Bann Sanzman eksitan pour Latour Veyer!
1 Pli boner sa lannen, bann kongregasyon ti resevwar en lanons eksitan: Konmansman Zanvye 2008, Latour Veyer pou annan de diferan edisyon, enn pour piblik e lot pour nou bann frer ek ser Kretyen! Sa sanzman i aplik pour Latour Veyer an Angle oubyen an Franse. Petet ou ti pe mazinen: ‘Ki mannyer sa de magazin pou diferan? Lefe ki pou annan de edisyon separe ki lavantaz sa pou anmennen? Eski pou annan bann nouvo laspe dan sa edisyon?’
2 Bann Diferans: Sa magazin date le premye sak mwan pou ganny apele Edisyon Piblik. Tou bann lartik dan sa magazin pou ganny prepare avek lentere piblik aker. Sa enn ki pou date le 15 sak mwan pou ganny apele Edisyon Letid e i pa pou ganny ofer dan predikasyon. I pou kontyen tou lartik letid ki nou pou servi pandan en mwan e osi bann lartik adisyonnel ki pou sirtou enteres bann Kretyen ki’n dedye zot lavi avek Zeova. Latour Veyer Edisyon Piblik pa pou zis enteres bann Temwen me i pou espesyalman enteres bann ki pa Temwen ki krwar dan Labib. Parkont, Awake! pou kontinyen ganny fer dan en fason pour atir latansyon en pli gran lodyans, enkli bann ki annan dout ek bann ki pa dan larelizyon Kretyen.
3 Bann Lavantaz: Dan Edisyon Letid, i pou nepli neseser pour eksplik bann term parey “pionye” pour bann ki pa Temwen kapab konpran. Sa edisyon pou osi kontyen bann lenformasyon pli presi ki’n ganny prepare espesyalman pour Temwen Zeova ek bann etidyan Labib ki pe progrese spirityelman. Ki lavantaz Edisyon Piblik pou annan? Bann ki pa Temwen pou vwar li gou pour lir sa magazin antye, vi ki bann size ek stil ekri pou ganny fer espesyalman pour piblik. Byensir, sak Temwen Zeova pou benefisye kan zot lir tou le de edisyon. Lefet ki nou pou prezant zis en Latour Veyer ek en Awake! dan predikasyon tou le mwan, nou pou annan en mwan antye pour amelyor nou prezantasyon.
4 Bann nouvo Laspe: Plan pour bann nouvo laspe eksitan in ganny fer pour Latour Veyer Edisyon Piblik. En laspe pou diskit bann lansennyman debaz dan Labib dan en fason vreman senp. En lot pou montre ki mannyer Labib i kapab ed bann fanmir. Bann proze letid Labib pou ganny enkli pour zenn. I pou annan en lartik dan sak nimero magazin ki pou met lanfaz lo bann teks Labib spesifik, ki pou ansenny nou konsernan bann kalite Zeova.
5 Nou priye ki Zeova pou beni sa nouvo laranzman konsernan Latour Veyer. Fotespere ki sa magazin, ansanm avek Awake!, i ava ariv kot bokou plis dimoun senser avek sa bon nouvel.—Mat. 10:11.