Pres avek Group i anmenn Lazwa
1 Ler i ti pe anvoy son 70 disip prese, Zezi ti ansenny zot ki zot pour dir, organiz zot de par de, e dir zot ki teritwar zot ti pou kouver. Sa ti kontribye pour fer zot ganny lazwa. (Lik 10:1-17) Pareyman ozordi, predikasyon avek group i ede pour ekip, organiz, e ankouraz pep Bondye pour prese.
2 Bann Ansyen i pran Linisyativ: Bann ansyen i zwe en rol enportan pour ed tou dimoun pour partisip regilyerman dan predikasyon. Sirveyan servis i ansarz pour fer laranzman predikasyon pour lasemenn. Sak sirveyan letid liv i responsab pour organiz aktivite pour son group, sirtou pandan wikenn. Dan bann lokazyon kot kongregasyon antye i zwenn pour predikasyon, tel parey apre Letid Latour Veyer, sak sirveyan letid liv i devret fer laranzman pour son group.
3 “Fer tou Keksoz Byen e avek Lord”: Sa dimoun ki’n ganny dezinyen pour diriz randevou predikasyon i devret konmans aler. Sa renyon pa devret depas plis ki 10 a 15 minit. I byen ki i organiz group predikasyon e nonm teritwar (amwen ki bann sirveyan letid liv pou okip sa, parey in ganny dir avan) avan ki i konklir avek lapriyer. Sa i evit fer bann gran group dan teritwar, ki kapab abes dinite nou travay. Sa i osi an armoni avek konsey Pol: “Fer tou keksoz byen e avek lord.” (1 Kor. 14:40) Tou bann ki asiste sa bann randevou predikasyon i devret kontribye pour fer sa laranzman en sikse par ariv aler, donn tou zot korperasyon sa enn ki pe pran group, e osi al dan teritwar toudswit apre ki group in ganny permisyon pour ale.
4 Anmenn nou ansanm dan Linite: Laranzman pour predikasyon avek group i donn nou en bon loportinite pour konn lezot dan kongregasyon. Menm si napa okenn lobzeksyon pour fer laranzman davans pour travay avek en dimoun, i osi kapab enteresan pour asiste randevou predikasyon san ki nou fer laranzman davans. Nou kapab ganny demande pour travay avek en dimoun ki nou pa tro tro konnen. Alors sa i kapab ed nou pour “ouver nou leker byen gran” pour demontre lanmour.—2 Kor. 6:11-13.
5 Pres avek group i ankouraz nou e i anmenn nou ansanm konman ‘bann konpanyon travay pour laverite.’ (3 Zan 8) Annou partisip ladan plennman!