Ki mannyer pour prepar Renyon Servis
1. Ki lobzektif Renyon Servis e ki mannyer nou kapab tir plis byenfe avek sa renyon?
1 Renyon servis in ganny prepare pour fer nou byen ekipe pour pres dan en fason efikas. Son lobzektif prensipal i pour pres sa bon nouvel Rwayonm, fer disip, e anons egzekisyon zizman Bondye ki pe aprose. (Mat. 28:20; Mark 13:10; 2 Pyer 3:7) Sa renyon enportan i anmenn plis byenfe pour nou kan nou’n byen prepare e pare pour partisipe.
2. Ki mannyer nou kapab prepare pour ekout en diskour?
2 Diskour: Normalman, sours lenformasyon pour en diskour i ganny mete dan lenstriksyon pour bann orater. Ou kapab revwar sa lenformasyon ki’n ganny dezinyen, enkli bann verse ki’n ganny mete konman referans e mazin lo ki mannyer ou kapab aplik sa lenformasyon dan prediksyon.
3. Ki nou kapab fer pour prepar pour en diskisyon kestyon ek larepons?
3 Diskisyon par kestyon ek larepons: Sa parti pou ganny fer en pe parey letid Latour Veyer. I pou konmans avek en lentrodiksyon e fini avek en konklizyon bref. Souliny bann pwen enportan dan sak paragraf e prepare pour donn bann bon komanter bref.
4. Ki mannyer nou kapab prepar pour en diskisyon avek lodyans?
4 Diskisyon avek lodyans: Sa parti pou ganny prezante konman en diskour, me sa orater pou demann lodyans pour partisipe. Si ou souliny bann pwen prensipal e get bann verse ki ganny mete konman referans, ou pou kapab fer komanter kan bann kestyon i ganny demande. Sa frer ki prezant sa parti pou fer tou zefor pour demann partisipasyon lodyans kan i pe devlop bann pwen prensipal.
5. Kwa ki pou ed nou pour tir plis byenfe avek bann demonstrasyon?
5 Demonstrasyon: Serten parti pou enkli bann demonstrasyon ki adapte dan lavi tou le zour pour montre ki mannyer sa lenformasyon ki pe ganny egzaminen i kapab ganny servi dan teritwar lokalman. Bann ansyen, proklanmater eksperyanse oubyen pionye pou ganny demande pour partisipe dan sa bann demonstrasyon. Dan ou preparasyon pour sa parti ou kapab reflesir lo ki mannyer sa size pou ganny prezante. Kan en sizesyon dan Nou Minister Rwayonm i ganny servi pour fer en demonstrasyon, reflesir lo ki mannyer ou kapab aplik e adapte sa prezantasyon avek diferan met lakour. Fer sir ki ou annan sa piblikasyon oubyen magazin ki pou ganny servi dan sa demonstrasyon. Pandan ou letid fanmir, si ou egzers serten sa bann prezantasyon, ou pou kapab tir bokou byenfe.
6. Ki rezon nou annan pour prepar Renyon Servis?
6 Renyon Servis i pli gou kan nou’n pare e pe espere pour ganny sa bon lenstriksyon ki pou ganny prezante. Kan nou fer sa, sa pou fer ki nou pou kapab pli byen ankouraz kanmarad. (Rom. 1:11, 12) Si nou pran letan pour prepar Renyon Servis, nou pou pli byen ekipe pour akonplir nou minister.—2 Tim. 3:17.