Kanpanny spesyal pour ofer trak le 20 Oktob–16 Novanm!
1 Konmansman Lendi le 20 Oktob enkli sa kat semenn ki pou swiv, nou pou partisip dan en distribisyon spesyal sa nouvo trak ki annan pour tit Eski ou ti a kontan konn laverite? Nou swete ki sa kanpanny spesyal ki pou ganny fer dan lemonn antye pou motiv plis dimoun pour anvi konn plis lo sa sel sours laverite.—Zan 17:17.
2 Sa trak i donn larepons bref pour sis kestyon enportan: “Eski Bondye i vreman enterese avek nou?” “Eski lager ek soufrans pou fini en zour?” “Ki arive avek nou ler nou mor?” “Eski i annan lespwar pour bann ki’n mor?” “Ki mannyer mon devret priye pour Bondye ekout mwan?” e “Ki mannyer mon kapab trouv boner dan lavi?” Bann larelizyon Kretyen pa’n zanmen fourni larepons satisfezan pour sa bann kestyon. Menm bann ki pa Kretyen osi in demann zot lekor sa bann kestyon, me zot pa vreman konnen ki zot kapab trouv bann larepons kler dan Labib. Alor nou ekspekte ki sa mesaz i atir bokou dimoun.
3 Kouver ou teritwar: Fer tou ou mye posib pour kouver otan teritwar dan ou rezyon. Si ou annan en gran teritwar, bann ansyen i kapab ankouraz ou pour kit en kopi sa trak kot bann ki pa kot lakour lo premye vizit. Pa bliye pour donn enn sa nouvo trak ou vwazen, fanmir, bann dimoun ki ou konnen kot ou travay ouswa kot lekol e lezot dimoun ki ou koz avek souvan. Petet ou kapab aranz ou plan pour fer pionye asistan pandan mwan Oktob oubyen Novanm. Eski ou annan en zanfan ouswa etidyan ki pe fer progre spirityel ki kapab kalifye pour zwenn ansanm avek nou dan sa kanpanny konman en proklanmater non batize? Si wi, enform bann ansyen.
4 Ki pour dir: Pour kapab zwenn plis dimoun avek sa mesaz, i pou pli bon si ou fer en prezantasyon ki bref. Zis demann sa met lakour enn parmi sa sis kestyon ki lo kouvertir sa trak e apre sa montre li larepons lo sa trak. Sa pou permet ki tou bann proklanmater i adapte zot prezantasyon dapre bezwen zot teritwar. Si en dimoun i paret enterese, note e retournen plitar. Pandan wikenn, nou kapab ofer magazin pour sa mwan ansanm avek sa trak. Apre ki sa kanpanny i fini le 16 Novanm nou pou ofer liv Ki Labib i dir? Tou bann trak ki reste i devret ganny servi parey larestan trak ki disponib.
5 Konmans en letid Labib: Sa trak in espesyalman ganny fer pour ed nou konmans en letid Labib. Kan ou pe fer en retourn vizit kot en dimoun ki ti demontre lentere, ou kapab demann li lekel parmi sa bann laverite dan Labib ki’n rekonfort li e soulaz li. Montre li par deryer sa trak kot i koz lo laranzman pour fer letid Labib e donn li en kopi sa liv Ki Labib i dir? Si i posib egzamin enn oubyen de paragraf an bref dan en sapit ki annan plis lenformasyon lo sa size ki i swazir.
6 Zeova pe rod bann ki pou ador li “an-espri e an verite.” (Zan 4:23) Fotespere ki nou tou nou partisip dan sa kanpanny spesyal pour ed lezot dimoun pour konn laverite!