Kwen Kestyon

◼ Konman nou kapab fer sir ki bann renyon kongregasyon pa depas letan?

Letan i pas vit ler nou pe fer en bon keksoz avek nou bann zanmi. Pour sa rezon, i kapab difisil pour fer bann size dan letan ki’n ganny progranmen. Kwa ki kapab ed nou pour fini nou prezantasyon aler?

Konmans aler. Ler kongregasyon antye i zwenn ansanm, i pou byen pour envit lodyans pour pran zot plas enn ou de minit avan. Koumsa renyon i kapab konmans ler ki’n ganny progranmen e dan en fason annord. (Ekle. 3:1) Bann renyon ki annan en pti gin dimoun, tel parey randevou predikasyon, pa devret konmans an retar pour esper bann ki kapab ariv tar.

Prepar oprofon. En fason pour byen respekte letan se par fer preparasyon davans. Gard lobzektif ou size klerman antet. Idantifye e fer resorti bann pwen prensipal. Pa les ou ganny distrer avek bann pti detay. Gard ou prezantasyon senp. Si sa size i enkli bann demonstrasyon ouswa entervyou, repet zot davans. Otan ki posib, tyek ou letan ler ou pe egzers li aotvwa.

Organiz ou lenformasyon. Ki swa ou size i en diskour ouswa en diskisyon avek lodyans, i pou itil pour diviz ou lenformasyon par seksyon. Deside ki kantite letan ou pou pase lo sak seksyon, e ekrir sa letan akote ou bann not. Apre tyek ou letan pandan ki ou pe prezant ou size. Dan diskisyon avek lodyans, evite demann lodyans pour fer tro bokou komanter dan lentrodiksyon ki apre ou pou bezwen degaze pour diskit lenformasyon pli oprofon plitar. Bann ki kondwir Letid Latour Veyer, i devret kit ase letan pour egzamin bwat revizyon alafen letid. Zot devret osi fer atansyon pour pa servi letan ki’n ganny progranmen pour kantik final ek lapriyer.

Fini aler. Si en renyon i annan plizyer size, tel parey Renyon Servis, sak orater i devret konsyan ler ki son size i devret konmanse e terminen. Kwa ki kapab ganny fer si renyon i paret pa pou fini aler? Enn oubyen plis frer ki pe partisip lo progranm i kapab redwir lakantite letan zot prezantasyon par kouver selman bann pwen prensipal e elimin serten detay. Abilite pour fer sa i montre ki sa frer i en bon ansennyan.

Konman lodyans, nou kapab ed sa frer ki pe kondwir par gard nou bann larepons kourt e adapte avek size ki pe ganny diskite. Alors, nou tou, nou kapab kontribye pour ki bann renyon i deroul “byen e avek lord.”—1 Kor. 14:40.