Kiltiv Lentere ki’n Ganny Stimile par Nouvel Rwayonm No. 36
1 Eski ou’n fini distribye ou ta Nouvel Rwayonm No. 36? I demann en kestyon apropriye pour tou reflesir: “Nouvo Milener—Ki Lavenir i Rezerve pour Ou?” Anmezir ki lannen 2000 ti pe aprose, ekspektasyon ki sa nouvo milener pour anmennen ti varye. Nouvel Rwayonm No. 36 i konsider serten sa bann ekspektasyon e rapel nou ki bann kondisyon lemonn pa pe fourni en baz pour optimism. Sel milener ki pou anmenn lape ek sekirite ki mazorite dimoun pe rode, i Renny Milener Kris Zezi. Nou konfyans dan realite son Rwayonm in ensit nou pour distribye Nouvel Rwayonm No. 36 avek tou dimoun ki nou kapab.
2 Reaksyon anver Nouvel Rwayonm: Distribisyon Nouvel Rwayonm ki ti fer oparavan in prouve ki i en bon motivasyon pour nou dan nou travay. Konsernan Nouvel Rwayonm No. 35, biro Lasosyete an Kanada ti ekrir: “Sa kanpanny spesyal ti ganny siporte aktivman par bann proklanmater ek bann pionye dan minister, e zot ti rezwir bokou bann eksperyans ankourazan.” San dout ou’n demontre lantouzyasm dan distribisyon Nouvel Rwayonm No. 36.
3 Kanpanny pour sa Nouvel Rwayonm in ganny prevwar pour terminen le 17 Novanm, 2000. Eski tou teritwar ou kongregasyon in ganny kouver? Si non, bann ansyen i kapab demann ou pour kontinyen avek sa kanpanny ziska lafen Novanm.
4 Ki reaksyon in annan ziska prezan anver distribisyon Nouvel Rwayonm No. 36 dan ou teritwar? En pti gin dimoun pou ranpli sa koupon e rekomann en kopi brosir Ekspekte oubyen en letid Labib kot lakour. Toutfwa, i probab ki lamazorite ki’n konmans montre lentere dan sa size milener pa pou pran aksyon lo zot menm amwen ki en Temwen Zeova i retournen. Nou bezwen vizit tou bann ki’n demontre lentere. Kan ki i pou en bon letan pour fer sa? Nou bezwen fer retourn vizit oplivit posib.
5 Not sa bann leksperyans ki ti rezilta retourn vizit apre ki Nouvel Rwayonm No. 35 ti’n ganny plase. En pionye an Irlann ti les Nouvel Rwayonm No. 35 avek propriyeter en restoran. Sa madanm ti enpresyonnen avek sa mesaz e i ti envit sa ser pour retournen. Sa ser ti retournen dan de zour, e en letid Labib ti konmanse. An Dennmark, en kopi Nouvel Rwayonm No. 35 ti ganny lese kot en lakaz ki ti napa personn kot lakour. Sa menm zour, sa madanm ki ti reste dan sa lakaz ti anvoy sa koupon kot biro brans Lasosyete, ki ti apre ganny anvoye kot kongregasyon lokal. Avan ki sa semenn ti terminen, de ser ti vizit sa madanm, en letid ti ganny aranze, e sa madanm ti asiste son premye renyon kot Lasal Rwayonm!
6 Ki Ou pou Dir Kan Ou Retournen: Fer retourn vizit apre ki ou’n plas Nouvel Rwayonm i ase fasil e i en parti zwaye dan nou minister. Kan ou pe fer li, i apropriye pour anmenn avek ou en kopi Nouvel Rwayonm No. 36, i kapab ki sa dimoun napa son kopi. Ou kapab esey sa bann sizesyon.
7 Apre ki ou’n fer sa dimoun konnen lekel ou, ou kapab dir:
◼ “Mon ti kit en trak entitile ‘Nouvo Milener—Ki Lavenir i Rezerve pour Ou?’ Eski i pa ti ankourazan pour lir ki tre byento Renny Milener Kris Zezi pou konmanse, e i pou anmenn bann kondisyon en Paradi pour later? [Montre bann portre Paradi dan Nouvel Rwayonm No. 36.] Lo paz dernyen, ou’n ganny envite pour rekomann en kopi sa brosir Sa ki Bondye i Ekspekte Nou Fer.” Montre sa brosir, tourn lo leson 5, lir premye kestyon ek paragraf 1 ek 2, e demann sa dimoun pour fer komanter. Lir e diskit lo enn oubyen de teks. Si i posib, egzamin en lot kestyon ek paragraf, answit aranze pour retournen pour kontiny sa diskisyon.
8 Vi ki lof pour Novanm pou brosir “Ekspekte” oubyen liv “Konnesans” ou kapab dir:
◼ “Resaman kan mon ti vizit ou, mon ti les en kopi ‘Nouvo Milener—Ki Lavenir i Rezerve pour Ou?’ I kontyen en lof pour en letid Labib kot lakour. Mon’n retournen pour montre ou sa liv letid ki nou abitye servi. [Montre brosir Ekspekte, e tourn lo kouvertir deryer, oubyen montre liv Konnesans, e vir lo paz 188-9.] Sa Milener ki Labib i mansyonnen pou anmenn bann kondisyon zis parey ou vwar dan sa portre. Pour kalifye pour viv dan Paradi, nou bezwen pran konnesans egzakt lo Bondye. Silvouple, permet mwan demontre briyevman konman nou etidye Labib.”
9 Distribisyon Nouvel Rwayonm No. 36 in motiv nou pour entansifye nou par dan minister e sa in prodwir en gran temwannyaz. Probableman sa in stimil lentere bokou dimoun dan teritwar. Zefor nou tou pour kiltiv sa lentere, avek led Zeova, i prodwi dan nou lazwa pour trouv plis bann ki resanble mouton.—Mat. 10:11; Akt 13:48, 49, 52.