Ki mannyer laranzman Letid Liv Kongrgasyon i ed nou?
1 Tou nou senk renyon ki ganny fer sak semenn i diferan dan fason ki i ganny kondwir e son bi osi. Pourtan, zot tou zot enportan pour ed nou pour “pous kanmarad pour annan lanmour e fer sa ki byen.” (Ebr. 10:24, 25) Ki serten laspe laranzman letid liv i annan ki inik e ki benefisye nou?
2 Led pour progrese spirityelman: Normalman kantite dimoun ki asiste letid liv i mwens konpare avek kantite dimoun ki asiste lezot renyon kongregasyon. Sa i fer li pli fasil pour devlop lanmitye avek lezot ki kapab ed nou spirityelman. (Prov. 18:24) Eski ou’n fer zefor pour konn tou dimoun dan ou group letid liv? Eski petet ou’n demann sak dimoun pour travay avek ou dan predikasyon? Sa laranzman letid liv i osi permet sa sirveyan letid liv pour konn bann sirkonstans sak dimoun dan group e pour donn zot en lankourazman personnel.—Prov. 27:23.
3 Eski ou’n envit ou etidyan Labib pour asiste letid liv avek ou? Dimoun ki montre lentere dan Labib me ki ezite pour asiste nou renyon kot i annan plis dimoun, i kapab pli alez pour asiste en letid Labib dan en pli pti group, sirtou dan en landrwa prive. Sa bon latmosfer i fer li pli fasil pour bann zenn ek nouvo partisipe. E vi ki group i pli pti, nou annan plis loportinite pour partisipe e loue Zeova.—Ps. 111:1.
4 Zeneralman bann letid liv i ganny fer dan landrwa ki konvenyan pour bann proklanmater dan teritwar. Menm si i pa posib pour tou dimoun asiste letid liv dan en landrwa ki pli pros avek zot, asiste letid liv kot nou’n ganny demande pa sitan lwen avek kot nou reste, konpare avek asiste lezot renyon kongregasyon. Landrwa kot letid liv i deroule i kapab ganny servi osi konman en landrwa ki konvenyan pour zwenn pour prediksyon.
5 Led pour predikasyon: Sirveyan letid liv i enterese pour ed sak dimoun pour partisip regilyerman dan predikasyon, e pour trouv lazwa e bon rezilta dan minister. Alors i demann en kantite zefor pour li travay avek tou dimoun dan group, e donn lasistans personnel dan bann diferan laspe predikasyon. Si ou trouv en laspe difisil dan predikasyon, parey fer retourn vizit, les ou sirveyan letid liv konnen. Petet i kapab fer laranzman pour ou travay avek en proklanmater eksperyanse dan group. Par port byen latansyon lo bann bon metod lansennyman sirveyan letid liv anmezir ki i kondwir letid, ou abilite pour ansennyen pou ganny rafinen.—1 Kor. 4:17.
6 Pa letid liv i vreman en benediksyon! Sa laranzman ranpli avek lanmour sorti kot Zeova i ed nou pour reste ferm spirityelman pandan sa letan difisil ki nou pe viv ladan.—Ps. 26:12.
[Kestyon]
1. Ki mannyer nou senk renyon sak semenn i ed nou?
2. Ki benefis i annan lefet ki zis en pti group dimoun ki zwenn pour letid liv?
3. Ki mannyer laranzman letid liv i ankouraz dimoun pour fer komanter e bann etidyan Labib pour asiste sa renyon?
4. Dan ki fason laranzman letid liv i kapab konvenyan?
5. Ki mannyer nou kapab resevwar led dan predikasyon avek nou sirveyan letid liv?
6. Akoz nou devret rod fason pour nou benefisye plennman avek sa laranzman letid liv?