Letan egzakt, byen proporsyonnen

KANTMENM lanfaz prensipal i devret ganny mete lo kalite ou lansennyman, ou bezwen osi donn latansyon lo letan ki’n ganny dezinyen pour ou diskour. Nou bann renyon i ganny progranmen pour konmans e termin en ler spesifik. Pour akonpli sa i demann korporasyon tou bann ki annan en par lo progranm.

Dan letan Biblik, pwenn-vi dimoun lo lavi ti diferan avek sa ki i ete ozordi dan bokou landrwa. Letan ti ganny eksprimen dan bann fason apepre parey “ver 9 er” oubyen “apepre 4 er apremidi.” (Mat. 20:3-6; Zan 1:39) Ti rarman annan en rezon pour enkyet konsernan letan presi pour bann aktivite toulezour. Ozordi, dan serten parti lemonn, dimoun i ankor konsider letan dan sa menm fason.

Toutfwa, kantmenm koutim lokal oubyen preferans personnel i kapab fer dimoun pa tro fatig zot avek ler, nou kapab benefisye par aprann donn li latansyon apropriye. Ler plizyer dimoun pe partisip dan en progranm, sakenn i bezwen pran kont sa letan ki’n ganny dezinyen pour son partisipasyon. Sa prensip “fer tou keksoz byen e avek lord” i kapab ganny byen aplike konsernan letan ki ganny dezinyen avek nou partisipasyon dan renyon.—1 Kor. 14:40.

Konman pour respekte Letan. Se preparasyon ki enportan. Souvan, bann orater ki depas letan, se bann ki’n neglize pour prepar byen. Petet zot annan tro bokou konfyans dan zot lekor. Oubyen zot kapab senpleman anvoy preparasyon lo dernyen minit. Baz prensipal pour respekte letan se pour annan lapresyasyon pour ou partisipasyon e en volonte pour prepar byen.

Eski ou partisipasyon i en ekspoze ki enkli lektir? Premyerman, reviz Letid 4 a 7, ki enplik fasilite koze, fer poz, lanfaz, e aksantye bann lide prensipal. Apre, aplik sa konsey anmezir ki ou lir aotvwa lenformasyon ki ou’n resevwar pour lir. Gete ki kantite letan ou pran. Eski ou bezwen lir pli vit pour kapab fini dan letan dezinyen? Ogmant ou vites lo bann porsyon mwen enportan, me kontinyen fer poz e pour lir pli dousman pour aksantye bann lide enportan. Egzers plizyer fwa. Anmezir ki ou fasilite koze i amelyore, i pou pli fasil pour kontrol ou letan.

Eski ou pou servi not pour koze? I pa neseser pour fer bann gran not—ki ou plan i vin preski en maniskri—zis pour ou fer sir ki ou pa depas letan. Letid 25 in ed ou aprann en pli meyer fason. Gard antet sa senk pwen: (1) Prepar bon lenformasyon, me pa tro bokou. (2) Fer sir ki bann lide prensipal i kler dan ou lespri, me pa aprann parker bann fraz antye. (3) Endik lo ou plan ki kantite letan ou deside servi pour sak parti ou diskour oubyen ki kantite letan ki’n devret pase ler ou ariv a serten pwen. (4) Ler ou pe prepare, konsider bann detay ki kapab ganny retire si ou trouve ki ou pe al depas letan. (5) Egzers ou prezantasyon.

Repetisyon i enportan. Anmezir ki ou repete, vey letan pour sak parti ou diskour. Repet ou diskour plizyer fwa ziska ki ou kapab prezant ou diskour antye dan sa letan dezinyen. Pa esey met tro bokou lenformasyon. Gard enpe letan anplis parski ler ou pe fer ou prezantasyon devan en lodyans i kapab pran enpe plis letan ki ler ou ti repet li an prive.

Longer proporsyonnen sak Parti. Pa depas letan i relye etrwatman avek proporsyon apropriye pour bann diferan parti en diskour. Dedye plis letan pour prezant parti prensipal sa diskour. Se la kot bann pwen prensipal i ete. Sa lentrodiksyon i devret zis ase long pour akonpli sa trwa lobzektif ki ganny diskite dan Letid 38. Parti prensipal sa diskour pa devret tro long ki napa ase letan pour en konklizyon efikas, an armoni avek Letid 39.

Ou zefor pour respekte letan pou fer ou diskour pli meyer e pou demontre ou respe pour lezot ki annan en partisipasyon lo progranm osi byen pour kongregasyon an zeneral.