Kominik atraver Let

LAVI plizyer milyon dimoun in amelyore gras a bann let. Okonmansman, laplipar liv dan bann Lekritir Grek Kretyen ti bann let. Nou osi ozordi nou kapab ekri bann let afen pour fortifye bann nouvo konpanyon Kretyen, gard kontak avek bann zanmi, ankouraz bann frer ek ser ki’n pran bann responsabilite spesyal, fortifye sa bann ki pe fer fas avek difikilte, e transmet lenformasyon ki itil pour okip bann aktivite kongregasyon.—1 Tesa. 1:1-7; 5:27; 2 Pyer 3:1, 2.

Ekrir let i osi en mwayen efikas pour donn temwannyaz. Dan serten landrwa, bokou dimoun i viv dan bann apartman ot sekirite oubyen dan lotel rezidansyel ki difisil pour prese. Pour serten dimoun laplipar-di-tan zot pa kot zot, alor nou pa rankontre zot ler nou pe pres port-an-port. Lezot i viv dan bann landrwa izole.

Maladi, movetan, oubyen restriksyon pour vwayaze i kapab parler anpes ou sorti deor. Eski ou kapab ekrir en let pour rann en temwannyaz avek en fanmiy oubyen avek en dimoun ki ou’n koz avek enformelman? Eski enn ou letid Labib in deplase? Petet en let sorti kot ou i egzakteman sa ki i bezwen pour gard son lentere spirityel vivan. Oubyen ou kapab partaz lenformasyon Biblik ki apropriye avek sa bann ki’n fek marye, vin manman oubyen papa, oubyen perdi enn ki zot kontan dan lanmor.

Rann Temwannyaz atraver Let

Ler ou pe ekrir pour rann en temwannyaz avek en dimoun ki ou pa’n zanmen rankontre, premye keksoz ki ou bezwen fer se entrodwir ou lekor. Ou kapab eksplike ki ou pe partisip dan en travay volonter ki pe ganny fer dan lemonn antye. Si i sanble apropriye, mansyonnen ki ou en Temwen Zeova. Les sa dimoun konnen akoz ki ou pe ekrir li dan plas vizit li. Ekrir konmsi ou ti pe koz avek sa dimoun fas-a-fas. Toudmenm, an armoni avek sa lenstriksyon pour “vin pridan parey bann serpan e dou parey bann kolonm” mazin seryezman lo ki kantite lenformasyon ou devret revele lo ou menm.—Mat. 10:16.

Ekrir sa dimoun menm keksoz ki ou ti pou dir li si ou ti’n ganny sans vizit li. Ou kapab adapte en lentrodiksyon dan liv Comment raisonner oubyen servi en prezantasyon Biblik dan en nimero Nou Minister Rwayonm resan. Ou kapab demann en kestyon e ankouraz sa dimoun pour reflesir lo la. Serten proklanmater i senpleman eksplike ki nou annan en progranm gratwit pour reponn bann kestyon Biblik e apre sit serten tit sapit dan enn nou bann brosir oubyen liv ki nou etidye. Lo paz 73 dan sa liv i annan legzanp en let ki’n ganny ekrir pour rann temwannyaz. I kapab donn ou serten lide, me i tre byen pour varye son konteni. Sankwa, avek letan, dimoun pou resevwar menm let plizyer fwa.

Serten dimoun i ezite pour lir en gran let sorti kot en etranze. Alor i kapab saz pour gard ou let bref. Konklir ou let avan ki sa dimoun i kapab fatige pour lir li. I pou apropriye pour met en papye lenvitasyon bann renyon kot Lasal Rwayonm. Ou kapab enkli en trak, oubyen en nimero Latour Veyer oubyen Réveillez-vous! e eksplike ki si i anvi i kapab ganny sa bann piblikasyon lo en baz regilye. Oubyen ou kapab demann li si ou kapab vizit li pour koz plis lo sa topik ki’n ganny diskite.

Detrwa mo konsernan Striktir

Get en kou sa model let ki’n ganny ekrir pour rann en temwannyaz. Remark sa bann keksoz swivan: (1) I prop e byen aranze, i pa an dezord. (2) Menm si lanvlop i perdi, sa dimoun pou kantmenm annan ladres ek non sa dimoun ki’n anvoy sa let. (3) Bi sa let in ganny ekrir dan en fason senp e direk dan premye paragraf. (4) Sak panse prensipal i ganny mansyonnen dan en paragraf separe. (5) An konsiderasyon avek son bi, sa let i pa ni tro enformel ni tro formel osi.

Dan en let pli formel, parey sa enn ki sekreter kongregasyon i kapab anvoy kot biro brans Temwen Zeova, non sa kongregasyon pou ganny enkli, ansanm avek non sa sekreter, son ladres, ek dat. Non ek ladres sa dimoun oubyen lorganizasyon aki sa let pe ganny anvoye pou osi enkli. Sa i swiv par en salitasyon apropriye ki aparet parlao sa sinyatir. Sa sinyatir i devret ganny ekrir par lanmen.

Dan nenport let, fer sir ki bann mo, granmer, ponktyasyon i korek e byensir ki i prop. Sa bann keksoz pou donn dinite ou let e avek sa mesaz ki i kontyen.

Lo sa lanvlop, toultan fourni en ladres ki sa dimoun i kapab kontakte ou—preferableman ou prop ladres. Si ou santi ki i pa pou saz pour donn ou prop ladres ler pe temwanny avek etranze, demann bann ansyen si zot pou dakor ki ou servi ladres Lasal Rwayonm oubyen en ansyen. Ladres Lasosyete pa devret zanmen ganny servi pour sa bi, vi ki sa pou endike ki ou let ti ganny anvoye apartir lofis Lasosyete e sa pou fer konfizyon. Si dan sa let ti annan piblikasyon e ti napa okenn ladres pour sa dimoun kapab adres lo la, sa osi i kapab donn move lenpresyon ki se Lasosyete ki’n anvoy sa let.

Fer sir ki ou met valer tenm lapos ki apropriye, sirtou si ou’n enkli piblikasyon. Si larzan tenm i pa sifi, sa enn ki pe resevwar sa let i kapab ganny sarze pour sa kantite ki manke, e sa pou retir son latansyon lo ou mesaz. Mazinen ki dan bokou pei ler en brosir oubyen en magazin i ganny met dan en lanvlop, tenm lapos i kout pli ser ki pour en let.

Bon Fason eksprimen

Enn fwa ki ou’n konplet ou let, lir li pour evalye konteni. Ki lenpresyon i donnen? Eski i amikal e montre konsiderasyon? Lanmour ek bonte i parmi bann kalite ki nou esey manifeste dan nou fason azir avek lezot. (Gal. 5:22, 23) Si ou detekte en ton negatif ouswa i pa tro tro optimis, aziste ou bann fraz.

En let i kapab al bann landrwa ki ou pa kapab ale. Zis sa fe tousel i fer li en zouti itil pour minister. Vi ki ou let i reprezant ou ek ou bann valer, reflesir lo sa ki i dir, konman ki i sanble, e ki lenpresyon i donnen. I kapab fourni egzakteman sa ki neseser pour konmanse, fortifye oubyen ankouraz en dimoun presye lo semen lavi.