Varyasyon dan Lavwa

MET lanfaz lo serten mo oubyen group mo i ed en lodyans konpran sa ki ou dir. Me ler ou byen servi varyete dan volim, vites, ek ton lavwa, ou ekspoze i kapab vin pli agreab pour ekoute. Plis ki sa, i kapab endik ou lodyans konman ou santi konsernan sa ki ou pe dir. Ou latitid anver sa lenformasyon i kapab enfliyans lafason zot santi konsernan sa topik. Sa i vre ki swa ou pe koz devan lo en lestrad oubyen avek en dimoun dan predikasyon.

Lavwa imen i en lenstriman merveye, ki annan potansyel pour gran varyete. Ler i ganny byen servi, i kapab fer en ekspoze vivan, tous leker, stimil lemosyon, e motiv lezot pour azir. Sepandan, sa i pa kapab ganny akonpli par zis fer bann pti mark lo ou fey not ki pou endik ou kan pour aziste volim lavwa, sanz vites lavwa, oubyen pour varye ton lavwa. Si varyasyon dan lavwa i zis ganny fer dapre sa bann lendikasyon, i pa pou paret natirel. Olye fer ou prezantasyon pli vivan e varye, i kapab fer ou lodyans pa santi zot alez. Varyasyon natirel dan lavwa i sorti dan leker.

Ler i ganny servi dan en bon fason, varyasyon dan lavwa pa pou atir latansyon ki pa neseser lo sa orater. Plito, i pou ed lodyans konpran vre sinifikasyon sa topik ki pe ganny prezante.

Aziste Volim Lavwa. En fason pour varye ou lekspresyon vokal se pour aziste ou volim lavwa. Me sa pa devret senpleman ganny fer par ogmant oubyen abes volim lavwa dan en fason monotonn toudilon ou ekspoze. Sa pou afekte sans sa ki ou pe dir. Si ou lev ou volim lavwa tro souvan, i pa pou telman agreab.

Ou volim i devret apropriye avek ou lenformasyon. Ki swa ou pe lir en komann irzan, tel parey sa enn dan Revelasyon 14:6, 7 oubyen dan Revelasyon 18:4, oubyen en lekspresyon avek bokou konviksyon, parey i ganny rikorde dan Egzod 14:13, 14, i apropriye ki ou koz pli for. Pareyman, si ou pe lir en kondannasyon sever dan Labib, tel parey sa enn dan Zeremi 25:27-38, varye ou volim lavwa pou fer serten lekspresyon pli evidan ki larestan.

Konsider, osi, ou lobzektif. Eski ou anvi motiv ou lodyans pour azir? Eski ou anvi fer bann pwen prensipal dan ou prezantasyon evidan? Koz pli for dan en fason rezonnab, i ede akonpli sa bann lobzektif. Sepandan, dan serten ka senpleman ogmant ou volim i kapab anpes ou atenn ou lobzektif. Konman sa? I kapab ki sa ki ou pe dir i demann dir avek lasaler oubyen santiman olye ki ogmant volim lavwa. Nou pou diskit sa dan Letid 11.

Ler i ganny servi avek disernman, abes volim lavwa i kapab stimil antisipasyon. Me sa i souvan demann en pli gran lafors dan ton lavwa toudswit apre. Koz enpe mwen for ansanm avek plis lafors dan ton lavwa i kapab ganny servi pour transmet lenkyetid oubyen lafreyer. Redwir volim lavwa i kapab osi ganny servi pour endike ki sa ki pe ganny dir i annan mwens lenportans an konparezon avek sa bann lide avan oubyen apre. Sepandan, si ou volim i toultan ba, sa i kapab donn lenpresyon ki ou pa tro sir oubyen ki ou mank konviksyon ouswa vre lentere dan sa topik. Evidaman, bann ton lavwa tre fen i devret ganny servi avek disernman.

Varye Vites ki ou koze. Dan koze toulezour, bann parol i sorti natirel anmezir ki nou eksprim bann panse. Ler nou eksite, nou annan labitid pour koz tre vit. Ler nou oule lezot rapel byen sa ki nou dir, nou pa koz tro vit.

Sepandan, laplipar nouvo orater pa konn varye vites ki zot koze. Akoz? Zot konsantre tro bokou lo bann mo. I kapab ki tou in ganny ekrir lo papye. Menm si sa ekspoze pa ganny lir apartir en maniskri, i kapab ki i konn tou bann mo parker. Konman en rezilta, tou keksoz i ganny prezante konmsi i ganny resite dan en ton monotonn. Aprann pour koz dapre en plan pou ede koriz sa febles.

Evite ogmant ou vites dan en fason san ekspekte ki fer en dimoun mazin en sat ki pe marse e ki soudennman taye ler i trouv en lisyen. E pa zanmen koz sitan vit ki i afekte ou prononsyasyon.

Pour kapab varye byen vites ki ou koze, pa senpleman ogmant e ralanti vites ki ou koze detanzaot. Olye fer ou lenformasyon ki ou pe prezante vin pli enteresan, sa fason prezante pou fer tou lekontrer. Sanzman vites ki ou koze i devret ganny aziste dapre sa ki ou pe dir, bann lemosyon ki ou anvi transmet, e ou lobzektif. Ler ou fer ou prezantasyon, koz avek en vites rezonnab. Pour transmet leksitasyon, koz pli rapidman, zis parey ou ti a fer dan lavi toulezour. Sa i osi apropriye ler pe dir bann pwen ki mwen enportan oubyen ler pe rakont bann levennman ki son bann detay pa esansyel. Sa pou azout varyete e ede pour pa fer ou ekspoze paret tro serye. Parkont, bann largiman pli enportan, bann pwen prensipal, ek bann moman for dan prezantasyon i souvan demann pour koz pli dousman.

Varye ou Ton Lavwa. Imazin en dimoun ki pe zwe en lenstriman mizikal pour apepre en er-d-tan. Pandan tou sa letan, i fer sonnen zis en not—premyerman for, apre kalm, parler vitman, apre dousman. I annan en varyete dan volim ek dan vites, me san varyete dan ton, sa “lanmizik” i pa atiran. Pareyman, san varyete dan ton lavwa, lezot pa pou apresye nou lavwa.

I neseser pour rapel ki bann sanzman dan ton lavwa napa menm lefe dan tou langaz. Dan serten langaz parey langaz Sinwan, sanzman ton lavwa i kapab sanz sinifikasyon en mo. Toudmenm, menm dan en tel langaz, i annan keksoz ki en dimoun i kapab fer pour azout pli gran varyete avek son bann lekspresyon vokal. I kapab travay lo amelyor degre sa bann sanzman ton lavwa tandis ki i gard apepre menm nivo pour sa bann diferan ton. Alor i kapab fer bann ton o pli o, e bann ton ba pli ba.

Menm avek lezot langaz, en sanzman dan ton i kapab transmet en varyete lide. Par egzanp, fer monte en pti gin ton e koz en pti pe pli for i kapab ganny servi pour aksantye. Oubyen en sanzman dan ton i kapab en mwayen pour endik groser oubyen distans. Fer monte ton lavwa alafen en fraz i kapab endike ki en kestyon in ganny demande. Serten langaz i kapab oblize pour fer desann ton lavwa.

Leksitasyon ek lantouzyasm i kapab ganny eksprimen avek en ton pli o. Sagren ek lenkyetid i kapab demann pour en ton pli ba. Bann lemosyon ki ganny mansyonnen la i bann ki ed sa orater tous leker. Ler ou anvi eksprim zot, pa zis dir sa bann mo. Servi ou lavwa dan en fason ki montre ki ou osi santi zot.

Etablir en Fondasyon. Kote, alor, ki varyasyon dan lavwa i konmanse? Ler ki ou pe swazir lenformasyon pour ou ekspoze. Si ou enkli zis largimantasyon oubyen zis donn konsey, ou pou annan mwens loportinite pour varye ou prezantasyon. Alor egzamin ou plan, e fer sir ki ou annan bann zengredyen neseser pour ki ou prezantasyon i vivan e ki lezot i aprann keksoz.

Sipoze ki omilye ou ekspoze, ou santi sa nesesite pour azout pli gran varyete akoz ou prezantasyon pe trennen. Ki ou fer alor? Sanz lafason prezant ou lenformasyon. Konman? En fason se pour ouver Labib, envit lodyans pour ouver pour zot, e lir en verse olye ki senpleman koze. Oubyen sanz serten deklarasyon dan en kestyon, azout en poz pour lanfaz. Azout en ilistrasyon senp. Sa i bann teknik ki ganny servi par bann orater eksperyanse. Me nenport ki nivo ou leksperyans, ou kapab servi sa bann lide ler ou pe prepar ou lenformasyon.

I normal pour dir ki varyasyon dan lavwa i donn gou avek en ekspoze. Si ou met sa bon kalite gou e lakantite egzakt, sa pou fer byen resorti karakteristik pli enportan ou lenformasyon e fer li en plezir pour ou lodyans.