Toultan pare pour ofer letid Labib
1. Ki nou merit fer pour nou obeir sa lord ki Zezi in donn nou dan Matye 28:19, 20?
1 Zezi ti donn nou en lord pour ‘fer tou pep vin son bann disip . . . , ansenny zot.’ (Mat. 28:19, 20) Alor, annou toultan pare pour ofer letid Labib dan tou lokazyon, pa zis sa wikenn spesyal ki’n ganny met de kote pour ofer letid Labib. Sa bann sizesyon ki swiv i kapab itil.
2. Avek lekel nou kapab ofer en letid Labib?
2 Ofer en letid: Pli nou ofer letid Labib, nou pou ganny plis loportinite pour ganny enn. (Ekle. 11:6) Eski ou’n esey fer en lapros direk? En kongregasyon dan Leta-z-ini ti fer en gran zefor pour fer sa pour en mwan antye. Zot ti byen satisfe akoz 42 nouvo letid Labib ti konmanse! Pa bezwen prezimen ki bann dimoun ki montre lentere dan predikasyon i konnen ki ou pare pour etidye avek zot. La prosenn fwa ou retournen, akoz ou pa ofer zot en letid? I pa grav si sa enn fwa zot pa aksepte. Ou kapab kontinyen ed zot pour devlop lentere. Eski ou’n demann ou bann vwazen, fanmir, koleg travay ek zanmi lekol si zot ti a kontan etidye Labib avek ou? Ou kapab osi demann ou etidyan si i annan zanmi oubyen fanmir ki ti a kontan etidye.
3. Ki zouti itil nou annan pour konmans letid Labib e kan ki nou kapab servi li?
3 En zouti itil: En zouti itil pour konmans letid Labib i sa trak Eski ou ti a kontan konn laverite? Ou kapab donn li avek met lakour menm si zot aksepte piblikasyon oubyen non. Ou kapab servi sa trak letan ou fer teritwar biznes, temwannyaz lo semen, temwannyaz par let ek letan ou pe fer retourn vizit. Ou kapab osi kit li kot bann lakaz kot ou pa zwenn personn. Akoz ou pa mars avek sa trak letan ou vwayaze dan transpor piblik, al rod konmisyon ek letan ou al travay? Deryer sa trak i eksplike an bref ki mannyer nou fer letid Labib e i entrodwir sa liv Ki Labib i dir.
4. Ki mannyer nou kapab servi sa trak Konn laverite pour konmans en letid?
4 Apre ki ou’n donn sa trak en dimoun, ou kapab atir son latansyon lo sa bann kestyon lo premye paz e demann li: “Lekel parmi sa bann kestyon ki pli enteres ou?” Apre get larepons ansanm ki trouve ladan. Lir oubyen eksplik dan ou prop mo ki mannyer en letid Labib i deroule ki trouve deryer sa trak. Ou kapab osi montre li lezot lenformasyon lo sa size dan liv Ki Labib i vreman dir?, ofer li sa liv e fer laranzman pour retournen pour kontiny sa diskisyon.
5. Akoz nou devret toultan pare pour ofer en letid Labib?
5 I annan ankor dimoun dan nou teritwar ki vreman anvi aprann sa ki Labib i vreman ansennyen. Letan nou toultan pare pour ofer en letid Labib, nou pou ganny plis sans pour eksperyans sa lazwa ki en dimoun i gannyen ler i ed lezot pour mars lo sa semen lavi.—Mat. 7:13, 14.