Lenstriksyon pour bann ki annan prezantasyon dan Renyon Servis
Bann term ki ganny servi dan progranm Renyon Servis pou vin pli senp konmansman avek sa seri Nou Minister Rwayonm. Sa bann lenstriksyon ek rapel swivan pou reviz e klarifye sa ki ti ganny dir dan Nou Minister Rwayonm Me 2009, dan sa lartik ki annan pour tit: “Ki mannyer pour prepar Renyon Servis.”
◼ Diskour: Sa pe refer avek en diskour ki baze lo lenformasyon ki’n ganny donnen, san partisipasyon lodyans. Sa orater i merit port latansyon lo sa ki pou pli benefisye kongregasyon.
◼ Kestyon ek larepons: Parey letid Latour Veyer, sa parti i annan en pti lentrodiksyon ek konklizyon, e kestyon i ganny demande lo tou paragraf. Sa kondikter i merit evite fer tro bokou komanter. Bann verse kle i kapab ganny lir dapre kantite letan ki reste. Eksepte dan bann ka kot i ganny demande, paragraf pa merit ganny lir.
◼ Diskisyon: Sa i en diskour ki enkli partisipasyon lodyans. I pa zis en diskour e i pa en prezantasyon ki ganny fer antyerman par kestyon ek larepons.
◼ Demonstrasyon ek entervyou: Kot i mark demonstrasyon, sa i vedir ki se sa orater ki pou fer sa size ki responsab pour fer laranzman pour demonstrasyon; i pa bezwen fer sa demonstrasyon li menm. Sa ki i swazir pour ed li i merit kapab fer sa demonstrasyon byen e annan en bon legzanp. Si i posib i merit fer laranzman avek zot byen davans. I pou pli byen pour pa fer bann nouvo proklanmater ki napa bokou leksperyans montre ki mannyer sa travay i merit ganny fer zis pour donn zot en sans pour vin lo platform. Me par kont, serten i kapab ganny servi konman met lakour. Proklanmater ki pe fer demonstrasyon i merit vir avek lodyans. Bann ki ganny servi dan entervyou i merit donn zot komanter lo platform olye dan plas kot zot pe asize. Demonstrasyon ek entervyou i merit ganny egzerse. Si renyon pe depas ler e sa frer i bezwen fer son prezantasyon pli kourt, i merit evite retir demonstrasyon oubyen entervyou. Asistan ministeryel i merit verifye avek kordinater konsey ansyen oubyen en lot ansyen avan i swazir bann partisipan.
Si i annan en prezantasyon dan progranm ki diferan avek labitid, son lenstriksyon i merit ganny byen swiv. Kan bann frer i swiv byen sa bann lenstriksyon, sa pou fer ki Renyon Servis pou deroul dan en fason “byen e avek lord.”—1 Kor. 14:40.