Ferm me avek en bon Zizman

BON zizman i sa abilite pour azir avek lezot dimoun san fer zot ofanse initilman. I enplik konnen konman e kan pour dir serten keksoz. Sa i pa vedir fer en konpromi lo sa ki drwat oubyen deform bann fe. En bon zizman pa devret ganny konfize avek lafreyer zonm.—Prov. 29:25.

Fri lespri i fourni pli bon fondasyon pour nou kapab annan en bon zizman. An konsekans, en dimoun ki ganny motive par lanmour pa anvi irit lezot; i anvi ed zot. En dimoun ki annan labonte ek ladouser i zantiy dan son fason fer keksoz. Sa dimoun ki rod lape i fer fason pour promouvwar bann bon relasyon avek lezot. Menm ler dimoun i azir dan en fason brit, en endividi ki annan pasyans i reste kalm.—Gal. 5:22, 23.

Sepandan, dan nenport ki fason ki mesaz Labib i ganny prezante, serten dimoun pou ofanse anver sa mesaz. Akoz move kondisyon leker lamazorite Zwif dan premye syek, Zezi Kri ti vin pour zot en “ros ki pou fer dimoun ganny konnyen, I en ros ki pou fer dimoun tonbe.” (1 Pyer 2:7, 8) An konneksyon avek son travay predikasyon Rwayonm, Zezi ti dir: “Mon’n vin anmenn en dife lo later.” (Lik 12:49) E sa mesaz Rwayonm Zeova, ki enkli sa nesesite pour imen rekonnet souvrennte zot Kreater, i kontinyen vin en size irzan ki limanite pe fer fas avek. Bokou dimoun i ofanse avek sa mesaz ki Rwayonm Bondye pou byento retir sa prezan sistenm mesan. Kantmenm sa, par lobeisans pour Bondye, nou kontinyen prese. Toutfwa, anmezir ki nou fer sa, nou gard antet sa konsey Labib: “Fer tou sa ki depann lo ou pour viv anpe avek tou dimoun.”—Rom. 12:18.

Montre en bon Zizman ler pe prese. I annan bokou sirkonstans kot nou koz avek lezot lo nou lafwa. Byensir, nou fer sa ler nou dan predikasyon, me nou osi rod loportinite apropriye ler nou avek bann manm fanmiy, koleg travay, ek kanmarad lekol. Dan tou sa bann sitiasyon, en bon zizman i esansyel.

Si nou prezant sa mesaz Rwayonm dan en serten fason ki lezot i santi ki nou pe reprimann zot, zot kapab pa anvi ekout nou. Ler zot pa’n demann led e petet zot santi ki zot pa bezwen led, zot kapab ofanse si zot santi ki ou pe dir zot ki zot bezwen aranz zot lavi. Ki mannyer nou kapab evite donn sa move lenpresyon? Aprann sa lar pour fer konversasyon dan en fason amikal i kapab ede.

Esey konmans konversasyon par soulev en topik ki enteres sa lot dimoun. Si sa dimoun i en manm fanmiy, en koleg travay, oubyen en kanmarad lekol, petet ou deza konnen kwa ki enteres li. Menm si ou pa’n zanmen rankontre sa dimoun avan, ou kapab soulev en topik ki ou’n antann dan nouvel oubyen lir dan zournal. Souvan-d-fwa sa bann topik i endike kwa ki dan lespri bokou dimoun. Ler ou pe prese port-an-port, obzerv byen. Bann dekorasyon lakaz, bann zouzou dan lari, ek bann stiker lo loto devan lakour i kapab fourni lendikasyon anplis konsernan lentere sa dimoun. Ler sa dimoun i vin kot laport, ekoute anmezir ki i eksprim son lekor. Sa ki i dir pou swa konfirm oubyen koriz ou konklizyon konsernan son lentere ek pwenn-vi e pou donn lendikasyon anplis konsernan sa ki ou bezwen pran an konsiderasyon pour kapab donn en temwannyaz.

Anmezir ki sa konversasyon i prolonze, partaz bann pwen dan Labib ek bann piblikasyon baze lo Labib ki annan en relasyon avek sa topik. Me pa domin sa konversasyon. (Ekle. 3:7) Si i pare pour partisipe, enplik sa dimoun dan sa diskisyon. Montre lentere anver son bann pwenn-vi ek lopinyon. Son bann pwenn-vi i kapab donn ou bann lendikasyon ki ou bezwen pour ou kapab montre en bon zizman.

Avan ki ou dir okenn keksoz, reflesir ki mannyer sa lot dimoun pou konsider sa ki ou dir. Proverb 12:8 i loue en “labous pridan.” Sa lekspresyon Ebre ki ganny servi la i asosye avek tel konsep parey apersi ek pridans. Alor, en bon zizman i enplik fer byen atansyon kan nou koze akoz nou’n reflesir oprofon lo en keksoz pour kapab azir dan en fason saz. Dan sa menm Proverb dan verse 18 i averti kont “koz san reflesir parey bann kou lepe.” I posib pour siport laverite Labib san ofans lezot.

Senpleman montre disernman dan bann mo ki ou swazir i kapab ed ou pour evit kree okenn baryer initil. Si ler ou servi sa mo “Labib” i kree en lobstak dan lespri en dimoun, ou kapab servi en lekspresyon parey “Lekritir sen” oubyen “en liv ki ozordi ganny pibliye dan plis ki 2,000 langaz.” Si ou fer referans avek Labib, ou kapab demann sa dimoun son lopinyon lo la e apre pran sa ki i’n dir an konsiderasyon pandan larestan ou konversasyon.

Pour kapab demontre en bon zizman i souvan enplik determin sa bon moman pour dir keksoz. (Prov. 25:11) Petet ou pa dakor avek tou keksoz ki sa dimoun i dir, me napa okenn nesesite pour konteste avek tou pwenn-vi ki pa baze lo Labib ki sa dimoun i eksprimen. Pa esey dir sa dimoun tou keksoz en sel fwa. Zezi ti dir son bann disip: “Mon annan ankor en kantite keksoz pou dir zot, me zot pa kapab siport tousala pour le moman.”—Zan 16:12.

Ler i posib, felisit senserman sa bann dimoun ki ou koz avek. Menm ler sa dimoun i argimant bokou, ou kapab felisit li pour annan en serten pwenn-vi. Zapot Pol ti fer sa ler i ti pe koz avek bann filozof an Lareopaz, Atenn. Bann filozof ti pe “diskit avek Pol” dan en fason argimante. Konman i ti pou fer pase son pwenn-vi san ofans lezot? Pli boner i ti obzerv bokou lotel ki zot ti’n fer pour zot bondye. Olye kondann bann dimoun Atenn pour zot ladorasyon zidol, avek en bon zizman i ti felisit zot ki zot ti bann dimoun byen relizye. I ti dir: “Mon remarke ki dan tou sans zot en bann dimoun byen relizye.” Sa lapros ti ouver semen pour li prezant son mesaz konsernan sa vre Bondye. E rezilta, serten ti vin krwayan.—Akt 17:18, 22, 34.

Pa tro eksite ler bann lobzeksyon i ganny souleve. Reste kalm. Vwar sa bann keksoz konman bann loportinite pour konpran pli byen panse sa dimoun. Ou kapab remersi li pour eksprim son pwenn-vi. Me si i vitman dir: “Mwan, mon annan mon larelizyon?” Avek en bon zizman ou kapab demande: “Eski ou’n toultan en dimoun relizye?” Apre ki i’n reponn, azoute: “Eski ou panse ki en zour limanite pou ini dan en sel relizyon?” Sa i kapab ouver semen pour plis konversasyon.

Annan en pwenn-vi apropriye lo nou menm i kapab ed nou pour annan en bon zizman. Nou konpletman konvenki ki bann fason Zeova i bon e drwat e ki son Parol i totalman vre. Nou koz avek konviksyon konsernan sa bann keksoz. Me napa okenn rezon pour nou konsider nou lekor pli zis ki lezot. (Ekle. 7:15, 16) Nou rekonesan pour konn laverite e pour rezwir benediksyon Zeova, me nou byen konnen ki nou annan son laprouvasyon akoz son faver ki nou pa merite ek nou lafwa dan Kris, me non pa akoz nou prop ladrwatir. (Efe. 2:8, 9) Nou rekonnet sa nesesite pour kontinyen ‘egzamin nou lekor pour war si nou pe gard nou lafwa. Teste nou lekor.’ (2 Kor. 13:5) Alor ler nou koz avek dimoun konsernan sa lenportans pour konform avek sa ki Bondye i ekspekte, nou aplik avek limilite konsey Labib dan nou prop lavi. Nou napa sa drwa pour ziz nou prosen. Zeova in “plas drwa zizman dan lanmen son Garson,” e se devan son tribinal ki nou devret reponn pour sa ki nou fer.—Zan 5:22; 2 Kor. 5:10.

Avek Manm Fanmiy ek Konpanyon Kretyen. Pa zis dan predikasyon ki nou devret servi en bon zizman. Vi ki en bon zizman i en lekspresyon fri lespri Bondye, nou devret osi montre li dan lakour ler pe azir avek bann manm fanmiy. Lanmour pou pous nou pour montre lentere pour santiman lezot. Mari Larenn Ester pa ti en adorater Zeova, me Ester ti demontre respe pour son mari e servi bokou disernman, ler i ti pe prezant bann size ki ti annan pour fer avek bann serviter Zeova. (Ester, sapit 3-8) Dan serten sirkonstans, servi en bon zizman anver bann manm fanmiy ki pa Temwen i kapab demande ki nou les nou kondwit, olye ki en leksplikasyon nou krwayans, atir zot ver laverite.—1 Pyer 3:1, 2.

Pareyman, lefe ki nou konn byen bann manm kongregasyon i pa vedir ki nou kapab mank respe oubyen pa zantiy avek zot. Nou pa devret rezonnen ki parski zot matir, zot pou kapab aksepte sa. Nou pa devret ni menm ekskiz nou lekor an dizan: “A, sa i fason ki mon ete.” Si nou dekouver ki lafason ki nou eksprim nou lekor i ofans lezot, nou devret determinen pour sanze. Nou “gran lanmour pour kanmarad” i devret pous nou pour “fer dibyen tou dimoun, sirtou nou bann frer dan lafwa.”—1 Pyer 4:8, 15; Gal. 6:10.

Ler pe koz avek en Lodyans. Sa bann ki koz devan lo lestrad i devret osi montre en bon zizman. En lodyans i konsiste avek dimoun ki sorti dan diferan nivo lavi ek sirkonstans. Zot dan diferan staz zot devlopman spirityel. Petet serten i fer premye fwa ki zot vin Lasal Rwayonm. Lezot i kapab pe pas atraver en moman ladetres ki sa orater pa konnen. Kwa ki kapab ed en orater pour evite ofans son lodyans?

An armoni avek konsey ki zapot Pol ti donn Tit, fer li ou lobzektif pour ‘ki ou pa malparl personn, . . . e montre ou zanmi e poli avek tou dimoun.’ (Tit 3:2) Evite imit lemonn par servi bann term ki zot servi pour degrad dimoun en lot ras, langaz, oubyen nasyonalite. (Rev. 7:9, 10) Diskit bann legzizans Zeova avek fransiz e montre lasazes pour aplik sa bann keksoz; me evite kritik severman bann ki pa ankor konmans mars totalman dan semen Zeova. Plito, ankouraz tou pour konpran lavolonte Bondye e pour fer sa ki fer Bondye plezir. Adousi bann mo konsey avek santiman ek felisitasyon senser. Par lafason ki ou koze ek ton ou lavwa, transmet lafeksyon fraternel ki nou tou nou devret annan pour kanmarad.—1 Tesa. 4:1-12; 1 Pyer 3:8.