Reste konsantre lo fer disip
1. Kwa ki neseser pour ki dimoun i kapab ganny sove?
1 Rapor pour lannen servis 2014 i demontre sa devouman ek determinasyon pep Bondye pour pres sa bon nouvel Rwayonm. (Mat. 24:14) Nou pe zwenn plis dimoun ki zanmen oparavan avek sa mesaz Labib, atraver predikasyon portanport, kanpanny spesyal pour distribye trak ek lenvitasyon e atraver bann linisyativ ki nou pran pour fer temwannyaz an piblik. Par kont, nou devret ed bann dimoun pour vin disip Zezi par etidye Labib avek zot pour ki zot kapab ganny sove.—1 Tim. 2:4.
2. Ki bann kestyon ki nou kapab demann nou lekor ki pou ed nou pour toultan pare pour ofer en letid Labib?
2 Toultan pare pour ofer en letid Labib: Kan en dimoun i demontre lentere, eski ou fer zefor pour ganny son kontak e retournen pour al get li desito ki ou kapab avek bi pour konmans en letid Labib? Ki dernyen fwa ou’n esey konmans en letid Labib lo en premye vizit? Ki dernyen fwa ou’n ofer en letid Labib avek bann dimoun ki ou anmenn magazin kot zot regilyerman? Eski ou’n montre sa bann video Akfer etidye Labib? ek Kwa ki pase pandan en letid Labib? avek koleg travay, kanmarad lekol, vwazen, fanmir ek lezot dimoun ki nou konnen? Kan ou pe servi prezantwar, eski ou fer ou mye pour fer konnen avek sa ki pran en piblikasyon letid, ki zot kapab ganny en letid Labib gratwit avek sa piblikasyon?
3. Kwa ki nou bezwen pour nou reisi ansenny laverite?
3 Led sorti kot Zeova ek Zezi: Sa lord ki Zezi in donnen pour ‘fer disip’ i konmans avek sa mo “ale,” ki vedir ki i ti pe montre ki nou bezwen fer zefor e pran linisyativ pour swiv sa lord. Kantmenm sa, Zezi pa’n zis kit nou pour fer sa lo nou menm me i’n promet ki i pou touzour la avek nou. (Mat. 28:19, 20) An plis, Zeova in donn nou son lespri sen ensi ki bann zouti ek formasyon ki nou bezwen pour ansenny dimoun laverite. (Zeka. 4:6; 2 Kor. 4:7) Nou kapab priye pour ganny ‘sa dezir ek lafors’ pour partisip dan sa travay enportan.—Fili. 2:13, NW.
4. Akoz nou devret reste konsantre lo fer disip?
4 Nou ganny bokou lazwa ler nou pres sa bon nouvel. Me, nou lazwa i ogmante kan nou ansenny en dimoun laverite e ed li pour zwenn ansanm avek nou lo sa ‘semen ki anmenn ver lavi.’ (Mat. 7:14; 1 Tesa. 2:19, 20) Pli enportan ankor, ler nou reste konsantre lo fer disip, nou fer plezir Zeova ki “pa oule ki personn i ganny detri, me ki tou dimoun i arive repanti.”—2 Pyer 3:9.