En nouvo edisyon Latour Veyer an angle pli senp
NOU vreman kontan pour dir zot ki pour enn an, apartir nimero le 15 Zilyet 2011, tou le mwan nou pou pibliy en edisyon Latour Veyer an Angle pli senp pour bann lartik letid. Depandan lo kantite lespas, i pou osi annan lezot pti lartik. Nou krwar ki sa laranzman pou vreman ed bokou Temwen Zeova spirityelman. Akoz?
Angle i en langaz ki bokou nou bann frer ek ser i koze dan bann pei parey Fidi, Gana, Kenya, Liberya, Nizerya, Papua New Guinea ek bann zil Solomon. Menm si nou bann frer dan sa bann pei i kapab koz lezot langaz lokal ouswa langaz sa pei kot zot pe reste, zot souvan servi Angle dan lavi tou le zour, dan renyon kongregasyon e dan predikasyon. Par kont, sa Angle ki zot servi i pli senp ki sa ki ganny servi dan nou bann piblikasyon. Deplis, i annan lezot Temwen ki’n al reste dan bann pei kot zot bezwen koz Angle, menm si zot pa konn bokou sa langaz. An plis ki sa, zot pa kapab asiste bann renyon dan zot langaz maternel.
Bann lartik ki nou egzaminen tou le semenn dan Letid Latour Veyer i en mwayen prensipal ki ganny servi pour ki nou ganny nouri spirityelman. Alor, pour ed tou bann ki asiste pour benefisye plennman avek sa lenformasyon, sa versyon Angle pli senp pou ede akoz i servi bann vokabiler ek granmer pli fasil. Kouvertir sa nouvo edisyon pou diferan. Bann soutit, paragraf, kestyon revizyon ek portre dan sa lartik letid pou parey avek sa ki pou dan Latour Veyer normal. Dan sa fason, tou dimoun pou kapab swiv dan zot kopi e partisip dan letid Latour Veyer. Pour vwar diferans ant sa de edisyon, get sa legzanp pli ba sorti dan paragraf 2 dan premye lartik letid sa magazin.
Nou swete ki sa nouvo laranzman pou reponn lapriyer bokou ki’n dir Zeova: “Fer mwan konpran pour ki mon kapab aprann ou bann komannman.” (Ps. 119:73) Nou vreman asire ki sa bann ki pa tro konpran Angle, ensi ki bann zanfan pli zenn ki koz Angle pou kapab prepar byen pour Letid Latour Veyer tou le semenn. Nou remersye Zeova ki “kontan [nou] bann frer dan lafwa” akoz i’n donn zot nouritir spirityel annabondans.—1 Pyer 2:17; Mat. 24:45.
Konsey Direkter Temwen Zeova