Nou annan en nouvo Zouti pour konmans Letid!
1 Sa madanm Ameriken ti en Katolik Romen devoue. I ti fidelman defann lansennyman legliz. I ti menm fer en pelerinaz kot Vatikan. Toutfwa, kan en Temwen Zeova ti vizit li, e ofer li en letid Labib kot lakour, sa madanm ti aksepte. Akoz? I ti anvi aprann sa ki Labib i dir e son legliz pa ti ofer en letid Labib kot lakour. Ki sa leksperyans i ansenny nou? Ki nou pa zanmen konnen lekel ki pou aksepte en letid Labib gratwit.—Ekle. 11:6.
2 Eski ou’n deza ezite pour dir avek bann dimoun ki nou pare pour etidye Labib avek nenport dimoun ki enterese? Eski tou dimoun dan ou kominote i konnen ki nou ofer sa servis gratwit? Konman ki nou kapab fer sir ki zot konnen? Par servi en nouvo zouti! I en trak atiran ki annan sis paz, e son tit i Eski ou ti a kontan konn plis lo Labib? Annou familyariz nou avek sa trak. Nou pou analiz li soutit par soutit.
3 “Akfer lir Labib?” Bann rezon ki sa trak i donnen i vreman enteresan. I eksplike ki Labib i kontyen “bann lenstriksyon ranpli avek lanmour sorti kot Bondye,” i montre konman pour apros li dan lapriyer pour ganny led e konman pour resevwar son kado lavi eternel. (1 Tesa. 2:13) Sa trak i refer avek diferan laverite ki trouve dan Labib, “ki fer keksoz vin pli kler” pour nou, tel konman ki i arive apre ki nou’n mor e akoz i annan sitan kantite problenm lo later. I dekrir “bann prensip ki Bondye in donnen dan Labib” ki ler zot ganny aplike zot anmenn bann byenfe fizik e promot boner, lespwar ek lezot kalite dezirab. Sa trak i koz lo en lot rezon pour lir Labib—bann profesi lo lavenir ki montre bann levennman ki zis devan nou.—Rev. 21:3, 4.
4 “Led pour konpran Labib”: Sa trak i deklare: “Nou tou nou bezwen led pour konpran Parol Bondye.” Apre i dekrir nou metod pour etidye Labib: “Ordinerman i pli bon etidye Labib pti gin par pti gin, an konmansan avek bann lansennyman debaz.” Sa trak i fer kler ki “se Labib ki nou lotorite,” anmenmtan i spesifikman mansyonn brosir Ekspekte konman en keksoz ki pou ed sa etidyan “pour konpran bann referans Biblik lo diferan size.” Sa soutit ki swiv i soulev en kestyon ki demann latansyon.
5 “Eski ou pare pour konsakre en Letan sak Semenn pour konpran Labib?” Sa trak i eksplike ki en letid Labib i kapab ganny aranze dan en moman ek en landrwa ki pli konvenab pour sa etidyan, swa an prive kot son lakour oubyen menm par telefonn. Lekel ki kapab partisip dan sa diskisyon? Sa trak i reponn: “Ou fanmiy antye. Nenport zanmi ki ou anvi envite i kapab osi partisipe. Oubyen si ou prefere, diskisyon i kapab deroule avek zis ou tousel.” Pour ki kantite letan en letid i bezwen dire? I eksplike: “Bokou dimoun i rezerv enn er-d-tan tou le semenn pour etidye Labib. Si ou kapab konsakre plis letan oubyen si ou annan mwens letan pour donnen sak semenn, bann Temwen pou fer zot disponib pour ed ou.” Sa i en pwen enportan. Nou pare pour adapte avek sirkonstans sak etidyan.
6 “En Lenvitasyon pour aprann”: En koupon in ganny fourni pour ki sa dimoun ki’n resevwar sa trak i kapab rekomann brosir Ekspekte oubyen en vizit pour eksplik nou progranm pour en letid Labib kot lakour. Kouvertir brosir Ekspekte in ganny montre an kouler. Eski ou kapab vwar akoz sa trak pou ankouraz plis dimoun ki annan leker senser pour aksepte nou led? Aprezan, konman nou kapab servi sa nouvo zouti pli byen posib?
7 Avek lekel ou kapab ofer sa Trak? Sa trak i kapab ganny donnen avek en dimoun personnelman oubyen ganny lese kot bann lakour ki napa personn. I kapab ganny distribye port-an-port, lo semen, e dan bann landrwa biznes. Ofer li avek dimoun ki swa zot aksepte nou piblikasyon oubyen zot refize. Met li dan bann magazin oubyen lezot piblikasyon ki ganny ofer. Kan ou pe ekri bann let, met li dan lanvlop ansanm avek let. Ofer pour anvoy li par lapos pour bann dimoun ki ou kontakte par telefonn. Toultan gard bann kopi avek ou pour distribye kan pe fer konmisyon dan laboutik, kan ou pe servi transpor piblik, e kan pe rann temwannyaz enformelman. Donn li avek tou dimoun ki vin kot ou. Ofer li avek ou bann fanmiy, vwazen, koleg travay, kanmarad lekol, ek lezot dimoun ki ou konnen. Esey ou mye pour donn sa trak avek tou dimoun ki ou rankontre! Apre sa, ki nou kapab fer?
8 Si bann Dimoun i reazir vitman: Serten endividi pou reazir vitman par dir ki zot ti a kontan annan en letid Labib. Alor, nenport ki moman ki ou dan predikasyon, fer sir ki ou toultan annan de kopi brosir Ekspekte—enn pour sa etidyan e enn pour ou. Si sa dimoun i pare, konmans sa letid imedyatman. Ouver sa brosir lo kouvertir par anndan, e lir “Koman servi sa brosir?” Apre sa, al direkteman lo leson 1, e demontre konman ki letid i deroule. Eski sa lapros pa i vreman fasil?
9 Si sa Dimoun i bezwen Letan pour reflesir lo la: Avan ki tro bokou letan i pase, esey kontakte sa dimoun ankor. Kan ou fer sa, fer sir ki ou annan brosir Ekspekte avek ou. Montre sa dimoun prezantasyon lo kouvertir anndan. Les li swazir size ki vreman enteres li. Vir kot sa leson i ete, e konmans diskit sa leson ki i’n swazir.
10 Revizit bann Dimoun: Si ou’n kit sa trak ansanm avek detrwa magazin, ou kapab retournen an servan sa lapros: “Dernyen fwa ki mon ti rankontre ou, mon ti tre kontan pour kit en kopi sa magazin Latour Veyer avek ou. Petet ou ti remarke ki son tit antye i Latour Veyer pe anons Rwayonm Bondye. Ozordi mon ti pou kontan eksplik ou kisisa sa Rwayonm e ki i sinifye pour ou ek ou fanmiy.” Apre sa, ouver brosir Ekspekte lo leson 6. Konmans avek premye paragraf, lir e diskit otan ki sa dimoun i annan letan disponib pour fer li. Apre fer laranzman pour retournen en lot zour e fini sa leson.
11 Annan sifizaman Trak: Sirveyan servis ek sa frer ki ansarz piblikasyon i devret toultan veye ki i annan sifizaman sa trak Konn Labib dan kongregasyon. Gard enpe dan ou pos oubyen pers, dan ou loto, dan ou landrwa travay, kot lekol, pre kot larantre ou lakour—nenport ki landrwa kot zot pou itil. Byensir, gard enpe dan ou sak predikasyon pour ler ou zwenn en dimoun avek ki ou kapab koz lo Labib.
12 Ki Zeova i beni nou Zefor: En lobzektif ki tou Kretyen i anvi se pour ansenny en lot dimoun laverite. (Mat. 28:19, 20) Eski ou pe aktyelman kondwir en letid Labib kot lakour? Si ou pe fer li, eski ou kapab trouv letan pour kondwir en lot dan ou progranm lasemenn? Si pour lemoman ou pa pe kondwir en letid, sirman ou ti a kontan kondwir en letid Labib. Priy Zeova pour ki i beni ou zefor pour trouv en dimoun avek ki ou kapab etidye. Apre sa travay an armoni avek ou lapriyer.—1 Zan 5:14, 15.
13 Nou annan en nouvo zouti pour konmans bann letid! Familyariz ou avek li. Distribye li libreman. Fer tou sa ki zot kapab “pour fer sa ki byen, e ki zot larises i konsist an bonn aksyon. Zot devre montre zot zenere e touzour pare pour partaz” sa ki zot aprann konsernan Parol Bondye.—1 Tim. 6:18.
[Bwat lo paz 4]
BANN LOPORTINITE POUR DISTRIBYE SA TRAK
◼ Dan konversasyon toulezour
◼ Kan en dimoun i aksepte nou piblikasyon
◼ Kan napa personn kot lakour
◼ Kan nou fer retourn vizit
◼ Kan nou rankontre en dimoun dan temwannyaz lo semen
◼ Kan nou donn temwannyaz dan teritwar biznes
◼ Kan nou pe donn temwannyaz enformel
◼ Kan nou pe ekrir let
◼ Kan nou dan transpor piblik
◼ Kan en dimoun i vin kot nou lakour
◼ Kan nou pe koz avek bann manm fanmiy, vwazen, koleg travay, kanmarad lekol, ek lezot dimoun ki nou konnen