Kwen Kestyon

◼ Kan ki i ti a neseser form en lot group Letid Liv Kongregasyon?

Formasyon en nouvo group i devret ganny konsidere ler i neseser pour mentenir en lasistans apepre 15 oubyen mwens dan sak group letid liv, enkli sa enn kot Lasal Rwayonm. Pour ki rezon sa konsey?

Ler bann group Letid Liv Kongregasyon i ganny garde pti, sa kondikter i pli kapab donn latansyon sak dimoun ki asiste. Anplis, tou dimoun i ganny sifizaman loportinite pour fer komanter dan en laranzman ki kontribye pour loue non Bondye par nou labous. (Ebr. 10:23; 13:15) Ler i annan plizyer pti group dan diferan landrwa atraver teritwar sa kongregasyon, i vin pli fasil pour asiste Letid Liv Kongregasyon e osi pour randevou predikasyon. Bann kongregasyon ki’n ogmant lakantite landrwa ki zot fer letid liv in dekouver ki lasistans total pour letid liv in osi ogmante.

I kapab annan bann sirkonstans spesyal ki fer li apropriye pour form en lot group, menm si i pou en pti group. Sa i kapab leka avek en group ki izole oubyen kot serten group letid liv ki’n deza plen oubyen ki mank plas asize. Kan i annan en bezwen, en group i kapab ganny formen pour rankontre dan lazournen pour benefisye bann aze, bann ki travay aswar, oubyen bann ser ki annan mari ki pa Temwen.

Sak group letid liv i devret annan detrwa proklanmater ki aktif e ki for spirityelman, osi byen en kondikter ek en lekter kalifye. Bann frer i devret aspire pour ranpli sa bann bezwen dan kongregasyon.

Bann ansyen i kapab promouvwar progre kongregasyon par fer sir ki bann group letid liv kongregasyon i ase pti e pe ganny byen pran swen spirityelman e ki zot rankontre dan bann landrwa byen sitye. Nenport ki moman kot i itil, bann nouvo group i devret ganny formen afen ki tou i kapab profit o maksimonm bann benefis sa laranzman spirityel ki inik. Eski ou kapab ofer ou lakour konman en landrwa letid liv? Bokou ki’n fer sa in eksperyans bann benediksyon spirityel.