Konman Sirveyan Letid Liv i demontre Lentere personnel
1 Letid Liv Kongregasyon in ganny organize dan en fason afen ki “plis latansyon personnel i ganny donnen avek progre spirityel sak dimoun. . . . Sa i en lendikasyon labonte leker Zeova ek son gran lafeksyon pour son pep.” (om p. 75; Iza. 40:11) Sirveyan letid liv i zwe en rol enportan pour donn sa latansyon personnel.
2 Dan Letid Liv: Vi ki bann group letid liv i ganny garde ekspreseman pti, sa sirveyan letid liv i kapab arive konn bann manm son group byen. (Prov. 27:23) Ordinerman i annan bokou loportinite pour asosye avek zot, swa avan oubyen apre letid sak semenn. Dan lespas en mwan, i pou’n kapab koz avek preski sak dimoun dan son group. Sa i ed sak manm letid liv pour santi zot alez pour apros li ler zot pe fer fas avek bann leprev oubyen si zot bezwen lankourazman.—Iza. 32:2.
3 Sirveyan letid liv i esey ankouraz tou dimoun dan group pour partisipe diran letid. En fason ki i fer sa, se par kondwir letid dan en fason zantiy e avek douser. (1 Tesa. 2:7, 8) I rod bann fason pour fer tou dimoun partisipe, enkli bann zenn. Si serten i kanmi pour fer komanter, i kapab ofer lasistans personnel. Par egzanp, i kapab aranze davans pour ki zot lir en verse Labib oubyen fer komanter lo en serten paragraf. Oubyen i kapab montre zot konman pour fer komanter dan zot prop mo.
4 Si asistan sirveyan letid liv i en asistan ministeryel, sa sirveyan i fer laranzman pour li kondwir letid enn fwa tou le de mwan. Sa i permet sa sirveyan obzerv sa asistan e ofer bann sizesyon ki pou ed li. Vreman sa i en bon laranzman pour ed bann frer amelyor zot fason ansennyen!—Tit 1:9.
5 Dan Predikasyon: Enn bann responsabilite prensipal sirveyan letid liv se pour vin en bon legzanp dan travay predikasyon. (Nom. 27:16, 17) I fer laranzman pratik pour organiz predikasyon pour son group e fer zefor pour ed tou dimoun dan group trouv lazwa dan zot minister. (Efe. 4:11, 12) Pour kapab fer sa, i fer li en lobzektif pour pres avek sak manm dan son group. I osi travay avek sirveyan servis pour fer laranzman pour bann ki ti ava kontan amelyor serten laspe zot minister resevwar led avek en proklanmater pli eksperyanse.
6 Konman en bon Berze: Sirveyan letid liv i pran lentere avek bann ki zot sitiasyon pa permet zot fer bokou dan travay predikasyon. Serten i fer pti gin akoz lavyeyes, lezot pa kapab sorti deor oubyen zot in ganny en aksidan oubyen maladi. Alor, sirveyan letid liv i fer sir ki zot konnen ki i annan en laranzman kot zot kapab raport menm selman 15 minit predikasyon dan en mwan. Sa i si sitiasyon ki zot ladan pa’n permet zot pour pres pour enn er-d-tan konplet pandan en mwan. (Komite Servis Kongregasyon i determinen lekel ki kalifye pour sa laranzman.) I osi pran en lentere avek sa bann dan son group ki kapab inaktif, e i fer zefor pour ed zot rekonmans zot aktivite avek kongregasyon.—Lik 15:4-7.
7 Nou vreman rekonesan pour lentere senser ki bann sirveyan letid liv i demontre! Sa latansyon personnel ki zot fourni i ed “nou kapab ansanm ariv dan linite nou lafwa . . . konn en devlopman konplet parey Kris.”—Efe. 4:13.