En Laparans desan e ki onor Zeova
1. Ler nou pe prepar pour lasanble distrik, akoz nou devret reflesir lo nou laparans?
1 “Bann Temwen Zeova i bann pli bon dimoun! Zot zantiy e zot sanz byen. Zot demontre profon respe.” Sa i parol ki en reprezantan lotel ti dir lo bann frer ek ser ki ti asiste en lasanble distrik lannen pase. Dan en lot lasanble, en travayer lotel ti dir: “I evidan ki zot bann dimoun i sanz dan en fason pour fer plezir Bondye.” Wi, bann delege ki asiste lasanble i ganny remarke par lezot. Alors, nou anvi sanz “dan en fason ki an-akor avek levanzil,” e souvan sa i pous bann dimoun ki pa Temwen pour felisit nou e fer li evidan ki nou bann minis Bondye. (Fili. 1:27) Anmezir ki nou prepar pour lasanble distrik, i neseser pour mazin lo nou laparans davans.
2. Akoz i difisil pour abiy e sanz dan en fason ki demontre lapirte?
2 Disip Zak ti ekrir: “Lasazes ki sorti dan lesyel i premyerman pir.” (Zak 3:17) Pour reflekte lapirte dan nou laparans i kapab vin en difikilte. Lemonn imoral Satan i enfliyans bann dimoun pour adopte bann stil ki pa modes, ki eksit dezir seksyel, ki drol, e ki pa apropriye pour Kretyen. (1 Zan 2:15-17) Alor, ler nou pe desid konsernan nou labiyman ek laparans, nou bezwen ekout konsey Labib pour “abandonn nou move lavi ek son bann move dezir, pour viv en lavi rezonnab . . . lo sa later.” (Tit 2:12) Nou pa pou zanmen anvi sok lezot avek nou laparans, ki swa zot nou bann frer ek ser, bann travayer lotel ek restoran, ouswa lezot ki pe gete.—1 Kor. 10:32, 33.
3. Ki kestyon ki pou ed nou egzamin nou laparans?
3 Abiy byen desaman e modes: Ler ou pe prepare pour lasanble, demann ou lekor: ‘Eski mon lenz i modes, ouswa eski i atir tro bokou latansyon lo mwan? Eski i montre respe pour santiman lezot? Eski mon kor i tro dekolte ouswa i tro kourt? Eski mon rob i provokan ouswa i tro sere? Eski mon lenz i prop e napa move loder? Ler mon pe pran pti dezennen bomaten ki lotel i donnen ouswa pe relaks apre progranm, eski mon pou annan en laparans prop e annord konman en minis Bondye, ouswa eski mon lenz pou debraye, pe swiv lanmod e pa apropriye pour en delege ki’n met en badz lasanble? Eski lenz ki mon pou mete pandan moman lwazir pou fer mwan anbarase pour donn en temwannyaz enformel?’—Rom. 15:2, 3; 1 Tim. 2:9.
4. Ki mannyer lezot i kapab ed nou pour annan en laparans modes?
4 Nou kapab benefisye avek lopinyon bann Kretyen matir. Bann madanm i devret demann zot mari ki mannyer lezot i kapab vwar zot lenz. Bann paran Kretyen i kapab ed zot zanfan adolesan dan sa domenn. Deplis, bann ser aze ki respektab i kapab fer ‘bann zenn madanm aprann ki mannyer pour’ vin “rezonnab, byen tenir zot . . . pour ki personn pa mal koz parol Bondye.” (Tit 2:3-5) Nou bann piblikasyon i fourni bann legzanp itil ki montre konman pour abiy byen desaman e modes.
5. Konman ki nou tou nou kapab anmenn loner pour Zeova pandan lasanble?
5 Anmenn Loner pour Zeova: Bann lasanble distrik i fourni en bon loportinite pour nou tou loue Zeova, pa zis bann ki pe partisip dan progranm. Byensir, nou kondwit ek nou fason koze pou onor li. Me premye keksoz ki bann ki pe obzerve i remarke lo nou se nou fason abiye ek nou laparans fizik. Fotespere ki nou tou nou anmenn loner pour Zeova par nou laparans.—Ps. 148:12, 13.
[Bwat lo paz 6]
Led pour annan en Laparans ki onor Zeova
◼ Parol Bondye
◼ Egzamin nou menm
◼ Lopinyon lezot
◼ Piblikasyon Kretyen