FER ZOT VIN DISIP
LESON 11
Ansenny dan en fason senp
Prensip: “Servi bann parol ki fasil pour konpran.”—1 Kor. 14:9.
Sa ki Zezi ti fer
1. Get sa VIDEO oubyen lir Matye 6:25-27. Apre reponn sa bann kestyon swivan:
Ki mannyer Zezi ti montre ki Zeova i enterese avek nou?
Menm si Zezi ti konn en kantite keksoz lo bann zwazo, ki pti detay ki i ti konsantre lo la? Akoz sa ti en bon fason pour ansennyen?
Ki nou aprann avek Zezi?
2. Ler nou ansenny dan en fason senp, dimoun pou rapel sa ki nou’n ansenny zot e sa pou tous zot leker.
Fer parey Zezi
3. Pa koz tro bokou. Olye dir tou sa ki ou konnen lo en topik, konsantre lo sa ki ou pe etidye dan sa liv. Apre ki ou’n demann en kestyon, esper ou etidyan reponn. Si i pa konn larepons oubyen i dir en keksoz ki pa annakor avek sa ki Labib i dir, servi lezot kestyon pour ed li rezonn lo sa topik. Dek ki sa etidyan i konpran sa pwen prensipal, al lo sa lot pwen.
4. Servi sa ki ou etidyan i deza konnen pour ed li konpran bann nouvo keksoz. Par egzanp, avan konmans en leson lo rezireksyon, ou kapab demann sa etidyan sa ki i deza konnen lo lanmor.
5. Servi byen legzanp. Avan servi en legzanp, demann ou lekor:
‘Eski sa legzanp i senp?’
‘Eski i fasil pour mon etidyan konpran?’
‘Eski i pou ed mon etidyan mazin sa pwen prensipal oubyen i pou mazin zis sa legzanp?’