Sa ki siport Rwayonm​—Batiman pour ladorasyon ek led sekour

OU ANTRE dan Lasal Rwayonm e apenn si ou rekonnet sa landrwa. Ou’n touzour kontan sa batiman. I menm posib ki ou annan bann zoli souvenir akoz ou’n ede dan konstriksyon detrwa lannen pase. Me, la dan en sans ou pli kontan ankor akoz sa Lasal Rwayonm in ganny transformen konman en sant led sekour tanporer. Apre en tanpet ki’n koz linondasyon e bokou landrwa dan ou rezyon in ganny afekte, Komite Biro Brans in deswit fer laranzman pour ki bann viktim sa dezas i ganny manze, lenz, delo prop ek lezot led. Bann provizyon neseser in ganny byen aranze dan lord. Bann frer ek ser i antre, pran sa ki zot bezwen e dan plizyer ka, zot pe eswiy larm lazwa dan zot lizye.

Zezi ti dir ki sa mark remarkab ki pou idantifye son pep se lanmour pour kanmarad. (Zan 13:34, 35) Dan sa seksyon, nou pou vwar ki mannyer lanmour Kretyen in ganny demontre dan bann proze konstriksyon ek led sekour ki Temwen Zeova in fer. Sa lanmour i en laprev ki nou pe viv anba dominasyon Rwayonm Bondye!