pe fer fas avek.

Polisyon

Bann pei endistriyalize pe “koz domaz pour lanvironnman lo en lesel global, polisyon ki pe propaze, ensi ki boulversman ekosistenm.” Si sa tandans aktyel i persiste, “lanvironnman natirel pou deplizanpli anba tansyon.”—“Global Environment Outlook—2000,” Progranm Lanvironnman Nasyon Ini.

Maladi

“Avan lannen 2020, bann maladi ki pa kontazye i ekspekte koz set dan sak dis ka lanmor dan bann rezyon ki pe devlope, konpare avek mwens ki lanmwatye konmela.”—“The Global Burden of Disease,” Lapres Liniversite Harvard, 1996.

Serten eksper i afirmen ki “avan lannen 2010, 66 milyon dimoun an mwens [pou vivan] dan 23 pei avek sa lepidemi pli sever [SIDA].”—“Confronting AIDS: Evidence From the Developing World,” en rapor Konmisyon Eropeen ek Labank Mondyal.

Lapovrete

“Preski 1.3 bilyon dimoun i viv lo mwens ki en dolar sak zour, e anviron 1 bilyon pa kapab satisfer zot demann pour bann konsonmasyon debaz.”—“Human Development Report 1999,” Progranm Devlopman Nasyon Ini.

Lager

“Vyolans dan [diferan pei] ti a kapab ariv en nivo san presedan. Prodwi par [divizyon] etnik, tribal, e relizye, . . . tel vyolans pou form . . . sa kalite konfli pli komen dan prosen vennsenk an . . . , e touy santenn milyon dimoun sak lannen.”—“New World Coming: American Security in the 21st Century,” U.S. Commission on National Security/21st Century.

Piblisite ek leksitasyon pour sa nouvo milener in alor maske larealite ki polisyon, maladi, lapovrete, ek lager pe menas nou plis ki zanmen oparavan. Kot rasin tou sa bann problenm se vorasite, mefyans, ek legois—bann tre ki pa kapab ganny eliminen senpleman par resers syantifik, teknolozi, oubyen politik.

Sa Milener Ki Pou Beni Limanite

En ansyen ekriven ti fer sa remark: “Pour zonm ki’n ganny tire dan later, son semen pa apartenir. I pa apartenir pour zonm ki pe marse, menm pour diriz son lepa.” (Zeremi 10:23) Zonm pa mank selman abilite me osi drwa pour diriz later. Nou Kreater, Zeova Dye, li tousel ki annan drwa ek savwar fer, pour rezourd problenm limanite.—Romen 11:33-36; Revelasyon 4:11.

Me kan? Koman? Levidans ki nou pros avek lafen “bann dernyen zour” i absoli. Silvouple, ouver ou Labib e lir 2 Timote 3:1-5. I dekrir dan en fason tre frapan, bann tre dan personnalite imen ki pou manifeste dan sa “letan difisil.” Matye 24:3-14 ek Lik 21:10, 11 i osi dekrir “bann dernyen zour.” Zot santre lo bann levennman reel ki’n arive depi 1914, tel ki lager mondyal, lepidemi, ek mankman manze.

Byento “bann dernyen zour” pou terminen. Danyel 2:44 i dir: “Bondye lesyel pou etablir en rwayonm ki pa pou zanmen ganny detrir. . . . I pou kraz e met en lafen avek tou sa bann rwayonm [lo later] e li menm i pou dir pour letan endefini.” Alor i’n ganny predir ki Bondye pou etablir en Rwayonm, oubyen en gouvernman, pour diriz later. Dapre Revelasyon 20:4, sa gouvernman pou diriz pour mil an—en milener! Annou egzamin serten fason dan ki kondisyon lavi pou amelyore pour tou imen pandan sa Milener glorye:

Lekonomi. “Wi, zot pou konstri bann lakaz e zot pou reste ladan; wi, zot pou plant bann pye rezen e zot pou manz son fri. Zot pa pou konstri pour en lot reste, e zot pa pou plante pour en lot manze.”—Izai 65:21, 22.

Lasante. “Sa letan lizye bann aveg pou ganny ouver, e zorey bann sourd pou ganny debouse. Sa letan sa enn ki bwate pou grenpe parey en serf, e lalang sa enn ki koz-pa pou pous bann kri lazwa.” “E okenn zabitan pa pou dir: ‘Mon malad.’”—Izai 33:24; 35:5, 6.

Lanvironnman. Bondye pou “detri bann ki pe detri later.”—Revelasyon 11:18.

Relasyon Imen. “Zot pa pou fer okenn dimal oubyen koz okenn ravaz dan mon montanny sen; akoz later pou sertennman ranpli avek lakonnesans Zeova.”—Izai 11:9.

Plizyer milyon dimoun i annan lafwa dan sa bann promes biblik e alor zot in ganny en pwenn-vi optimis e pozitif lo lavenir. An konsekans, zot pli kapab fer fas avek bann presyon ek problenm lavi. Ki mannyer Labib i kapab vin en lafors ki gid ou dan ou lavi?

Konnesans Ki Anmenn ver Lavi!

Lasyans ek teknolozi i kapab parfwa enpresyonn nou bokou! Kantmenm sa, konnesans imen pa’n anmenn en lavi ere e an sekirite pour laplipar dimoun. Sel konnesans ki kapab realiz sa i ganny dekrir dan Labib, dan Zan 17:3, ki dir: “[Lavi eternel, New World Translation] savedir ki zot konn ou koman sel vre Bondye ek Zezi-Kri ki ou’n anvoye.”

En tel konnesans i trouve dan bann paz Labib. Menm si bokou i eksprim bann lopinyon definitif konsernan sa liv sakre, zis en pti gin dimoun ki’n deza egzamin li pour zot menm. E ou, eski ou’n deza fer li? I vre ki lir Labib i demann en gran zefor. Me i vo lapenn. Labib i sa sel liv ki “enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.”—2 Timote 3:16.

Alors, ki mannyer ou kapab konmans familyariz ou avek Labib? Akoz ou pa aksepte led avek bann Temwen Zeova? Zot pe donn lens­triksyon plizyer milyon dimoun kot zot prop lakaz, gratwitman. Pour asiste ou dan sa domenn, zot servi diferan piblikasyon baze lo Labib, tel ki sa brosir Sa ki Bondye i ekspekte nou fer. Sa brosir i donn larepons bref pour bokou kestyon ki ou kapab annan konsernan Labib, tel ki: Ki sennla Bondye? Ki lavolonte Bondye pour later? Kisisa Rwayonm Bondye? Ki mannyer Labib i kapab amelyor ou lavi fanmiy?

Si ou ti a kontan en Temwen Zeova vizit ou, silvouple ranpli sa form anba lo paz. Zot pou kontan pour donn ou plis lenformasyon konsernan Renny Milener Rwayonm Bondye!

□ Mon ti a kontan resevwar brosir Sa ki Bondye i ekspekte nou fer.

□ Silvouple kontakte mwan pour en letid Labib gratwit.

[Not anba lo paz]