Senk fason pour trouv en letid Labib
1. Si i difisil pour ganny en letid Labib dan nou teritwar, ki nou devret fer e akoz?
1 Eski ou vwar li difisil pour trouv en dimoun pour etidye Labib avek? Kontinyen fer zefor. Zeova i beni sa bann ki pa aret fer son lavolonte. (Gal. 6:9) La senk sizesyon ki pou ed ou.
2. Ki mannyer nou kapab servi lapros direk pour konmans en letid Labib?
2 Lapros direk: Bokou dimoun i konnen ki nou ofer Latour Veyer ek Awake!, me zot kapab pa konnen si nou ofer letid Labib. Akoz ou pa esey en lapros direk kan ou pe pres portanport? Ou kapab demann direkteman bann dimoun enterese ki ou abitye vizite si zot ti a kontan en letid Labib. Si zot pa aksepte, ou kapab kontinyen kit piblikasyon kot zot e kontinyen devlop zot lentere. Pour plizyer lannen, en frer ti abitye anmenn magazin pour en koup tou le mwan. Apre ki i ti’n kit en magazin pli resan avek zot, i ti pe vire pour ale, e finalman i ti mazinen pour demann zot: “Eski zot ti a kontan etidye Labib?” I ti sirprann ki zot ti aksepte. Aprezan sa koup i batize.
3. Eski nou devret krwar ki bann ki asiste renyon i bezwen pe etidye? Eksplike.
3 Sa ki asiste renyon: Pa bezwen krwar ki bann dimoun enterese ki asiste renyon i neseserman pe etidye. En frer ti dir: “Plis ki lanmwatye letid ki mon’n konmanse se apre ki mon’n koz avek bann ki asiste renyon.” En ser ti deside pour apros en madanm timid ki son bann fiy ti deza batize dan kongregasyon. I ti’n fer apepre 15 an depi ki sa madanm ti pe asiste renyon e i ti toultan vin Lasal Rwayonm ler renyon ti pe konmanse e i ti ale desito ki i ti fini. Sa madanm ti aksepte en letid e finalman vin dan laverite. Sa ser ti ekrir: “I domaz ki mon’n esper 15 an pase avan mon demann li si i ti pou kontan etidye!”
4. Ki mannyer nou kapab ganny letid atraver en lot dimoun?
4 Atraver en lot dimoun: En ser i kontan pour akonpanny lezot lo zot letid Labib. Avek permisyon sa kondikter letid, a lafen i kontan demann sa etidyan si i pa konn personn ki ti pou kontan annan en letid zot osi. Kan ou ofer liv Ki Labib i dir? avek en dimoun ki ou abitye pas kot li, ou kapab demande: “Eski ou konn okenn dimoun ki ti pou kontan ganny enn sa liv?” Parler, sirkonstans pa permet en proklanmater ouswa pionye pour kondwir en letid avek en dimoun ki zot zwenn dan teritwar. Alor i byen pour fer lezot konnen ki ou disponib.
5. Akoz nou kapab demann konzwen en Temwen si i pa ti a kontan etidye Labib?
5 Konzwen ki pa Temwen: Eski i annan bann proklanmater dan ou kongregasyon ki’n marye avek en dimoun ki pa Temwen? Serten zot pa tro koz lo Labib avek zot konzwen Temwen, me zot ti pou aksepte en letid avek en dimoun ki pa zot fanmir. I souvan pli bon pour koz avek sa konzwen Temwen avan apros sa msye ouswa madanm pour ki ou ava konnen ki pli bon lapros.
6. Ki lenportans lapriyer i annan kan ou pe esey rod en letid?
6 Lapriyer: Pa bezwen souzestim pouvwar lapriyer. (Zak 5:16) Zeova i promet ki i pou ekout nou lapriyer kan i an armoni avek son lavolonte. (1 Zan 5:14) En frer ki annan en progranm byen sarze ti konmans priye pour ganny en letid Labib. Son madanm ti pe demann son lekor si i ti pou annan letan pour okip sa etidyan, sirtou si sa etidyan ti annan en kantite problenm. Alor sa ser ti met tou son konsern dan lanmen Zeova ler i ti priye pour ki son msye i ganny en letid. Zot lapriyer ti ganny reponn apepre de semenn plitar kan en pionye dan kongregasyon ti trouv en zonm ki ti anvi etidye Labib e i ti donn sa letid avek sa frer. Sa madanm ti ekrir: “Nenport ki ki santi ki i pou difisil pour li kondwir en letid, mon kapab dir li: Fodre ou fer en lapriyer spesifik e pa aret priye. Nou’n annan plis lazwa ki mon ti a kapab mazinen.” Avek perseverans, ou osi ou kapab trouv en letid Labib e ganny sa lazwa pour ed en dimoun mars lo sa ‘semen ki anmenn ver lavi.’—Mat. 7:13, 14.