Fer kler Valer pratik

KI SWA ou pe koz avek en dimoun oubyen avek en gran lodyans, i pa saz pour prezimen ki sa bann ki pe ekoute pou enterese dan ou size zis akoz ou enterese ladan. Ou mesaz i enportan, me si ou pa arive fer kler son valer pratik, i probab ki ou pa pou kapab mentenir lentere ou lodyans pour en kantite letan.

Sa i osi leka avek en lodyans dan Lasal Rwayonm. Zot kapab ekoute ler ou servi en ilistrasyon oubyen leksperyans ki zot pa’n deza tande avan. Me dek ki ou koz konsernan bann keksoz ki zot deza konnen zot pa ekoute, sirtou si ou pa elabor lo sa ki zot deza konnen. Ou bezwen ed zot vwar akoz e konman sa ki ou pe dir i annan vre benefis pour zot.

Labib i ankouraz nou pour reflesir dan bann laspe pratik. (Prov. 3:21) Zeova ti servi Zan Batis pour diriz dimoun pour “ganny lasazes [pratik] parey bann dimoun zis.” (Lik 1:17) Sa i lasazes ki ganny anrasinen dan lakrent saliter pour Zeova. (Pson. 111:10) Sa bann ki apresye sa lasazes i ganny led pour reisi fer fas avek lavi konmela e pour sezi vre lavi, lavi eternel ki pe vini.—1 Tim. 4:8; 6:19.

Fer en Diskour ki annan Valer pratik. Pour fer ou diskour annan valer pratik, ou bezwen mazin seryezman konsernan ou lodyans e non pa lo zis ou lenformasyon. Pa mazin zot senpleman konman en group dimoun. Sa group i ganny konpoze par bann endividi ek bann fanmiy. I kapab annan bann ki tre zenn, adolesan, adilt, ek serten ki aze. I kapab annan bann nouvo ki enterese osi byen bann ki ti konmans servi Zeova avan ki ou ti ne. Serten i kapab spirityelman mir; petet lezot i ankor pe ganny bokou enfliyanse par serten latitid ek pratik lemonn. Demann ou lekor: ‘Konman sa lenformasyon ki mon pe al prezante i kapab benefisye sa bann dan lodyans? Konman ki mon kapab ed zot pour sezi sa pwen?’ Ou kapab deside pour donn latansyon prensipal lo zis enn oubyen de kalite group dimoun ki’n ganny mansyonnen pli boner. Sepandan, pa oubliy lezot konpletman.

Ki ou pou fer si ou ganny demande pour diskit en lansennyman debaz dan Labib? Konman ki ou kapab fer en tel diskour annan valer pour en lodyans ki deza krwar sa lansennyman? Esey ranforsi zot konviksyon ladan. Konman? Par rezonn lo levidans Biblik ki siport sa lansennyman. Ou kapab osi aprofondi zot lapresyasyon pour sa lansennyman Labib. Sa i kapab ganny fer par montre konman ki sa lansennyman i an armoni avek lezot laverite Labib e avek personnalite Zeova. Servi bann legzanp—bann leksperyans si i posib—ki montre konman ki konpreansyon lo sa serten lansennyman in benefisye sa bann dimoun e in enfliyans zot pwenn-vi lo lavenir.

Pa zis fer en laplikasyon pratik avek detrwa remark bref dan konklizyon ou diskour. Depi okonmansman ou diskour, sak dimoun dan ou lodyans i devret santi ki “sa i enplik pour mwan.” Apre ki ou’n etablir sa fondasyon, kontinyen fer laplikasyon pratik anmezir ki ou devlop sak pwen prensipal dan parti prensipal ou diskour osi byen dan konklizyon.

Ler pe fer laplikasyon, fer sir pour fer li dan en fason ki an armoni avek bann prensip Labib. Ki sa i vedir? Savedir dan en fason ki demontre lanmour e konprenezon pour lezot. (1 Pyer 3:8; 1 Zan 4:8) Menm kan i ti pe fer fas avek bann problenm difisil an Tesalonik, zapot Pol ti fer sir ki i fer resorti bann laspe pozitif, progre spirityel son bann frer ek ser Kretyen laba. Deplis konsernan sa size ki i ti pe diskite, i ti eksprim konfyans ki zot ti pou anvi fer sa ki byen. (1 Tesa. 4:1-12) Pa i vreman en bon legzanp pour imite!

Eski ou diskour i annan pour bi stimil partisipasyon pour pres e ansenny sa bon nouvel avek lezot? Batir lantouzyasm ek lapresyasyon pour sa privilez. Sepandan, pandan ki ou pe fer sa, gard antet ki tou dimoun pa pou fer menm kantite dan sa travay, e Labib i pran sa an konsiderasyon. (Mat. 13:23) Pa met en fardo lo ou bann frer ek ser par fer zot santi koupab. Ebre 10:24 i ensit nou pour “pous kanmarad pour annan lanmour e fer sa ki byen.” Si nou pous zot pour annan lanmour, bann aksyon ki baze lo en bon motif pou swiv. Olye rod enpoz lobeisans, rekonnet ki sa ki Zeova i anvi se pour nou promot “lobeisans par lafwa.” (Rom. 16:26) Avek sa antet, nou rod pour fortifye lafwa—pour nou menm e pour nou bann frer ek ser.

Ed lezot pour vwar Valer pratik nou Mesaz. Kan ou pres avek lezot, pa manke pour fer resorti valer pratik sa bon nouvel. Pour kapab fer sa ou bezwen pran kont sa ki enportan pour bann dimoun dan ou teritwar. Konman ki ou kapab konn sa? Ekout nouvel lo radyo oubyen televizyon. Get premye paz lo zournal. Osi esey fer dimoun koze, e ekoute ler zot donn zot pwenn-vi. Ou kapab dekouver ki la konmela zot pe lite avek bann problenm dan lavi toulezour—perdi en lanplwa, pey lón, maladi, lanmor en manm fanmiy, danze kont krim, lenzistis avek en dimoun dan lotorite, en maryaz kase, gard bann zenn anba kontrol, ek lezot. Eski Labib i kapab ed zot? Sirman.

Ler ou pe konmans en konversasyon, i tre probab ki ou pou annan en size antet. Sepandan, si ou detekte ki sa dimoun i annan en lot keksoz ki pe trakas li, dan plas koz lo ou size, pa ezite pour diskit sa problenm si ou kapab fer li, oubyen ofer pour retourn avek serten lenformasyon ki kapab ed li. Byensir, nou evite ‘mel dan zafer ki pa konsern nou,’ me nou kontan partaz avek lezot bann konsey pratik ki Labib i ofer. (2 Tesa. 3:11) Definitivman, sa ki pou enpresyonn dimoun plis i bann konsey Labib ki afekte zot prop lavi.

Si dimoun pa kapab vwar konman ki nou mesaz i afekte zot personnelman, zot kapab vitman termin sa konversasyon. Menm si zot les nou koze, me nou pa arive montre zot valer pratik sa size i kapab fer ki nou mesaz pou annan pti gin lefe lo zot lavi. Parkont, si nou fer kler valer pratik sa mesaz, nou diskisyon i kapab vin sa keksoz ki fer sa bann dimoun fer bann sanzman enportan dan zot lavi.

Ler pe diriz bann letid Labib, kontinyen fer resorti laplikasyon pratik. (Prov. 4:7) Ed bann etidyan pour konpran bann konsey, prensip, ek bann legzanp Biblik ki montre zot konman pour mars dan semen Zeova. Met lanfaz lo bann benefis ki arive par fer sa. (Iza. 48:17, 18) Sa pou pous bann etidyan pour fer bann sanzman neseser dan zot lavi. Batir dan zot lanmour pour Zeova e en dezir pour fer li plezir, e les motivasyon pour aplik konsey dan Parol Bondye sorti dan zot prop leker.