Bon laparans personnel

OU LAPARANS personnel i dir bokou lo ou. Menm si Zeova i vwar leker, imen i zeneralman tir konklizyon dapre “sa ki aparet devan son lizye.” (1 Sam. 16:7) Ler ou prop, annord e byen abiye, i tre probab ki lezot pou konklir ki ou annan respe pour ou lekor, e zot pou pli pare pour ekout ou. Ler ou sanz dan en fason apropriye sa osi pou fer en bon lenpresyon lo sa lorganizasyon ki ou reprezante e lo pwenn-vi sa bann ki pe ekout ou konsernan sa Bondye ki ou adore.

Bann Gidans pour swiv. Labib pa detay bokou lareg konsernan laparans personnel. Me i fourni bann prensip balanse ki kapab ed nou fer bann bon desizyon. Pwen fondamantal avek tousala se lefe ki nou “fer tou pour laglwar Bondye.” (1 Kor. 10:31) Ki bann prensip ki enplike konsernan nou laparans personnel?

Premyerman, Labib i ankouraz nou pour nou prop, nou lekor ek nou lenz. Dan son Lalwa avek ansyen Izrael, Zeova ti detay bann kondisyon konsernan lapropte. Par egzanp, ler bann pret ti pe travay, zot ti bezwen bennyen e lav zot lenz dan bann letan dezinyen. (Lev. 16:4, 24, 26, 28) Bann Kretyen pa anba Lalwa Mozaik, me bann prensip ki i kontyen i ankor valid. (Zan 13:10; Rev. 19:8) Sirtou ler nou pe al dan en landrwa ladorasyon oubyen pe partisip dan predikasyon, nou lekor, nou lalenn, ek nou resanz i devret prop afen ki nou prezans pa kree en move lefe lo lezot. Sa bann ki donn bann ekspoze oubyen partisip dan demonstrasyon devan kongregasyon i devret donn en bon legzanp dan sa domenn. Donn latansyon avek nou laparans personnel i demontre respe pour Zeova e pour son lorganizasyon.

Dezyenmman, Labib i ensit nou pour kiltiv modesti ek bon sans. Zapot Pol ti ensit bann madanm Kretyen pour ‘abiy . . . avek modesti ek bon sans, pa avek lanmod seve konplike ek bizou an-or, ou perl ek labiyman byen ser, me okontrer ki zot ganny admire pour bann bon aksyon, ki apropriye pour bann madanm ki relizye.’ (1 Tim. 2:9, 10). Modesti ek bon sans i osi enportan dan sanze ek labiyman bann zonm.

En dimoun ki modes i vwar li enportan pour pa ofans lezot pour en rezon initil e atir latansyon ki pa neseser lo li menm. Rezilta bon sans i pridans, oubyen bon zizman. Dimoun ki demontre sa bann kalite i ekilibre dan lavi akoz i annan respe pour bann standar divin. Manifeste sa bann kalite i pa vedir ki nou pa sanz dan en fason atiran me i ed nou pour rezonnab dan nou laparans e pour evit bann stil sanze e pennyen ki ekstravagan. (1 Zan 2:16) Nou anvi aplik sa bann prensip ki swa nou dan en landrwa ladorasyon, pe partisip dan predikasyon, oubyen pe angaz dan lezot aktivite. Menm nou lenz ordiner i devret reflekte modesti ek bon sans. Dan lekol oubyen dan landrwa travay, i pou annan loportinite pour fer temwannyaz enformel. I vre ki nou pa’n sanz dan menm fason parey ler nou pe asiste renyon ek bann diferan lasanble, me toudmenm dan sa bann landrwa nou lenz i devret annord, prop, e modes.

Byensir, nou tou nou pa sanz parey. Nou pa ganny demande pour fer li. Dimoun i annan diferan gou, e sa i byen normal. Me bann gidans Labib i devret toultan ganny aplike.

Zapot Pyer ti endike ki bokou pli enportan ki stil seve ek lenz se labiyman ki ganny asosye avek “labote enteryer, dan leker.” (1 Pyer 3:3, 4) Ler nou leker i ranpli avek lanmour, lazwa, lape, labonte, ek lafwa solid, sa bann kalite pou vin pour nou bann resanz spirityel ki vreman onor Bondye.

Trwazyenmman, Labib i ankouraz nou pour vwar si nou laparans in ganny byen aranze. Dan 1 Timote 2:9, i mansyonn “abiy zot byen.” Kantmenm zapot Pol ti pe fer referans avek labiyman bann madanm, sa menm prensip i aplik pour bann zonm. En serten keksoz ki byen aranze i prop e annord. Ki swa nou ris oubyen pov, nou kapab annan en laparans ki prop.

Enn bann premye laspe nou laparans personnel ki lezot i remarke se nou seve. I devret prop e annord, ouswa byen aranze. Koutim lokal ek bann fakter erediter i annan lenfliyans lo lafason ki dimoun i aranz zot seve. Dan 1 Korentyen 11:14, 15, nou trouv konsey zapot Pol lo stil seve, ki evidaman pran an konsiderasyon sa de fakter. Sepandan, ler stil seve en dimoun i donn lenpresyon ki en zonm pe esey annan en laparans en fanm oubyen en fanm laparans en zonm, sa i an konfli avek bann prensip Labib.—Det. 22:5.

Pour zonm, en laparans personnel ki prop i kapab enkli byen raze. Dan bann landrwa kot moustas i ganny konsidere konman onorab, i devret ganny byen mentenir e annord.

Katriyenmman, nou laparans i pa devret reflekte lanmour pour lemonn e pour son bann fason. Zapot Zan ti averti: “Pa bezwen kontan lemonn ni sa bann keksoz ki dan lemonn.” (1 Zan 2:15-17) Bokou move dezir i karakteriz sa monn. Parmi sa bann dezir Zan i mansyonn dezir natir imen e demonstre ki nou annan keksoz materyel. Labib i osi atir latansyon lo lespri rebel, oubyen dezobeisans anver lotorite. (Prov. 17:11; Efe. 2:2) Sa bann dezir ek latitid i souvan ganny manifeste dan fason ki dimoun i sanze e aranz zot lekor. Son rezilta, zot laparans i kapab eksit bann dezir seksyel, i kapab pa modes, mardigra, an dezord, napa bon gou oubyen en resanz sal ouswa kraze. Konman bann serviter Zeova nou evit bann stil ki reflekte sa bann fason lemonn.

Olye ki imit lemonn, pa i pli meyer pour les bann bon legzanp zonm ek fanm dan kongregasyon Kretyen enfliyans ou resanz ek fason abiye! Bann zenn zan ki swete vin bann orater piblik en zour i kapab obzerv resanz sa bann ki deza kalifye pour donn diskour piblik. Nou tou nou kapab aprann atraver legzanp etablir par bann endividi ki’n fidelman partisip pour bokou lannen dan predikasyon.—1 Tim. 4:12; 1 Pyer 5:2, 3.

Senkyenmman, pour deside sa ki apropriye, nou devret gard antet ki “Kris li pa ti esey rod sa ki ti fer li plezir.” (Rom. 15:3) Zezi ti prensipalman konsernen pour fer lavolonte Bondye. Osi, pour Zezi ed lezot ti vin avan son prop benefis. Konsernan serten stil lenz ek fason abiye, si okenn keksoz pou kree en baryer ant nou ek dimoun dan nou teritwar, ki nou devret fer? Imit latitid limilite ki Zezi ti demontre i kapab ed nou pour fer bann bon desizyon. Zapot Pol ti donn sa prensip: “Nou pa oule plas okenn lobstak devan personn, pour ki nou servis pour Bondye pa ganny blanmen.” (2 Kor. 6:3) Pour sa rezon nou kapab evit bann stil seve oubyen serten resanz ki kapab ferm lespri dimoun ki nou anvi pres avek.

Fason ki nou tenir nou Lekor. Bon laparans personnel i osi enplik fason ki nou pozisyonn nou lekor ki bezwen apropriye. Byensir, nou tou nou pa tenir nou lekor dan menm fason, e nou pa esey swiv menm lareg. Sepandan, i vo lapenn fer resorti ki lafason ki Labib i servi sa mo debout drwat i donn lide dinite ek en pwenn-vi pozitif. (Lev. 26:13; Lik 21:28) Toudmenm, kekfwa en frer oubyen en ser pa kapab debout drwat ouswa i bezwen apiy kont en keksoz, akoz i’n travay bokou lannen dan en pozisyon bole oubyen akoz laz oubyen febles fizik. Me pour sa bann ki kapab fer li, debout ase drwat ler pe koz avek lezot i ganny rekomande afen pour pa donn lenpresyon ki nou neglizan oubyen kanmi konsernan sa ki nou pe dir. Pareyman, kantmenm i pa mal pour en orater detanzaot repoz son lanmen lo pipit, pa apiy avek pipit i zeneralman transmet en lenpresyon pli pozitif.

Lekipman prop. Pa selman nou laparans personnel ki devret prop e byen aranze me osi nou lekipman pour servi dan predikasyon i devret prop e annord.

Egzamin ou Labib. I pa posib pour nou tou obtenir en nouvo Labib ler pour nou i vin vye. Toudmenm, nenport ki kantite letan ki nou’n annan nou Labib, i devret donn levidans ki nou’n pran byen swen avek.

Byensir, i annan plizyer fason pour aranz en sak predikasyon, me i devret prop e annord. Eski ou’n deza vwar papye pe tonm ater ler en proklanmater pe ouver son Labib pour lir en verse avek dimoun dan predikasyon oubyen petet ler en frer pe donn en diskour avek kongregasyon? Sa ti distrer ou, pa i vre? Si bann papye ki ganny mete dan en Labib i en sours distraksyon, met zot dan en lot landrwa i permet ou annan bann lekipman byen aranze. Realize osi, ki met Labib oubyen lezot piblikasyon relizye ater i ganny konsidere konman en gran mank respe dan serten kiltir.

Bon laparans personnel i devret enportan pour nou. I osi enfliyans konman ki lezot i vwar nou. Me plis ki sa, nou donn li bokou latansyon parski nou dezir se pour “fer loner lansennyman lo Bondye, nou Sover” dan tou keksoz.—Tit 2:10.