Ki byenfe ou gannyen avek ou group predikasyon?
1. Ki byenfe Letid Liv Kongregasyon ki ankor disponib atraver group predikasyon?
1 Eski ou mank serten laspe Letid Liv Kongregasyon? Bann group ti ptipti e lanvironnman ti pli kalm. I ti fasil pour devlop bann lanmitye ki ti ed nou pour reste for spirityelman. (Prov. 18:24) Sirveyan letid liv ti konn nou sirkonstans personnel e i ti kapab donn bann lankourazman apropriye. (Prov. 27:23; 1 Pyer 5:2, 3) Sa bann byenfe i ankor disponib atraver nou group predikasyon.
2. Ki mannyer nou kapab pran linisyativ pour fer zanmi avek lezot dan nou group predikasyon pour ki nou reste for spirityelman?
2 Pran linisyativ: Group predikasyon i normalman menm grander ki group letid liv ti ete. Par partisip dan predikasyon “ansanm” avek lezot, bann bon lanmitye i kapab devlope. (Fili. 1:27) Konbyen dimoun dan ou group ki ou’n pres avek? Eski ou kapab “ouver gran [ou] leker” e pres avek lezot dimoun ki ou pa abitye avek? (2 Kor. 6:13) Deplis, parler nou kapab envit en dimoun dan nou group pour zwenn ansanm avek nou pour Ladorasyon Fanmir ouswa pour en repa. Dan serten kongregasyon, sakenn son tour, bann group i demontre lospitalite par envit orater viziter pour en repa. Zour ki zot group i responsab pour envit orater, sa group i reini ansanm pour en repa e pour ankouraz kanmarad, menm si orater pa kapab reste.
3. Dan nou group predikasyon, ki loportinite nou annan pour ganny lankourazman spirityel?
3 Menm si konmela kongregasyon i zwenn ansanm en zour an mwens, sa pa vedir ki bann ansyen pou vizit mwens bann proklanmater kot zot. En sirveyan group i ganny apwente dan sak group pour donn lankourazman personnel ek formasyon dan minister. Si sirveyan ou group pa ankor fer laranzman pour pres avek ou, akoz ou pa demann li pour fer li? Deplis, sirveyan servis i partisip dan predikasyon dan wikenn avek en group diferan sak mwan. Dan bann pli pti kongregasyon kot i annan zis detrwa group predikasyon, i kapab fer laranzman pour vizit sak group de fwa par an. Eski ou aranz ou progranm pour al predikasyon zour sirveyan servis pe vizit ou group?
4. (a) Ki mannyer renyon predikasyon i ganny organize? (b) Akoz nou devret mazin pour ofer nou lakaz pour renyon predikasyon?
4 I souvan en lavantaz pour sak group zwenn separeman pour predikasyon dan wikenn. Ler i annan diferan landrwa kot bann group pe zwenn, preski menm ler, i pli fasil pour bann proklanmater ariv dan sa teritwar kot renyon predikasyon pe ganny fer. I pli vit pour organiz bann proklanmater e pour zot al dan teritwar vitman. I osi pli fasil pour sirveyan group pran swen avek dimoun dan son group. Me, depandan lo sirkonstans, parler i pli bon pour de ouswa plis group zwenn ansanm. Si kongregasyon antye i zwenn premye wikenn sak mwan ouswa apre Letid Latour Veyer, i pli bon pour sak group asiz ansanm e sirveyan group pou ganny detrwa minit pour organiz son group avan renyon predikasyon i terminen avek lapriyer.—Vwar bwat “Eski ou kapab ofer ou lakour?”
5. Menm si nou nepli annan Letid Liv Kongregasyon, ki nou kapab asire?
5 Menm si nou nepli annan Letid Liv Kongregasyon, Zeova i ankor pe kontinyen donn nou tou sa ki nou bezwen pour fer son lavolonte. (Ebr. 13:20, 21) Nou pa mank nanryen anba proteksyon Zeova. (Ps. 23:1) Nou ganny bokou benediksyon atraver nou group predikasyon. Si nou pran linisyativ e “senm bokou,” nou pou “rekolte bokou.”—2 Kor. 9:6.
[Bwat lo paz 6]
Eski ou kapab ofer ou lakour?
Dan serten kongregasyon, diferan group predikasyon i zwenn ansanm dan wikenn akoz napa ase lakaz ki disponib pour zwenn ladan. Renyon predikasyon i en lot laranzman kongregasyon, alor i en gran privilez pour sa renyon ganny fer kot ou. Eski ou kapab ofer ou lakour? Pa bezwen ezite zis akoz ou lakaz i senp. Bann ansyen pou gete kote ou lakaz i ete ek lezot fakter, parey i ti le ka, ler zot ti swazir bann lakour pour letid liv. Si ou ti a kontan ofer ou lakour, fer ou sirveyan group konnen.