Demontre Modesti dan ou Resanz ek ou Laparans
1 En zournalis ti raporte ki “tou bann zonm, menm bann zenn garson, i met en kravat. Tou bann madanm ek bann fiy ki swa adolesan oubyen pli zenn, i met swa en rob oubyen en zip. Napa en dimoun ki’n met kannson jeans oubyen ki semiz i ouver dan likou. Tou dimoun i byen smart.” Ki kalite lafoul ki ti pe ganny dekrir? En miting politik? En levennman sportif? En konser mizikal? Sertennman non! I ti pe dekrir en group frer ek ser dan en gran lasanble lannen pase.
2 Dan en lot lasanble ki ti ganny fer dan en lot lavil, en zournalis ti donn sa deskripsyon lo en lafoul temwen: “Tou zonm i prop e met palto ek kravat. Bann madanm i sanz dan en fason modes me byen zoli.” En lot obzervater, en gard sekirite, ti deklare: “Zot bann dimoun ki konport zot byen, respektab, prop, e annord. Sa ki mon vwar i zoli. Dan sa monn ki ranpli avek keksoz sal, zot in reisi retir sa bann salte!” Vreman sa bann bon temwannyaz an nou faver! Eski pa nou rekonesan ki dimoun i koz an byen lo nou lasosyasyon frer? Byensir tou dimoun dan sa lafoul ti kontribye pour nou ganny bann bon rapor par zot laparans egzanpler.
3 Nou’n arive ganny rekonnet dan lemonn antye konman en group dimoun ki vreman diferan par nou laparans. (Mal. 3:18) Akoz? Parski nou swiv sa konsey Labib pour ‘abiy byen desaman, respektab, dan en fason konvenab e senp . . . ki apropriye pour bann dimoun ki relizye.’—1 Tim. 2:9, 10.
4 Ki ou endike par ou Resanz ek ou Laparans? Sa lenz ki nou mete e lafason ki nou met li i pas en mesaz kler lo nou—swa lo nou krwayans, latitid ek lentansyon. Stil ki nou swazir i dir ki nou ete e kwa ki nou reprezante. Annou pa zanmen promot kondwit ek fason panse degradan ki popiler dan sa monn. Nou pa devret enterese si tou dimoun pe sanz dan en serten stil me si sa stil i apropriye pour en dimoun ki dir i en minis Bondye. (Rom. 12:2) Olye swazir en laparans ki demontre en leta lespri endepandan oubyen ki endik en stil lavi imoral, nou anvi montre ki nou vreman “rann glwar Bondye.”—1 Pyer 2:12.
5 Parler, en dimoun ki nouvo, mank leksperyans, oubyen ki feb spirityelman i kapab aksepte nenport ki laparans ek lenz ki sa monn i promote san reflesir avan ki lenpresyon sa i pou anmennen lo Zeova ek son lorganizasyon. Nou tou nou kapab fer en egzaminasyon profon pour vwar si nou pa’n ganny enfliyanse par fason panse sa monn. Nou kapab apros en frer oubyen en ser ki matir spirityelman e demann en obzervasyon onnet lo nou stil lenz e lo nou laparans an zeneral e apre seryezman evalye bann sizesyon ki nou gannyen.
6 Serten i fasilman dakor ki zot devret fer atansyon konsernan lafason ki zot abiye ler zot pe asiste lasanble. Me apre zot abes zot standar pandan bann letan lib apre progranm lasanble. Toultan mentenir sa standar o nivo ki apropriye pour bann minis Kretyen. (2 Kor. 6:3, 4) Nenport landrwa ki nou ale dan piblik, nou badz lasanble ansanm avek nou lenz apropriye e nou laparans an zeneral i idantifye nou konman bann Temwen Zeova. Alor, nou labiyman i devret toultan byen aranze e modes, e ki i endike ki nou pa “fer parti lemonn.”—Zan 15:19.
7 Annou fer tou sa ki nou kapab dan sa Lasanble Distrik pour sa lannen “Bann Proklanmater Rwayonm zele” pour prouve ki nou “en pep sen pour Zeova [nou] Bondye.” Sa bon lenpresyon pou anmenn plis “laglwar ek repitasyon ek labote” pour Zeova.—Det. 26:19.
[Bwat lo paz 5]
Konman pour glorifye Zeova:
■ Abiy dan en fason ki apropriye pour en minis Bondye.
■ Evit bann stil ki imit leta lespri lemonn.
■ Demontre modesti, ki reflekte en bon zizman.