Abiy byen desaman i montre Respe profon pour Bondye
1. Konman nou kapab eksprim nou lapresyasyon pour sa lasanble distrik ki pe vini?
1 Byento nou pou annan sa privilez pour vin envite Zeova dan Lasanble Distrik 2003 “Donn Bondye Laglwar.” Pa nou rekonesan ki Zeova in envit nou pour en tel festen spirityel vreman ris! Nou kapab demontre nou respe profon pour li e nou lapresyasyon pour bann provizyon spirityel ki i’n fourni par nou labiyman ek nou laparans.—Ps. 116:12, 17.
2. Akoz i tre enportan pour nou prop e ki nou laparans i annord?
2 Prop e annord: Nou laparans i devret reflekte standar nou Bondye, ki prop e annord. (1 Kor. 14:33; 2 Kor. 7:1) Nou lekor, seve, ek zong i devret prop, e nou fason sanze i devret byen annord. Fason sanze debraye i tre komen ozordi. Parkont, i pa en rezon pour en Kretyen sanz an devergonde zis akoz en akter oubyen en vedet sport i sanz koumsa. Si nou swiv lanmod, i pou difisil pour dimoun vwar diferans ant bann ki pe servi sa vre Bondye ek bann ki pa pe servi li.—Mal. 3:18.
3. Konman nou kapab fer sir ki nou laparans i an armoni avek sa konsey ki ganny trouve dan 1 Timote 2:9, 10?
3 Labiyman ki apropriye pour bann Minis Kretyen: Kan zapot Pol ti ekrir sirveyan Kretyen Timote, i ti ankouraz “bann madanm [pour] abiy zot byen desaman, respektab, dan en fason konvenab e senp . . . ki zot ganny admire pour zot bann bonn aksyon, ki apropriye pour bann madanm ki relizye.” (1 Tim. 2:9, 10) Pour fer sir ki nou lenz i byen aranze i demann bokou latansyon lo nou kote. Lenz i devret annord, prop e modes; pa mardigra, provokan, oubyen eksit dezir.—1 Pyer 3:3.
4, 5. Ki lavertisman bann zonm ek fanm Kretyen i devret pran aker?
4 Pol ti osi averti kont al an tro avek bann “lanmod seve konplike, avek bizou an-or, ou perl ek labiyman byen ser.” (1 Tim. 2:9) I byen pour bann fanm Kretyen byen balanse dan lafason ki zot servi bann bizou, makiyaz, ek lezot dekorasyon.—Prov. 11:2.
5 Konsey ki Pol ti donn bann fanm Kretyen i osi aplik pour bann zonm Kretyen. Bann frer i devret evit bann stil ki reflekte lespri lemonn. (1 Zan 2:16) Par egzanp, bann gro kannson ek gro semiz i tre popiler dan serten pei, me sa stil i pa konvenab pour en minis Bondye.
6. Akoz nou devret gard en standar onivo dan lafason ki nou sanze ek nou laparans ler nou pe vwayaze avan e apre lasanble, ler nou dan lasanble, e apre sesyon sak zour?
6 Pandan bann Aktivite Lwazir: Kan zot asiste lasanble, laplipar frer ek ser i demontre bon legzanp dan zot labiyman ek laparans. Me dapre rapor, serten i vin neglizan ler zot pe vwayaze avan e apre lasanble ouswa ler pe partisip dan bann aktivite lwazir apre sesyon lasanble sak zour. Nou laparans fizik, ki swa pandan lasanble oubyen lezot ler, i vreman fer lefe lo konman lezot dimoun i vwar pep Bondye. Vi ki nou met nou badz lasanble, nou devret toultan sanz dan en fason ki apropriye pour bann minis Kretyen. Sa i souvannfwa motiv lezot dimoun pour felisit nou e i donn nou loportinite pour donn en temwannyaz.—1 Kor. 10:31-33.
7. Ki lefe nou labiyman ek laparans i kapab annan lo lezot?
7 Zis parey en sourir amikal i amelyor laparans nou figir, pareyman ler nou labiyman ek laparans i byen annord, sa i onor sa mesaz ki nou pe anmennen ek sa lorganizasyon ki nou reprezante. Petet serten dimoun ki pou obzerv nou pandan Lasanble Distrik “Donn Bondye Laglwar” sa lannen pou anvi konnen akoz nou diferan e apre zot kapab dir: “Nou pou al avek zot, akoz nou’n antann [e vwar] ki Bondye i avek zot.” (Zeka. 8:23) Fotespere ki sakenn ant nou i montre nou profon respe pour Zeova par nou labiyman ek laparans.
[Bwat lo paz 5]
Montre en Laparans onorab
▪ Ler pe vwayaze
▪ Dan lasanble
▪ Pandan bann aktivite lwazir