Volim Lavwa konvenab

SI EN orater piblik i napa volim lavwa ki neseser, serten dan lodyans i kapab konmans dormi. Si en proklanmater i koz avek en lavwa tro ba dan predikasyon, petet i pa pou kaptir latansyon sa dimoun. E si lodyans pa koz ase for ler pe fer komanter dan bann renyon, sa bann ki prezan pa pou resevwar lankourazman neseser. (Ebr. 10:24, 25) Parkont, si en orater i koz for dan moman ki pa apropriye, i kapab dezagreab pour lodyans—menm enervan.—Prov. 27:14.

Konsider ou Lodyans. Lekel ki ou pe koz avek? en endividi? en fanmiy? en pti group pandan randevou predikasyon? avek kongregasyon an antye? oubyen avek en gran lasanble? I evidan ki volim lavwa ki konvenab dan en sitiasyon i kapab pa apropriye dan en lot.

Dan diferan lokazyon, bann serviter Bondye in koz avek bann gran lodyans. Zour inogirasyon tanp an Zerizalenm dan letan Salomon, ti napa mikro. Alor Salomon ti debout anler lo en lestrad e beni lepep “avek en lavwa for.” (1 Rwa. 8:55; 2 Kron. 6:13) Plizyer syek plitar, zour Lapannkot 33 N.L. apre ki lespri sen ti’n desann, en gran kantite dimoun—serten ki ti enterese, lezot ki ti pe gognarde—ti rasanble otour en pti group Kretyen an Zerizalenm. Par montre sazes pratik, Pyer “ti debout . . . e avek en lavwa byen for” i ti adres lafoul. (Akt 2:14) E i ti donn en temwannyaz pwisan.

Ki mannyer ou kapab konnen si sa volim lavwa ki ou pe servi i konvenab dan en serten sitiasyon? Reaksyon lodyans i en pli bon lendikasyon. Si ou remarke ki serten dan lodyans pe fer en gran zefor pour antann, ou devret esey aziste ou volim lavwa.

Ki swa nou pe koz avek en endividi oubyen avek en group, i byen pour konsider lekel ki konpoz sa lodyans. Si en dimoun i annan difikilte pour antann, petet ou bezwen koz enpe pli for. Me pour dimoun ki petet senpleman reakte enpe dousman akoz laz, zot pa pou apresye si ou kriye. Kriye i menm kapab ganny konsidere konman en siny mank polites. Dan serten kiltir, koz for i ganny vwar konman en lendikasyon ki sa dimoun i ankoler oubyen enpasyan.

Pran an konsiderasyon lezot Tapaz. Ler ou partisip dan predikasyon, bann sirkonstans ki ou rankontre i definitivman enfliyans volim lavwa ki konvenab pour donn en temwannyaz. Petet ou bezwen konteste avek tapaz trafik, zanfan dezord, lisyen pe abwaye, lanmizik oubyen en televizyon ki pe zwe tre for. Lo lot kote, dan bann landrwa kot bann lakaz i enn lo lot, i kapab anbaras sa dimoun si ou koz telman for ki ou atrakte latansyon vwazen.

Bann frer ki donn bann diskour dan kongregasyon oubyen dan lasanble i osi bezwen fer fas avek en gran varyete sirkonstans. Koz avek en lodyans an deor i vreman diferan avek prezant en diskour dan en lasal konferans ki byen fer rezonnen bann son. Dan Lanmerik-di-Sid de misyonner ti partisip pour prezant en diskour piblik dan lavarang en lakaz en dimoun enterese pandan ki fe-d-artifis ti pe pete la obor dan semen ek en kok ki ti pe sante san arete lanmenm obor!

Pandan en ekspoze, en keksoz i kapab arive ki demann swa en poz ziska ki sa distraksyon i arete oubyen en ogmantasyon dan volim lavwa. Par egzanp, si en renyon pe ganny fer dan en batiman ki ganny kouver avek en twa an tol, i kapab preski enposib pour lodyans antann sa orater si en gro lapli i konmans tonbe. En zanfan ki pe plere oubyen en distraksyon fer par en dimoun ki ariv tar pou sirman prezant en defi. Aprann kouver sa distraksyon afen ki ou lodyans i kapab benefisye plennman avek sa lenformasyon ki ou pe prezante.

Sistenm mikro pou itil si i disponib, me i pa elimin bezwen delapar sa orater pour koz pli for ler sitiasyon i demande. Dan serten landrwa kot lenteripsyon elektrisite i komen, bann orater i oblize kontiny zot diskour san led en mikro.

Konsider Lenformasyon ki pe ganny diskite. Kalite lenformasyon dan ou ekspoze i osi bezwen ganny pran an konsiderasyon pour konnen ki volim lavwa ki apropriye. Si sa topik i bezwen ganny prezante avek lafors, pa redwir son lafors par koz tro ba. Par egzanp, ler ou pe lir bann parol kondannasyon dan Labib, ou volim lavwa i devret pli for ki ler ou pe lir konsey lo montre lanmour. Adapte ou volim dapre lenformasyon, me fer atansyon pour pa fer li dan en fason ki atir latansyon lo ou.

Konsider ou Lobzektif. Si ou anvi motiv ou lodyans pour vin zele, petet ou bezwen servi en volim lavwa pli for. Si ou anvi sanz zot fason panse, pa repous zot par servi tro bokou volim lavwa. Si ou pe esey konsole, en lavwa pli ba i normalman pli meyer.

Byen servi en Volim for. Ler ou pe esey ganny latansyon en dimoun ki okipe, ogmant volim lavwa i souvan ede. Bann paran i konn sa byen, pour sa rezon ki zot koz pli for pour apel zot zanfan ler i ariv letan pour zot antre. Koz pli for i kapab osi neseser ler en tyermenn i demar en renyon kongregasyon oubyen en lasanble. Dan travay predikasyon, bann proklanmater i kapab lans en salitasyon ler zot apros en dimoun ki pe travay deor.

Menm apre ki ou ganny latansyon en dimoun, i enportan kontinyen servi en volim ki ase for. En lavwa vreman feb i kapab donn lenpresyon ki sa orater in mal prepare oubyen mank konviksyon.

Ler i ganny azoute ansanm avek en komann, koz pli for i kapab pous dimoun pour azir. (Akt 14:9, 10) Pareyman, dir en komann avek en lavwa for i kapab evit dezas. An Filip, en gardyen prizon ti pe al touy son lekor akoz i ti krwar ki tou son prizonnyen in sove. “Me Pol ti kriye avek tou son lafors: ‘Pa bezwen fer dimal ou lekor. Nou tou nou la.’” Dan sa fason sa ti evite ki sa zonm i touy son lekor. Apre Pol ek Silas ti rann en temwannyaz avek sa gardyen prizon ek son fanmiy, e zot tou ti aksepte laverite.—Akt 16:27-33.

Konman pour amelyor ou Volim Lavwa. Pour serten, i demann zefor ekstra pour aprann konman servi en volim lavwa konvenab. Petet en dimoun pa kapab koz for akoz i annan en lavwa ki feb. Sepandan, avek zefor, amelyorasyon i kapab posib, kantmenm i kapab ankor annan en pti lavwa. Donn latansyon lo respirasyon ek pozisyon ou lekor. Egzers asiz e debout drwat. Pous ou zepol par deryer, e pran en gran respirasyon. Fer sir ki ou pe ranpli sa dernyen bout ou poumon. I sa sours ler, ki kan i ganny byen regle, i fer posib pour ou kontrol ou volim lavwa ler ou pe koze.

Pour lezot, problenm se ki zot koz tro for. Petet zot in devlop sa labitid konman en rezilta travay deor oubyen dan en lanvironnman tapaz. Lo lot kote, petet zot sorti dan en fanmiy kot i normal pour tou dimoun kriye e koup parol lezot. Rezilta, se ki zot krwar ki pour lezot tann zot, zot bezwen koz pli for ki lezot. Anmezir ki zot progresivman port latansyon lo konsey Labib pour ranpli avek “konpasyon, labonte, limilite, ladouser ek pasyans” zot pou fer azisteman dan zot volim lavwa ler zot pe koz avek lezot.—Kol. 3:12.

Bon preparasyon, leksperyans ki vin par partisip regilyerman dan predikasyon, ek lapriyer avek Zeova pou ed ou pour koz avek volim konvenab. Ki swa ou pe koz lo lestrad oubyen avek en dimoun dan predikasyon, esey konsantre ou lespri lo konman ki sa lot dimoun i kapab ganny ede par ekout sa ki ou pe dir.—Prov. 18:21.