Eski ou pe servi li plennman?
1 “Mon enpasyan pour servi li dan teritwar!” Se sa ki en ser ti ekrir apre ki i ti’n lir Latour Veyer le 1 Zanvye 2008 (Angle/Franse). Eski ou’n egzamin serten lartik ki aparet souvan dan edisyon piblik? Eski ou’n trouv fason pour byen servi zot dan predikasyon?
2 “What We Learn From Jesus”: (Sa ki nou aprann avek Zezi). Petet ou’n remarke ki sa lartik i itil pour konmans bann letid Labib. Si ou pa ankor fer li, esey lir tit sa lartik avek sa met lakour e apre atir son latansyon lo sa ki Zezi ti dir lo sa size parey i ganny mete dan premye paragraf. Si depi o konmansman sa dimoun i montre lentere, fer ou mye pour kontiny sa konversasyon par servi bann soutit akoz zot soulev bann kestyon ki fer reflesir. Envit sa dimoun pour donn son pwennvi lo sa kestyon. An bref, eksplike ki ou vwar dan nenport portre ki relye avek sa ki ou’n diskite e apre sa al lo lot paragraf. Petet ou pou kapab kouver premye lanmwatye sa lartik lo sa premye vizit e son dezyenm lanmwatye lo en lot vizit. Prepar ou byen pour kontiny sa letid dan liv Ki Labib i dir?
3 “Keys to Family Happiness”: (Lakle pour en fanmir ere). Sa lartik i aparet tou le trwa mwan avek bi pour ed bann msye, madanm ek paran pour vwar ki mannyer zot kapab aplik bann prensip Labib kan i annan problenm ki anpes annan lape dan zot lavi fanmir. Ou menm kapab servi sa lartik pour ed bann ki pa Temwen pour zot vwar sa lasazes ki dan Labib.—2 Tim. 3:16, 17.
4 Lartik pour bann zenn: Sa lartik “For Our Young People” (Pour nou bann zenn) in ganny prepare dan en fason pour donn sa lekter en loportinite pour reflesir e egzamin an detay en resi spesifik dan Labib. Ou kapab servi sa bann lartik pour ed bann zenn ki ou zwenn dan predikasyon pour zot vwar valer pratik ki i annan pour etidye Parol Bondye. (Ps. 119:9, 105) Kan ou pe koz avek bann paran ou kapab fer resorti sa lartik avek tit “Teach Your Children” (Ansenny ou zanfan) ki sorti tou le de mwan. Sa bann lartik i kapab ed bann zanfan pour aprann bann leson enportan lo bann dimoun ki dan Labib. Eski ou’n sezi sa loportinite pour lir sa bann lartik avek ou zanfan?
5 Lezot lartik: Tou le mwan sa lartik “Kestyon sorti kot nou bann lekter” i egzamin en kestyon ki bann ki pa Temwen i kapab demande. Ou kapab koz lo sa lartik kan ou pe prezant magazin portanport. Sa lartik “A Letter From . . .” (En let sorti . . .) i en lartik kot bann misyonner oubyen lezot i rakont defi ki zot rankontre dan zot minister. Sa bann lartik i kapab ed bann ki enterese pour vwar ki sa bon nouvel ki pe ganny anonse dan tou kwen lemonn i form parti bann siny ki endik prezans Kris.—Mat. 24:3, 14.
6 Sa lartik “Draw Close to God” (Apros avek Bondye) ki sorti tou le mwan i baze lo lektir Labib dan Lekol Minister Teokratik. I kapab motiv bann dimoun senser pour anvi aprann plis lo Zeova. “Imitate Their Faith” (Imit zot lafwa) i en lartik ki aparet kat fwa dan en lannen avek bi pour ed bann lekter dan nou letan egzamin an detay bann resi dan Labib pour fer sa bann personnaz vin reel dan zot lespri par egzamin swa ki zot ti fer, defi ki zot ti rankontre e zot lafwa.
7 Pa nou vreman rekonesan ki tou le mwan nou ganny en Latour Veyer antye ki’n ganny byen prepare pour nou servi dan predikasyon! Annou fer bokou zefor pour familyariz nou avek sa ki dan sa magazin e servi li plennman dan nou minister.