Kwen kestyon

◼ Ki fason sanze ki apropriye kan nou pe vizit bann landrwa ki’n ganny dedye pour servis Zeova?

Partou dan lemonn, bann Lasal Rwayonm, Lasal Lasanble, ek bann biro brans i bann landrwa ki’n ganny dedye spesyalman pour servis Zeova. Sa bann landrwa i annan en laparans respektab parski zot senp, prop, e annord. I vreman diferan avek sa ki nou vwar dan sa lemonn kot Satan pe dirize. Kan nou vizit bann landrwa ki’n ganny dedye pour servis Zeova, i devret evidan ki nou son bann serviter e ki nou pe fer son lavolonte.

Konman Kretyen, nou fer tou nou posib pour “viv konman bann serviter Bondye” dan tou domenn. Sa i enkli annan en labiyman ek laparans respektab. (2 Kor. 6:3, 4) Nou bezwen osi annan en bon kondwit. Dan tou lokazyon nou labiyman ek laparans i devret reflekte sa dinite ek respe ki apropriye pour bann serviter Zeova. Sa i sirtou enportan kan nou pe vizit biro prensipal New York ek lezot biro brans dan lemonn.

Liv Organized to Do Jehovah’s Will i diskit lo lenportans pour annan en labiyman ek en laparans apropriye. I fer resorti sa nesesite pour abiy dan en fason modes, annan en laparans apropriye e en bon lapropte fizik ler nou partisip dan predikasyon e osi kan nou asiste renyon. Lo paz 138, paragraf 3, i dir: “Pa bliye, sa non Betel i vedir ‘Lakaz Bondye.’ Pour sa rezon alors, nou fason sanze, laparans ek kondwit i devret menm parey avek letan nou asiste renyon pour ladorasyon dan Lasal Rwayonm.” Sa standar onivo i devret ganny respekte par bann proklanmater Rwayonm ki vizit Betel lokalman oubyen dan en lot pei. Dan sa fason, bann viziter i demontre lapresyasyon ek respe apropriye pour sa landrwa.—Ps. 29:2.

Nou fason sanze i devret idantifye nou konman bann ki ador Bondye. (1 Tim. 2:10) En resanz ek en laparans respektab i kapab enfliyans lafason ki lezot i vwar vre ladorasyon. Me malerezman, nou’n remarke, ki serten frer ek ser kan zot vizit bann landrwa ki’n ganny dedye pour servis Zeova, zot tant pour sanz dan en fason ki pa konvenab, debraye, oubyen provokan. Sa kalite fason sanze pa apropriye pour en Kretyen pour nenport lokazyon. Dan tou laspe nou lavi Kretyen, nou determinen pour fer tou pour laglwar Bondye par gard sa standar onivo ki fer pep Bondye diferan avek sa lemonn.—Rom. 12:2; 1 Kor 10:31.

Alor, kan nou vizit biro prensipal ek biro brans New York ouswa lezot biro brans, ki swa en vizit ki ti’n deza plàn ouswa pandan ou vakans demann ou lekor: ‘Eski mon fason sanze ek laparans i modes, prop e konvenab pour sa landrwa ki mon pe al vizite? Eski i anmenn laglwar lo sa Bondye ki mon pe adore? Eski lezot pour santi zot anbarase oubyen ofanse par mon fason sanze?’ Par lafason ki nou sanze annou toultan “dan tou sa ki [nou] fer, fer loner lansennyman lo Bondye, nou Sover”!—Tit 2:10.