Renyon predikasyon

1. Akoz nou konsernen ki predikasyon i ganny fer dan en fason byen organize kan nou al prese?

¹ Zezi in kit en legzanp an sa ki konsern fer byen sa travay predikasyon dan en fason byen organize e efikas. Pareyman ozordi, bann ki responsab pour fer sa travay predikasyon dan lemonn antye i annan sa gran dezir pour vwar sa travay pe byen ganny fer dan sa menm fason. Dan zot zefor pour fer sa, bann kongregasyon dan lemonn antye i servi bann renyon predikasyon konman en fason pour organiz bann group proklanmater Rwayonm pour al prese.—Mat. 24:45-47; 25:21; Lik 10:1-7.

2. Ki nou ekspekte dan bann renyon predikasyon?

² En bon laranzman: Renyon predikasyon i ganny fer pour donn lankourazman, lenstriksyon lo ki mannyer pour prese ek direktiv konsernan kote pour prese pour bann ki pe sorti pour al prese. Teks pour lazournen i kapab ganny diskite an bref kan i evidan ki i kapab ganny aplike dan predikasyon. Pour prepar tou bann ki prezan pour sa travay sa zour, parfwa bann rapel dan Nou Minister Rwayonm, liv Reasoning, oubyen petet liv Lekol Minister i kapab ganny diskite. En piblikasyon ki pe ganny ofer i kapab osi ganny servi pour fer en pti demonstrasyon. Avan termin avek lapriyer, tou dimoun i devret konnen avek ki i pou travay e kote sa teritwar ki zot pou travay ladan i ete. Sa renyon pa devret dire plis ki 15 minit e zis apre sa renyon tou dimoun i devret pe al prese.

3. Lekel ki responsab pour organiz bann renyon predikasyon?

³ Ki mannyer zot ganny organize? Sirveyan servis i responsab pour organiz bann renyon predikasyon. Sirveyan group oubyen zot asistan i responsab pour al avek zot group predikasyon dan wikenn. Petet serten sirveyan oubyen asistan ministeryel pou kapab al avek zot group predikasyon dan lasemenn. Bann sirveyan group i travay ansanm avek sirveyan servis pour fer sir ki i annan ase teritwar pour zot group pres portanport dan wikenn. Pandan lasemenn, sirveyan servis pou siperviz bann laranzman ki’n ganny fer pour bann ki pou pran group predikasyon.

4-6. (a) An rapor avek teritwar kongregasyon ki lobzektif renyon predikasyon? (b) Kwa ki kapab ganny servi pour deside si i annan en bezwen pour fer renyon predikasyon?

⁴ Kan e kote ki sa bann renyon i devret ganny fer? Olye fer kongregasyon antye zwenn dan zis en landrwa, i normalman pli bon ki sa bann renyon i ganny fer dan bann landrwa apropriye. Normalman zot ganny fer kot bann lakour ki trouve dan sa teritwar, sa i permet ki teritwar kongregasyon i ganny fer dan en fason efikas. Lasal Rwayonm i kapab osi ganny servi pour fer renyon predikasyon. Dan Dimans zis apre diskour piblik ek letid Latour Veyer plizyer kongregasyon i servi Lasal Rwayonm pour fer renyon predikasyon. Fer zefor pour evite ki i annan en gran zistans pour vwayaze pour ariv dan teritwar. Alor, detanzaot i kapab bon pour revwar bann laranzman ki’n ganny fer pour fer sir ki sa landrwa ki renyon predikasyon pe ganny fer i ankor apropriye pour ki travay dan sa teritwar i ganny fer dan en fason efikas e konplet.

⁵ Pli bon moman pour fer sa bann renyon e lakantite fwa ki zot devret ganny fer pandan lasemenn pou depan lo lafason ki sa teritwar i ete. Sa bann kestyon swivan i kapab ganny servi pour deside kote e kan i pli bon pour fer sa bann renyon predikasyon.

⁶ Ki teritwar ki bezwen plis latansyon? Ki pli bon moman pour pres portanport? Eski en ler apre travay i kapab ganny progranmen pour pres portanport oubyen pour fer retourn vizit? Tou bann randevou predikasyon i devret ganny mete lo bord. I dezir tou proklanmater Rwayonm pour kouver byen teritwar ki zot in ganny dezinyen a en degre ki nou osi nou ava kapab dir parey zapot Pol ti dir: “Mon’n fini mon travay dan sa bann landrwa.”—Rom. 15:23.

7. Ki responsabilite sa enn ki’n ganny dezinyen pour pran group predikasyon i annan?

⁷ Kondwir renyon predikasyon: Sa enn ki’n ganny dezinyen pour responsab group predikasyon i devret byen prepare, kan i fer sa i pe demontre en gran respe pour sa laranzman teokratik. Sa bann renyon i devret konmans aler e zot devret enstriktif, bref e dire ant 10 a 15 minit. Avan sa renyon, sa enn ki kondwir i devret konnen dan ki teritwar pour travay. Menm si i pa neseser pour esper bann ki an retar apre ki renyon predikasyon in terminen, i kapab itil pour kit en mesaz pour fer zot konnen kote group pou travay. Tou dimoun i devret pe al dan teritwar ki’n ganny dezinyen pour travay ladan, deswit apre ki sa renyon in fini ganny fer. En renyon predikasyon ki’n byen ganny organize e ki enstriktif, san dout pou donn sa gidans ki neseser pour tou bann ki la prezan pour prese sa zour.—Prov. 11:14.

8. Dan ki fason bann ki asiste renyon predikasyon i kapab korpere avek bann ki responsab group?

⁸ Bann ki asiste sa renyon predikasyon: Korperasyon i esansyel. (Ebr. 13:17) Kan i posib, sa enn ki organiz sa group pou ed okenn dimoun ki bezwen en dimoun pour travay avek. I bon si bann proklanmater eksperyanse i la prezan pour ed bann proklanmater ki nouvo e ki napa bokou leksperyans. Bann ki pare pour travay avek en diferan dimoun detanzaot, sa i kapab permet zot fer en kantite dibyen. (Prov. 27:17; Rom. 15:1, 2) Tou dimoun i devret fer gran zefor pour ariv aler. Si nou annan respe pour sa laranzman teokratik e nou pran konsiderasyon pour nou bann frer ek ser Kretyen, sa pou pous nou pour fer bann azisteman neseser dan sa domenn.—2 Kor. 6:3, 4; Fili. 2:4.

9. Dan ki fason ki bann pionye i kapab donn zot sipor dan sa laranzman?

⁹ Sipor bann pionye: Sipor bann pionye dan renyon predikasyon i annan en gran valer e i en lankourazman pour tou dimoun. I byen pour nou pran an konsiderasyon ki bann pionye i annan en kantite responsabilite. Apard ki kondwir bann letid Labib e fer bann retourn vizit, i kapab ki bann responsabilite familyal ek travay profann i form par dan zot progranm dan lavi tou le zour. Alor, bann pionye pa devret santi ki nou ekspekte ki zot donn zot sipor dan tou renyon predikasyon ki ganny organize par kongregasyon, espesyalman si i ganny fer tou le zour. Parkont, petet i pou posib pour bann pionye donn zot sipor dan omwen detrwa renyon predikasyon sak semenn. A en serten degre, renyon predikasyon i en fason ki ede pour form bann manm kongregasyon, e konnesans ki bann pionye i annan lo Labib e leksperyans ki zot annan dan predikasyon i kapab vin en gran led pour lezot. Lefet ki zot sorti souvan dan predikasyon sa in permet zot ganny leksperyans dan predikasyon. Zot kapab pas zot leksperyans avek lezot. Lefet ki zot partisip avek devouman dan predikasyon e dan bann renyon predikasyon, sa in fer ki zot vin en legzanp pour nou imite. Nou vreman apresye zot partisipasyon dan sa bann renyon predikasyon.

10. Akoz ki i apropriye ki tou bann proklanmater Rwayonm i donn zot sipor dan sa laranzman avek tou zot leker?

¹⁰ Zis parey i ti leka avek Zezi ek son bann disip, en gran parti nou travay predikasyon i ganny akonplir par temwannyaz portanport. Bi nou bann renyon predikasyon i pour ankouraz kanmarad e pour fer sa travay dan en fason efikas. Tou proklanmater sa bon nouvel i devret fer tou sa ki zot kapab pour donn zot sipor dan sa laranzman teokratik. (Akt 5:42; 20:20) Fotespere ki avek tou nou leker, nou tou nou donn nou sipor an faver sa laranzman. Si nou fer sa, nou kapab asire ki Zeova pou beni nou en kantite e anmezir ki nou pres sa bon nouvel lo Rwayonm Bondye, sa i kapab fer leker nou Met, Zezi Kri, kontan.—Mat. 25:34-40; 28:19, 20.