“Ekout sa ki mon annan pour dir pour mon defans”

1, 2. Akoz zapot Pol i retourn Zerizalenm e ki problenm i pou gannyen laba?

POL i dan lavil Zerizalenm. Ankor enn fwa, i pe mars dan bann pti semen, kot i annan en kantite dimoun. Sa lavil i sa lavil pli enportan dan lemonn dan listwar pep Zeova. An zeneral, bann zabitan Zerizalenm i fyer akoz sa ki’n arive dan lepase. Pol i konnen ki en kantite Kretyen Zerizalenm i depan tro bokou lo sa ki’n arive dan lepase e sa i anpes zot aksepte sa nouvo fason pour ador Zeova. Alor ler i ti Efez, Pol ti deside pour retourn Zerizalenm pour anmenn bann keksoz ki bann frer ek ser ti bezwen me osi parski i ti vwar ki zot ti bezwen led pour konpran serten keksoz. (Akt 19:21) Menm si i pou annan bann danze, i determinen pour retourn dan lavil Zerizalenm.

² Me ki problenm Pol pou gannyen ler i Zerizalenm? En problenm ki i pou gannyen i ki serten disip Kris in tann bann rimer lo Pol e sa i fatig zot. Me bann lennmi Kris pou fer bann pli gro problenm. Zot pou fer bann fo lakizasyon kont Pol, zot pou bat li e esey touy li. Me sa pou osi donn Pol en loportinite pour defann laverite. Pol ti annan limilite, kouraz ek lafwa ler i ti pas dan sa bann problenm e sa i en bon legzanp pour bann Kretyen ozordi. Annou vwar ki mannyer Pol i en bon legzanp pour nou.

“Zot ti konmans glorifye Bondye” (Akt 21:18-20a)

3-5. (a) Ki renyon Pol ti ale ler i ti Zerizalenm e ki i ti koz lo la? (b) Ki nou kapab aprann avek sa renyon ki Pol ti fer avek bann ansyen Zerizalenm?

³ Sa zour apre ki Pol ek bann dimoun ki ti avek li ti’n ariv Zerizalenm, zot ti al vwar bann ansyen dan kongregasyon. Sa resi pa koz lo bann zapot ki ti ankor vivan sa letan, petet akoz zot ti’n al servi dan lezot pei. Par kont, Zak frer Zezi ti ankor la. (Gal. 2:9) I paret ki ler “tou bann ansyen” ek Pol ti zwenn ansanm pour fer en renyon, Zak ki ti diriz sa renyon.​—Akt 21:18.

⁴ Pol ti dir bann ansyen bonzour “e i ti rakont zot an detay tou sa ki Bondye ti’n akonpli atraver son minister avek dimoun lezot nasyon.” (Akt 21:19) Sirman sa ti ankouraz sa bann frer. Ozordi osi, nou kontan ler nou tande ki mannyer sa travay predikasyon pe kontinyen ganny fer dan lezot pei.​—Prov. 25:25.

⁵ I bezwen ki Pol ti osi dir ki i ti’n anmenn sa bann kontribisyon ki bann frer ek ser Lerop ti’n donnen. Sa bann dimoun ki ti pe ekout Pol ti bezwen vreman kontan e rekonesan ki bann frer ek ser ki ti reste dan bann pei ki vreman lwen ti enterese avek zot. Apre sa, “zot [bann ansyen] ti konmans glorifye Bondye”! (Akt 21:20a) Pareyman ozordi, en kantite dimoun ki ganny afekte avek bann dezas natirel oubyen ki annan en maladi grav, i vreman kontan ler bann frer ek ser i ed zot e ankouraz zot dan sa bon moman.

En kantite dimoun i ankor “vreman devoue pour obei Lalwa” (Akt 21:20b, 21)

6. Ki problenm bann ansyen ti koz avek Pol lo la?

⁶ Apre sa, bann ansyen ti koz avek Pol lo en problenm ki ti annan Zide akoz bann frer ek ser ti’n tann bann rimer lo li. Zot ti dir li: “Frer, ou konnen ki i annan plizyer milye Zwif ki’n vin bann disip e zot tou zot vreman devoue pour obei Lalwa. Me zot in tann rimer ki ou ti pe ansenny tou bann Zwif parmi bann nasyon pour rezet Lalwa Moiz, par dir zot ki zot pa devret sirkonsi zot zanfan e aret swiv bann koutim Zwif.”a​—Akt 21:20b, 21.

7, 8. (a) Kwa ki en kantite Kretyen Zide pa ti konpran byen? (b) Akoz sa pa vedir ki sa bann Kretyen Zwif ti bann aposta?

⁷ Akoz en kantite Kretyen ti ankor pe ensiste pour obei Lalwa Moiz menm si i ti fer plis ki 20 an depi ki bann Kretyen ti nepli bezwen obei sa Lalwa? (Kol. 2:14) Dan lannen 49, bann zapot ek bann ansyen ki ti’n zwenn ansanm Zerizalenm ti’n anvoy en let kot bann kongregasyon pour dir zot ki bann disip ki sorti dan lezot nasyon pa ti bezwen ganny sirkonsi e obei Lalwa Moiz. (Akt 15:23-29) Par kont, dan sa let zot pa ti’n koz lo bann disip Zwif e en kantite zot pa ti konpran ki zot ti nepli bezwen obei Lalwa Moiz.

⁸ Vi ki sa bann disip Zwif pa ti konpran sa byen, eski sa i vedir ki zot pa ti bann Kretyen? Non. I pa ti konmsi zot ti’n ador bann fo bondye dan lepase e ki la aprezan zot ti pe kontinyen swiv bann koutim sa fo larelizyon ki zot ti ladan dan lepase. Sa Lalwa ti sitan enportan pour sa bann disip Zwif e Zeova ki ti’n donn sa Lalwa. I ti napa nanryen mal avek sa Lalwa e i ti napa nanryen pour fer avek bann pratik demonyak. Sa Lalwa ti form parti sa vye lalyans me aprezan bann Kretyen ti pe swiv en nouvo lalyans. Alor, bann Kretyen ki ti swiv ladorasyon pir ti nepli bezwen obei Lalwa Moiz. Bann Kretyen Ebre ki ti ensiste pour obei Lalwa, pa ti konpran akoz zot ti bezwen aret obei sa lalyans Lalwa e zot ti napa ase konfyans dan kongregasyon Kretyen. Zot ti bezwen sanz zot fason panse pour zot kapab konpran bann nouvo leklersisman konsernan sa lalyans Lalwa.b​—Zer. 31:31-34; Lik 22:20.

“Napa nanryen ki vre dan tou sa ki zot pe dir” (Akt 21:22-26)

9. Ki Pol ti ansennyen konsernan Lalwa Moiz?

⁹ Eski bann rimer ki zot ti pe dir lo Pol ti vre, ki i ti pe ansenny bann Zwif parmi bann nasyon pour pa “sirkonsi zot zanfan e aret swiv bann koutim Zwif”? Pol ti en zapot pour bann dimoun lezot nasyon e i ti fer zot konnen ki zot pa ti bezwen obei Lalwa Moiz. Nenport dimoun ki ti esey fer bann disip lezot nasyon krwar ki zot bezwen ganny sirkonsi pour montre ki zot pe obei Lalwa Moiz, Pol ti montre ki sa ki zot ti pe dir pa ti vre. (Gal. 5:1-7) Pol ti osi anons sa bon nouvel avek bann Zwif dan bann lavil kot i ti ale. Sirman, i ti eksplik bann Zwif ki ti enterese ki zot ti nepli bezwen obei Lalwa Moiz akoz Zezi ti’n mor e ki en dimoun i ganny konsidere konman drwat akoz son lafwa me pa akoz i obei Lalwa Moiz.​—Rom. 2:28, 29; 3:21-26.

10. Ki mannyer Pol ti montre ki i ti konpran lafason ki bann dimoun ti santi konsernan Lalwa ek sirkonsizyon?

¹⁰ Me kantmenm sa, Pol ti konpran ki serten dimoun ti anvi kontinyen swiv serten koutim Zwif, par egzanp pour pa travay zour Saba oubyen pa manz serten manze. (Rom. 14:1-6) I pa ti fer okenn lareg konsernan sirkonsizyon. Anfet, Pol ti fer Timote ganny sirkonsi pour pa ofans bann Zwif vi ki zot ti konnen ki papa Timote ti en Grek. (Akt 16:3) Sak dimoun ti bezwen deside pour li menm si i ti pou sirkonsi. Pol ti dir bann Galat: “Ki swa en dimoun i sirkonsi oubyen non, sa napa okenn valer, me sa ki annan valer se demontre lafwa ansanm avek lanmour.” (Gal. 5:6) Par kont, si en dimoun ti ganny sirkonsi zis akoz i anvi obei Lalwa oubyen i ti dir lezot ki zot bezwen ganny sirkonsi pour zot ganny laprouvasyon Zeova, sa ti pou montre ki i ti napa ase lafwa.

11. Ki lenstriksyon bann ansyen ti donn Pol e ki i ti bezwen fer pour li swiv sa lenstriksyon? (Vwar not.)

¹¹ Sa bann rimer ti fatig bann disip Zwif menm si sa pa ti vre. Alor, bann ansyen ti donn Pol sa lenstriksyon: “Nou annan kat zonm ki’n fer en ve. Al avek sa bann zonm, pirifye ou lekor ansanm avek zot, pey zot depans e zot latet i devret ganny raze. Alor tou dimoun pou konnen ki napa nanryen ki vre dan tou sa ki zot pe dir lo ou, me ki ou annan en bon kondwit e ou pe obei Lalwa osi.”c​—Akt 21:23, 24.

12. Ki mannyer Pol ti montre ki i ti adapte e pare pour fer tou sa ki bann ansyen Zerizalenm ti dir li fer?

¹² Pol ti’n kapab dir bann ansyen ki sa bann rimer ki dimoun ti pe dir lo li pa ti sa vre problenm me plito sa vre problenm ti sa bann disip Zwif ki ti pe ensiste pour obei Lalwa Moiz. Me i ti pare pour fer tou sa ki bann ansyen ti dir li fer tan ki sa pa ti kont bann prensip Bondye. Pli boner i ti’n ekri: “Parmi sa bann ki anba lalwa, mon ti vin anba lalwa, menm si mwan menm mon pa anba lalwa pour ki mon ganny sa bann ki anba lalwa.” (1 Kor. 9:20) Alor zapot Pol ti korpere avek bann ansyen Zerizalenm e i ti vin parey en dimoun ki ti “anba lalwa.” Zapot Pol in kit en bon legzanp pour nou ozordi lo lafason ki nou devret korpere avek bann ansyen e pour pa ensiste pour fer keksoz dan nou prop fason.​—Ebr. 13:17.

“I pa merit viv!” (Akt 21:27–22:30)

13. (a) Akoz serten Zwif ti fer dezord dan tanp? (b) Ki mannyer Pol ti ganny sove?

¹³ Ler zapot Pol ti al kot tanp, keksoz pa ti byen pase. Ler sa bann zonm ti pros pour akonpli zot ve, bann Zwif sorti Lazi ti vwar Pol kot tanp. Zot ti akiz Pol ki i ti pe anmenn bann dimoun lezot nasyon dan tanp e zot ti fer lafoul konmans fer dezord. Si en komandan larme Romen pa ti’n anpes zot, zot ti pou’n bat Pol ziska i mor. Me kantmenm sa, sa komandan Romen ti met li dan prizon. An tou, Pol ti pou reste dan prizon pour plis ki kat-r-an. Me Pol ti ankor dan danze. Ler sa komandan ti demann bann Zwif akoz zot ti pe atak Pol, zot ti akiz li pour diferan keksoz. Sa komandan pa ti konpran sa ki zot ti pe dir akoz zot ti pe fer en kantite tapaz. Sa bann dimoun ti sitan ankoler ki bann solda ti bezwen pran Pol e tir li dan sa landrwa. Ler Pol ek bann solda Romen ti pros pour ariv kot barak, Pol ti dir sa komandan: “Mon sipliy ou, les mwan koz avek sa bann dimoun.” (Akt 21:39) Sa komandan ti dakor e avek kouraz, Pol ti defann son lafwa.

14, 15. (a) Ki Pol ti dir bann Zwif? (b) Ki sa komandan Romen ti fer pour li konnen akoz bann Zwif ti ankoler avek Pol?

¹⁴ Pol ti dir: “Ekout sa ki mon annan pour dir pour mon defans.” (Akt 22:1) Pol ti koz avek sa lafoul dan langaz Ebre e zot ti reste trankil. I ti koz fran avek zot e i ti dir zot akoz i ti’n vin en disip Kris. Ler i ti fer sa, i ti koz lo bann keksoz ki sa bann Zwif ti kapab al verifye si zot ti oule. Gamalyel ki ti renonmen sa letan, ti sa ansenyan ki ti’n ansenny Pol e Pol ti’n persekit bann disip Kris e serten dimoun ki ti la ti konn sa. Me ler i ti pe al Damas, i ti ganny en vizyon e Zezi ki ti’n ganny resisite ti koz avek li. Sa bann dimoun ki ti pe vwayaz avek Pol ti vwar en lalimyer e zot ti tann en lavwa me zot “pa ti konpran sa ki ti pe ganny dir.” (Vwar not dan Labib letid an Angle lo Akt 9:7; 22:9) Apre sa, sa bann dimoun ki ti avek Pol ti bezwen anmenn Pol Damas parski sa vizyon ti’n fer li pa vwar kler. Ler i ti laba, Ananyas, en zonm ki bann Zwif dan sa rezyon ti konn byen ti geri Pol.

¹⁵ Pol ti dir zot ki ler i ti retourn Zerizalenm, Zezi ti aparet avek li dan tanp. Alor, sa bann Zwif ti konmans ankoler e zot ti kriye e dir: “Tir sa kalite dimoun lo sa later, parski i pa merit viv!” (Akt 22:22) Sa komandan ti fer bann solda pran Pol e anmenn li kot barak pour sov li. Sa komandan ti anvi konnen akoz bann Zwif ti ankoler avek Pol, alor i ti donn lord pour fwet li anmezir ki zot kestyonn li. Me Pol ti dir ki i ti en sitwayen Romen e i ti servi en drwa ki i ti annan dapre lalwa ki ti pou protez li. Ozordi osi, bann serviter Zeova in servi zot drwa pour ganny proteze dapre lalwa e zot in defann zot lafwa. (Vwar sa bwat “Lalwa Romen ek bann sitwayen Romen,” ek sa bwat lo sa paz, “Temwen Zeova i ganny zize devan lakour.”) Ler sa komandan ti tande ki Pol ti en sitwayen Romen, i ti realize ki i ti pou bezwen rod en lot fason pour ganny plis lenformasyon. Son lannmen, i ti demann Sannedren, setadir lakour siprenm bann Zwif, pour fer en renyon spesyal e i ti anmenn Pol laba.

“Mon en Farizyen” (Akt 23:1-10)

16, 17. (a) Eksplike ki ti arive ler Pol ti koz avek Sannedren. (b) Ki mannyer Pol ti montre ki i ti annan limilite ler zot ti tap li?

¹⁶ Ler Pol ti konmans son defans devan Sannedren, i ti dir: “Mon bann frer, mon’n konport mwan devan Bondye avek en konsyans parfetman kler ziska ozordi.” (Akt 23:1) Zot ti anpes li koz plis ki sa. Sa resi i dir: “Alor Granpret Ananyas ti donn lord sa bann ki ti pe debout o bor li pour tap li dan son labous.” (Akt 23:2) Zot ti imilye li. Sa ti montre ki zot ti’n fini ziz Pol e ki zot ti krwar ki i ti pe koz manti menm si zot ti napa okenn laprev. Sanmenm sa Pol ti dir: “Bondye pou tap ou, ipokrit. Eski ou vin ziz mwan dapre Lalwa e an menm tan kas Lalwa par donn lord pour tap mwan?”​—Akt 23:3.

¹⁷ Serten dimoun ki ti pe debout lanmenm ti soke, pa akoz en dimoun ti’n tap Pol me akoz sa ki Pol ti’n dir. Zot ti dir li: “Eski ou pe ensilte granpret Bondye?” Sa ki Pol ti dir zot ti montre ki i ti annan limilite e ki i ti respekte Lalwa. I ti dir zot: “Mon bann frer, mon pa ti konnen si i ti granpret. Parski i’n ganny ekrir, ‘Ou pa devret koz an mal lo en sef lepep.’”d (Akt 23:4, 5; Egz. 22:28) Alor Pol ti servi en lot metod. Vi ki i ti konnen ki i ti annan bann Farizyen ek bann Sadiseen dan Sannedren, i ti dir zot: “Mon bann frer, mon en Farizyen, mon zanset i Farizyen e la mon pe ganny zize parski mon krwar dan rezireksyon.”​—Akt 23:6.

18. Akoz Pol ti dir ki i en Farizyen e ki mannyer nou kapab servi bann rezonnman en pe parey dan serten sityasyon?

¹⁸ Akoz Pol ti dir ki i en Farizyen? Sa i akoz son “zanset . . . [ti] Farizyen” e son fanmir ti form parti sa group. Alor en kantite dimoun ti ankor konsider Pol konman en Farizyen.e Me akoz Pol ti dakor avek sa ki bann Farizyen ti krwar lo rezireksyon? Bann Farizyen ti krwar ki ler en dimoun i mor, en keksoz dan li i kontinyen viv e si sa dimoun ti en bon dimoun, i ti pou reviv ankor konman en imen. Pol pa ti krwar sa. I ti krwar dan sa ki Zezi ti ansennyen lo rezireksyon. (Zan 5:25-29) Me kantmenm sa, Pol ti dakor avek bann Farizyen ki ler en dimoun i mor, i annan lespwar pour li viv ankor, konpare avek bann Sadiseen, ki ti krwar ki en dimoun ki’n mor, pa pou viv ankor. Nou osi nou kapab servi bann rezonnman en pe parey ler nou koz avek bann dimoun ki Katolik oubyen ki Protestan. Nou kapab dir zot ki nou krwar dan Bondye parey zot. I vre, petet zot krwar dan Trinite, me nou, nou krwar dan sa Bondye ki Labib i koz lo la. Me kantmenm sa, nou osi nou krwar ki i annan en Bondye.

19. Akoz i ti annan dezord dan sa renyon ki Sannedren ti fer?

¹⁹ Sa ki Pol ti dir ti fer sa bann dimoun dan Sannedren pa tonm dakor antre zot. Labib i dir: “Alor zot ti konmans kriye e serten profeser lalwa parmi bann Farizyen ti leve e konmans argimante dan lakoler e dir: ‘Nou pa vwar nanryen mal avek sa zonm, me si en lespri ouswa en lanz in koz avek li, alor . . . ’” (Akt 23:9) Bann Sadiseen ti ofanse ler bann Farizyen ti dir ki petet en lanz ti’n koz avek Pol, parski zot pa ti krwar ki bann lanz i egziste. (Vwar sa bwat “Bann Sadiseen ek bann Farizyen.”) Zot ti pe sitan argimante ki sa komandan Romen ti bezwen vin sov Pol ankor enn fwa. (Akt 23:10) Me kantmenm sa, Pol ti ankor dan danze. Ki ti pou arive avek li aprezan? Nou pou aprann plis lo la dan sa lot sapit.