Bann renyon predikasyon ki atenn zot lobzektif

1. Ki bi bann renyon predikasyon?

¹ En fwa, Zezi ti zwenn ansanm avek 70 son bann disip avan ki zot ti konmans prese. (Lik 10:1-11) I ti ankouraz zot par fer zot rapel ki zot pa ti pou tousel e ki zot ti pe ganny dirize par sa “Propriyeter rekolt,” Zeova. I ti osi donn zot lenstriksyon ki ti form zot pour fer sa travay e i ti anvoy zot “de par de.” Ozordi, bann renyon ki nou gannyen zis avan ki nou al prese i annan menm lobzektif, setadir pour ankouraz, form e organiz nou.

2. Konbyen letan en renyon predikasyon i devret dire?

² Konmela, en renyon predikasyon i sipoze 10 a 15 minit, sa i enkli organiz bann group, donn teritwar e fer lapriyer. Me nou pe ganny bann azisteman. Konmansman Avril, en renyon predikasyon pou dire ant senk a set minit. Ler renyon predikasyon i ganny fer zis apre enn nou bann renyon prensipal, i devret pli kourt ankor akoz bann ki pe asiste sa renyon predikasyon in deza ganny sans pour tann bann zoli diskisyon lo Labib. Bann renyon predikasyon ki pli kourt pou ed nou tou pour pas plis letan dan predikasyon. An plis, si bann pionye oubyen bann proklanmater in deza konmans prese avan sa renyon predikasyon, zot aktivite predikasyon pa pou bezwen ganny enteronpe pour lontan.

3. Ki mannyer bann renyon predikasyon i devret ganny organize pour pli ed bann proklanmater?

³ Bann renyon pour predikasyon i devret ganny organize dan en fason ki bann proklanmater pou pli benefisye. Dan plizyer kongregasyon, i annan en lavantaz ler bann group predikasyon i zwenn sakenn pour zot, olye ki tou i zwenn ansanm dan menm landrwa. Sa i kapab fer li pli fasil pour bann proklanmater ariv dan sa landrwa kot renyon predikasyon pe fer e petet dan sa teritwar. Bann proklanmater pou kapab ganny organize pli vitman e i kapab fer li pli fasil pour bann sirveyan group donn plis latansyon bann proklanmater dan son group. Dapre sirkonstans lokal, konsey ansyen i kapab vwar kwa ki pli meyer. Tou proklanmater i devret konnen kote e avek lekel ki zot pou travay avan ki nou konklir sa renyon predikasyon avek lapriyer.

4. Akoz bann renyon predikasyon i pa devret ganny konsider mwen enportan ki bann lezot renyon?

⁴ I osi enportan parey lezot renyon kongregasyon: Vi ki bann renyon predikasyon i ganny fer pour bann ki pe al prese, alor pa tou dimoun dan kongregasyon ki pou asiste. Kantmenm sa, i pa vedir ki zot devret ganny pran alalezer oubyen ganny konsidere konman mwen enportan ki bann lezot renyon kongregasyon. Zis parey bann lezot renyon, bann renyon predikasyon i en provizyon sorti kot Zeova ki donn nou sa loportinite pour pous kanmarad pour annan lanmour e fer sa ki byen. (Ebr. 10:24, 25) Alor, sa enn ki diriz group i devret byen prepare pour ki sa diskisyon i onor Zeova e benefisye bann ki pe asiste. Bann proklanmater ki pe sorti dan predikasyon i devret fer en zefor pour asiste, si i posib.

Bann renyon predikasyon i pa devret ganny pran alalezer oubyen ganny konsider mwen enportan ki bann lezot renyon kongregasyon

5. (a) Ki rol sirveyan servis i annan konsernan laranzman pour bann renyon predikasyon? (b) Ki mannyer en ser i devret diriz en renyon predikasyon?

⁵ Preparasyon par sa enn ki pe diriz group: Pour en dimoun prepar li byen pour prezant en diskour, i bezwen ganny sa ekspoze byen davans. Sa i osi aplike pour bann renyon predikasyon. Byensir, ler en group i zwenn dapre laranzman son group predikasyon, bann sirveyan group oubyen zot asistan i diriz sa renyon pour zot group. Par kont, ler tou group predikasyon pou zwenn ansanm, sirveyan servis pou swazir en frer pour diriz sa group. Serten sirveyan servis i donn en progranm avek tou bann ki pe diriz group e osi met en kopi lo bord lenformasyon. Sirveyan servis i devret servi son bon zizman ler i pe swazir bann ki pou diriz group. I osi bezwen gard antet, ki kalite sa bann renyon pou depan lo abilite ki sa bann ki pe diriz group i annan pour ansennyen e organize. Si i arive ki serten zour pandan lasemenn napa okenn ansyen, asistan ministeryel oubyen en frer batize ki disponib pour diriz renyon predikasyon, sirveyan servis i devret konfye sa responsabilite avek en ser batize ki kalifye.—Vwar sa lartik “Kan en ser i bezwen diriz renyon predikasyon.”

6. Akoz i enportan pour sa enn ki diriz group prepar byen?

⁶ Ler nou ganny en ekspoze pour Lekol Minister Teokratik oubyen en parti Renyon Servis pour fer, nou pran li o serye e nou prepar li byen. Laplipar parmi nou, pa ti pou zanmen esper ler nou pe al renyon pour konmans mazin lo ki nou pou al dir. Diriz en renyon predikasyon i devret ganny vwar dan menm fason. Vi ki la aprezan bann renyon predikasyon pou pli kourt, en bon preparasyon i sirtou enportan pour ki sa renyon i atenn son bi e osi fini a ler. En bon preparasyon i osi enkli pran kart teritwar davans.

7. Ki serten keksoz ki sa enn ki diriz group i kapab diskit lo la?

⁷ Kwa ki pou ganny diskite: Vi ki sirkonstans sak teritwar i diferan, lesklav fidel pa’n donn nou en plan pour sak renyon predikasyon. Sa bwat ki annan pour tit “Pandan en renyon predikasyon, ou kapab diskit lo” i donn serten sizesyon. An zeneral, sa renyon i devret ganny fer konman en diskisyon. Detanzaot, i kapab enkli en demonstrasyon ki’n ganny byen prepare oubyen en video apropriye lo jw.org. Kan i pe prepar pour en renyon predikasyon, sa enn ki diriz group i devret mazin lo kwa ki pou ankouraz e ed bann ki pe sorti dan predikasyon sa zour.

Kan nou prepare pour en renyon predikasyon, sa enn ki diriz group i devret mazinen lo kwa ki pou ankouraz e ed bann ki pe sorti predikasyon sa zour

8. Kwa ki kapab pli efikas pour diskite pandan bann renyon predikasyon Sanmdi ek Dimans?

⁸ Par egzanp, Sanmdi laplipar proklanmater i ofer Latour Veyer ek Awake! Bokou proklanmater ki al dan predikasyon Sanmdi pa sorti pandan lasemenn, alor zot kapab ganny difikilte pour rapel sa prezantasyon ki zot ti pas lo la pandan Ladorasyon Fanmir. Alor petet i pou en bon lide pour sa enn ki diriz group repas lo enn sa bann prezantasyon dan Nou Minister Rwayonm. Bann lezot opsyon i enkli diskite lo ki mannyer pour servi en lensidan ki’n pase dan nouvel lokal, en levennman oubyen en lafet, dan en prezantasyon pour ofer bann magazin. Ou kapab osi diskit lo ki mannyer pour prepare pour en retourn vizit si sa met lakour in aksepte sa magazin. Dan Dimans, sa enn ki diriz group i kapab swazir pour fer en prezantasyon sa piblikasyon ki pe ganny ofer pour sa mwan. Bann piblikasyon letid tel parey brosir Bon Nouvel, Ekout Bondye e viv pour touzour ek liv Ki Labib i vreman dir? i kapab ganny ofer nenport ki zour, alors sa enn ki diriz group i kapab montre ki mannyer enn sa bann piblikasyon i kapab ganny ofer.

9. Kwa ki kapab ganny diskite pandan sa wikenn kan nou pe fer en kanpanny spesyal?

⁹ Si kongregasyon pe fer en kanpanny spesyal sa wikenn, sa enn ki diriz group i kapab egzamin lo ki mannyer pour ofer sa magazin ensi ki sa lenvitasyon oubyen sa trak, oubyen i kapab diskit lo ki pou fer si sa met lakour i montre lentere. En lot opsyon se pour partaz bann leksperyans ki fer resorti lenportans bann tel kanpanny.

10, 11. Akoz ler en proklanmater i fer en bon preparasyon i ede pour fer renyon predikasyon deroul byen?

¹⁰ Preparasyon par bann proklanmater: Bann proklanmater i osi zwe en rol pour fer sa renyon deroul byen. Ler zot prepar davans pour predikasyon, petet pandan Ladorasyon Fanmir, zot pou annan en keksoz pour partaze avek lezot proklanmater. En bon preparasyon i osi enkli fer sir ki zot in ganny zot stok magazin ek piblikasyon avan ki zot ariv pour sa renyon predikasyon, pour ki apre sa tou dimoun i kapab al deswit dan teritwar san tarde.

¹¹ I osi enportan pour fer plan lo ki mannyer pour ariv kot sa renyon predikasyon detrwa minit avan ki i konmanse. Byensir, nou fer nou mye pour ariv a ler pour bann renyon kongregasyon. Par kont, i kapab deranz lezot en kantite kan nou ariv an retar pour en renyon predikasyon. Dan ki fason? Sa frer ki pe pran sa responsabilite i bezwen pran an konsiderasyon plizyer keksoz avan ki i organiz sa group. Si napa bokou proklanmater ki pe asiste, i kapab swazir pou anvoy tou dimoun dan en landrwa kot zis en bout dan sa teritwar in ganny fer. Si serten dimoun i bezwen marse pour vin asiste sa renyon predikasyon e sa teritwar i en pe lwen, i ti a byen pour met zot travay ansanm avek bann ki’n vin dan loto. Si sa teritwar i en landrwa kot i annan en kantite krim, i kapab met bann frer travay ansanm avek bann ser oubyen pre o bor zot. Bann proklanmater ki annan serten dezabilite i kapab ganny demande pour travay dan en landrwa ki plat oubyen kot bann lakaz ki napa bokou peron. Bann proklanmater ki nouvo i kapab ganny demande pour travay avek bann ki annan plis leksperyans. Me si i annan proklanmater ki ariv an retar sa bann laranzman pou bezwen ganny aziste oubyen refer zis pour enkli bann ki’n ganny retar. Byensir, parfwa nou kapab annan en bon rezon akoz ki nou’n ganny retar. Par kont, si nou annan labitid ariv an retar, petet nou kapab demann nou lekor si sa i akoz nou mank lapresyasyon pour bann renyon predikasyon oubyen nou pa byen organize davans.

12. Si ou annan labitid pour fer ou prop laranzman pour predikasyon, kwa ki ou kapab pran an konsiderasyon?

¹² Bann proklanmater ki zwenn ansanm pour predikasyon i annan sa opsyon pour fer zot prop laranzman avan renyon predikasyon oubyen zot kapab ganny demande pour travay avek en proklanmater pandan sa renyon. Si ou annan labitid fer ou prop laranzman, eski ou kapab “ouver gran” ou leker par travay avek en diferan proklanmater olye menm zanmi pros toultan? (2 Kor. 6:11-13.) Eski ou kapab tanzantan fer laranzman pour travay avek en nouvo proklanmater pour ki li osi i kapab fer progre dan son abilite pour prese? (1 Kor. 10:24; 1 Tim. 4:13, 15) Ekout byen bann lenstriksyon ki ganny donnen ki enkli kote ou pou konmans prese. Kan sa renyon i terminen, evite fer sanzman dan bann laranzman e al dan teritwar pli vit posib.

13. Si nou tou nou konsyan e fer nou par, ki mannyer bann renyon predikasyon pou benefisye nou?

¹³ Apre ki zot ti fini prese, sa 70 disip ki Zezi ti organize pour al predikasyon ti “retournen dan lazwa.” (Lik 10:17) San dout, sa renyon ki Zezi ti fer avek zot avan ki zot ti konmans prese ti ed zot pour reisi. Ozordi, bann renyon predikasyon i kapab anmenn menm kalite benefis. Si nou tou nou konsyan e fer nou par, bann renyon predikasyon pou ankouraz, ed e organiz nou pour akonpli nou devwar pour ‘anons sa bon nouvel partou dan lemonn pour tou dimoun konnen.’—Mat. 24:14.

Kan en ser i bezwen diriz renyon predikasyon

En ser i devret kouver son latet e normalman i devret asize ler i pe pran group predikasyon. Sa ki i swazir pour diskite pou parey avek sa ki en frer ti pou koz lo la. Sa ser i kapab fer en diskisyon avek group san ki i donn lenpresyon ki i pe enstrir bann ki pe asiste. Si i envit en lot ser batize pour fer lapriyer, sa ser osi i devret kouver son latet. Si en frer batize i vin asiste sa renyon apre ki in konmanse, sa ser pou envit li pour konklir sa renyon. Sa sirveyan servis i kapab donn bann lenstriksyon presi avek bann ser ki diriz group, pour evite ki okenn sityasyon anbarasan i arive. Par egzanp en frer batize ki pa ankor vin en adolesan, i kapab pe asiste kan en ser ki’n ganny sa responsabilite pour pran group predikasyon, me bann ansyen i santi ki sa zenn frer pa ankor kalifye pour diriz sa renyon. Dan sa ka, sa sirveyan servis i kapab enform bann ki enplike ki sa ser ki’n ganny sa responsabilite, me sa frer ki devret fer lapriyer si bann ansyen i santi ki i kalifye. Petet i annan en frer adilt ki la, ki annan serten restriksyon ki’n ganny mete lo li e i pa kapab diriz sa renyon ni fer lapriyer dan kongregasyon pour bann rezon ki bann ansyen i o kouran. San devwal okenn lenformasyon konfidansyel, bann ansyen i devret fer konnen bann ser ki’n ganny responsabilite ki zot devret diriz renyon e fer lapriyer menm si sa frer pe asiste. Bann ansyen i kapab les sa frer konnen ki zour ki bann ser in ganny demande pour diriz bann renyon predikasyon.

Pandan en renyon predikasyon, ou kapab diskit lo:

Enn bann prezantasyon lo Nou Minister Rwayonm.
En video ki donn bann lenstriksyon konsernan predikasyon lo jw.org.
En serten laspe pour fer en bon prezantasyon tel parey lentrodiksyon, preparasyon pour fer bann retourn vizit oubyen mansyonn laranzman pour fer kontribisyon ler en dimoun i aksepte nou piblikasyon.
En verse Labib ki relye avek predikasyon ki pou ankouraz oubyen ansenny nou.
En leksperyans dan predikasyon ki swa lokal oubyen enn ki dan nou bann piblikasyon.
Lenformasyon dan en lartik Nou Minister Rwayonm.
Lenformasyon dan en parti Renyon Servis ki’n ganny fer resaman.
Lenformasyon ki relye avek predikasyon dan Latour Veyer.
Lenformasyon ki relye avek predikasyon dan bann piblikasyon tel parey liv Lekol Minister ek “Come Be My Follower.”
En laspe jw.org ki kapab ganny servi dan predikasyon.
En laspe sa versyon revize New World Translation ki kapab ganny servi dan predikasyon.
Ki mannyer pour konmans en konversasyon avek dimoun ki ou kapab zwenn dan ou teritwar tel parey en dimoun ki pa krwar dan Bondye, en dimoun ki krwar dan evolisyon, en Endou oubyen en Boudis.
Ki mannyer pour reponn en lobzeksyon ki nou kapab gannyen.
Ki mannyer pour ed ou konpanyon servis vin pli efikas kot laport.
Ki mannyer pour azir kan nou zwenn en dimoun ki koz en lot langaz.
Ki mannyer pour partisip dan en laspe predikasyon ki serten dimoun pou fer tel parey rod bann ki koz en serten langaz, temwannyaz par telefonn, temwannyaz an piblik, retourn vizit oubyen bann letid Labib.
En rapel konsernan sekirite, abilite pour adapte, annan bon konportman ek en latitid pozitif.