“Nouvo Milener—Ki Lavenir i Rezerve pour Ou?”
1 Sa kestyon in lo lespri bann dimoun partou lo later. Menm ki zonm in akonpli bokou diran bann syek, dimoun in dezapwente akoz bann problenm debaz ki’n afliz imen pandan plizyer milener i touzour egziste. (Zob 14:1; Ps. 90:10) Kote bann imen i kapab trouv soulazman?
2 Pandan mwan Oktob ek Novanm, nou pou annan en loportinite spesyal pour fourni nou prosen avek larepons sa kestyon. Konman? Par distribisyon Nouvel Rwayonm No. 36. I entitile “Nouvo Milener—Ki Lavenir i Rezerve pour Ou?” Pandan premye lanmwatye Oktob, nou pou ofer magazin La Tour de Garde ek Réveillez-vous! Apartir Lendi le 16 Oktob ziska Vandredi le 17 Novanm, nou pou angaz dan en distribisyon entansif Nouvel Rwayonm No. 36. Pandan sa kanpanny, nou pou konsantre pour plas Nouvel Rwayonm No. 36 dan bann zour lasemenn. Dan bann wikenn, nou pou prezant li ansanm avek bann magazin resan.
3 Eski Ou pou Annan en Partisipasyon Konplet? Bann ansyen, asistan ministeryel, ek pionye pou anvi pran linisyativ dan sa kanpanny, vi ki zot an avan dan sa travay. Plizyer proklanmater in aranz zot sirkonstans pour fer pionye asistan pandan enn oubyen tou le de mwan sa distribisyon. Lezot pe plàn pour pas plis letan ki labitid dan predikasyon.
4 Bann kondikter Letid Liv i kapab zwe en rol mazer pour ankouraz sak manm son group pour annan en partisipasyon konplet dan distribisyon Nouvel Rwayonm No. 36. Petet i annan serten proklanmater ki’n vin inaktif dan travay predikasyon. Bann ansyen i devret vizit zot pour vwar sa ki kapab ganny fer pour ed zot. Petet bann laranzman i kapab ganny fer pour en proklanmater eksperyanse akonpanny sak proklanmater inaktif dan predikasyon pandan sa bann mwan. Prezantasyon senp Nouvel Rwayonm No. 36 i kapab zis apropriye pour fer sa bann proklanmater revin aktif.
5 Sa pou osi en bon loportinite pour bann etidyan Labib ki pres pour konplet liv Konnesans e ki kalifye konman en proklanmater non batize pour konmans partisip dan predikasyon. Menm bann zenn i kapab annan en bon partisipasyon dan sa travay eksitan.
6 En senp prezantasyon, se tou ki nou bezwen. Ou kapab dir:
◼ “Mon’n volonter mon letan pour ede distribye sa mesaz tre enportan pour sak fanmiy isi [nonm sa landrwa]. Sa i ou kopi. Silvouple lir li.” I kapab en lavantaz pour pa anmenn en sak predikasyon kan nou pe distribye Nouvel Rwayonm No. 36.
7 Bann Renyon Byen Planifye pour Predikasyon: Bann ansyen i bezwen prevwar ki bann laranzman predikasyon i konvenyan e anmenmtan pratik. Spesyalman, sirveyan servis i devret fer sir ki sifizan teritwar port-an-port e komersyal i disponib pour ki tou i kapab partisip plennman dan sa travay. Kan i posib, bann renyon pour servis i devret ganny organize sak zour lasemenn, wikenn, e lo tar apremidi. Bann laranzman i kapab ganny fer pour zwenn dan tar apremidi pour benefisye bann etidyan lekol, bann ki travay aswar osi, ek lezot.
8 Konsernan Bann ki Pa Kot Lakour: Nou lobzektif se pour koz avek otan manm lakour ki posib. Si personn pa kot lakour kan ou pase, not ladres sa dimoun e repas en lot ler pandan lazournen. Si ziska dernyen semenn sa kanpanny ou pa reisi ganny kontak avek sa bann lokater, ou kapab kit en kopi Nouvel Rwayonm No. 36 dan en plas ki pa vizib pour bann pasan. Kan zot pe travay dan bann landrwa ki lwen e bann landrwa ki annan plis teritwar ki nou kapab kouver pandan sa kanpanny, bann ansyen pou demann kongregasyon pour kit en kopi Nouvel Rwayonm No. 36 pour bann lokater ki pa la kot lakour premye fwa ki zot pase.
9 Ale, Annou Travay! Bann kongregasyon i devret fer zot mye posib pour kouver zot teritwar avan kanpanny i fini le 17 Novanm. Si ou teritwar i ase gran, serten proklanmater i kapab travay tousel si sa i pratik e an sekirite. Sa laranzman pou fer li pli fasil pour zwenn pli bokou posib bann ki diny pour sa bon nouvel. Fer sir nou not byen tou bann lentere ki nou trouve.
10 Bann ansyen i devret prevwar bann magazin anplis ki kongregasyon pou bezwen e alor rekomann zot. I pa neseser pour rekomann Nouvel Rwayonm No. 36 vi ki en ekspedisyon pe ganny anvoye pour sak kongregasyon. Bann pionye spesyal, ordiner, ek asistan pou resevwar sakenn 250 kopi pour distribye, tandis ki bann proklanmater pou ganny 50 kopi sakenn. Alor, eski ou pare e antouzyasme pour travay dan sa aktivite spesyal? Konman nou privilezye pour fer tou nou prosen konn sa ki Bondye in promet dan lavenir pros!