Akoz nou bezwen Letid Liv Kongregasyon
1. Ki mannyer Letid Liv Kongregasyon ti konmanse?
1 An 1895, bann Etidyan Labib, non ki bann Temwen Zeova ti ganny apele sa letan, ti organiz bann group letid. Sa bann group ti apel Dawn Circles for Bible Study. Zot ti servi plizyer volim sa liv apele Millennial Dawn konman baz pour letid. Plitar, sa bann group letid ti ganny apele Berean Circles for Bible Study. (Akt 17:11) Souvan en pti group dimoun ti zwenn ansanm dan en lakour prive en swar ki konvenyan pour sa group. Se dan sa fason ki Letid Liv Kongregasyon ti konmanse.
2. Ki mannyer nou kapab kontribye pour ankouraz lezot dan letid liv?
2 Led ek Lankourazman: Vi ki bann group letid liv i ganny garde ekspreseman pti, i annan plis loportinite pour bann ki asiste eksprim zot lafwa. Sa i fer zot ‘kapab benefisye lankourazman atraver lafwa’ kanmarad.—Rom. 1:12.
3, 4. Konman letid liv i ed nou akonpli nou minister?
3 Ler nou obzerv lafason ki sirveyan letid liv i ansennyen, sa i kapab ed nou pour “anons byen mesaz laverite.” (2 Tim. 2:15) Remark lafason ki i aksantye bann rezon biblik pour sa lenformasyon ki pe ganny diskite. Si i apropriye pour sa piblikasyon ki pe ganny egzaminen, i kapab servi zis Labib pour fer resorti bann pwen enportan alafen sa letid. Son bon legzanp i kapab ed nou amelyor fason ki nou ansennyen dan predikasyon.—1 Kor. 11:1.
4 Apard ki kondwir letid pour lasemenn, sirveyan letid i diriz predikasyon. I fer bann laranzman predikasyon apropriye avek sipor sirveyan servis. I esey ed tou dimoun dan group pour akonpli zot responsabilite Kretyen pour pres sa bon nouvel e pour fer disip.—Mat. 28:19, 20; 1 Kor. 9:16.
5. Ki led personnel ki disponib atraver letid liv?
5 Sirveyan letid liv i enterese avek byennet spirityel sak dimoun dan group. I demontre sa lentere dan bann renyon e letan i travay avek lezot dan predikasyon. I osi servi bann lokazyon ler i vizit bann frer ek ser kot zot lakour pour donn zot lankourazman spirityel. Nou tou nou devret santi nou alez pour apros sirveyan letid liv nenport ler nou bezwen led spirityel.—Iza. 32:1, 2.
6. (a) Ki mannyer nou bann frer ek ser dan serten pei in ganny fortifye ler zot in zwenn dan bann pti group? (b) Ki mannyer ou’n benefisye avek laranzman letid liv?
6 Fortifye Kanmarad: Dan bann pei kot aktivite pep Bondye in ganny restrikte, bann frer ek ser i souvan zwenn dan bann pti group. En frer ti rapel: “Menm si nou bann aktivite Kretyen ti’n ganny restrikte, sak fwa ki i ti posib nou ti fer nou bann renyon lasemenn dan bann group 10 a 15 dimoun. Dan sa bann renyon, nou ti ganny fortifye spirityelman avek nou letid Labib ek nou lasosyasyon apre letid. Nou ti partaz nou leksperyans avek kanmarad, e sa ti ed nou pour realize ki sakenn ant nou ti pe lite dan menm fason.” (1 Pyer 5:9) Pareyman, annou fortifye kanmarad par donn tou nou sipor laranzman Letid Liv Kongregasyon.—Efe. 4:16.