Kwen Kestyon

◼ Ki lenformasyon ki devret ganny prezante dan bann randevou pour predikasyon?

Rezon ki nou rankontre pour predikasyon se pour ed nou konsantre lo sa aktivite ki pou swiv—predikasyon. Alor, sa kondikter i devret byen prepare e pare pour transmet lenformasyon ki ankourazan, spesifik, e pratik. Si teks pour lazournen i relye direkteman avek aktivite predikasyon, kondikter i kapab lir li e fer en diskisyon bref. Toutfwa, sa randevou i devret konsantre prensipalman lo sa travay predikasyon, pour ed tou bann ki pe sorti dan predikasyon pour pli byen prepare pour akonpli sa travay sa zour.—2 Tim. 4:5.

Bann pwen apropriye dan Nou Minister Rwayonm i kapab ganny diskite pour fer tou dimoun okouran ki piblikasyon ki pe ganny ofer e konman pour prezant li. Pour Zournen Magazin, zot kapab fer demonstrasyon lo en prezantasyon dan “Ki pour Dir lo bann Magazin.” Pour lezot kanpanny, enn oubyen de lentrodiksyon dan liv Comment Raisonner ki apropriye pour sa teritwar lokal i kapab ganny servi. En laspe dan minister i kapab ganny diskite oubyen ganny demontre, tel parey konman pour servi Labib kot lakour en dimoun, konman pour sirmont bann lobzeksyon, konman pour ofer en letid Labib, oubyen konman pour swiv lentere.

Bann randevou pour predikasyon pa devret depas plis ki 10 a 15 minit, ki enkli organiz bann group, deziny teritwar, e pronons en lapriyer. Kan randevou i terminen, tou dimoun ki prezan i devret konnen avek ki zot pe travay e kote zot pe al travay, e zot devret al dan teritwar san tarde. Lefe ki sa randevou i kourt, i enportan ki tou dimoun i ariv aler. Kan en randevou pour predikasyon i swiv apre en renyon kongregasyon, tel parey Letid Latour Veyer, sa randevou i devret pli kourt. I pa neseser diskit lo teks lazournen, lefe ki nou’n fek fini apresye en bon diskisyon Biblik.

Bann frer batize e kalifye i devret ganny dezinyen davans pour diriz sak randevou pour predikasyon. Si i annan zour ki napa okenn frer batize pour diriz group, bann ansyen i devret swazir en ser batize ki kapab fer sa kan i neseser. Pandan ki i reste asize, sa ser i kapab konmans en diskisyon an group lo teks pour lazournen oubyen lezot pwen ki relye avek predikasyon, i bezwen gard son bann remark bref. I devret kouver son latet.

Bann randevou pour predikasyon i bann loportinite ekselan pour nou ganny ankouraze e ekipe pour partisip dan minister. Si sa kondikter in byen ekipe, tou dimoun pou byen benefisye.