En seri lartik ki pou ed nou dan predikasyon

1. Ki bi sa seri ki annan pour tit “En konversasyon avek en vwazen”?

¹ Dan Latour Veyer edisyon piblik, tanzantan nou vwar sa seri ki annan pour tit : “En konversasyon avek en vwazen.” Sa seri i annan de bi, enn se pour prezant lansennyman lo Labib dan en fason atiran e lot pour montre ki mannyer nou kapab reponn serten size avek bon zizman. (1 Pyer 3:15) Ki mannyer nou kapab byen servi sa bann lartik?

2. Ki mannyer nou kapab servi sa seri lartik dan predikasyon?

² Servi zot dan predikasyon: Ou kapab anmas detrwa kopi Latour Veyer ki annan en lartik baze lo sa seri. Kan en met lakour, en dimoun ki enterese oubyen en letid Labib i demann en kestyon oubyen lev en lobzeksyon ki’n deza ganny koz lo la dan enn sa bann lartik, donn li en kopi sa lartik e ofer pour diskit lo la. Si ou napa en kopi sa magazin ki annan sa lartik ladan, petet ou kapab download li lo nou sit jw.org.

3. Ki mannyer nou kapab diskit lo enn sa bann lartik avek en met lakour?

³ Ki mannyer ou kapab diskit enn sa bann lartik avek en dimoun? Serten proklanmater in envit sa dimoun pour lir aotvwa sa bout kot sa vwazen i koze e li i lir sa bout kot sa Temwen i koze. Sa lapros i kapab efikas akoz i ed sa dimoun pour byen egzamin nou krwayans dan en fason kot i pa santi li anbarase avek en ta kestyon.​—Det. 32:2.

4. Ki mannyer nou kapab servi sa bann lartik dan sa seri pour antrenn nou lekor?

⁴ Antrenn ou lekor e form lezot: Anmezir ki ou pe lir sa bann lartik, pran not bann verse Labib, legzanp ek pwen rezonnman. Esey konpran lafason ki bann rezonnman i ganny eksplike. Apre esey fer parey dan predikasyon. (Prov. 1:5; 9:9) En ser ti dir, “Ler ou pe lir sa bann lartik i konmsi ou pe aprann avek en pionye konpetan ki toultan konnen ki sa bon parol pour dir.”

5. Ki mannyer nou kapab ed nou etidyan Labib pour prepar li pour predikasyon?

⁵ Ou osi kapab servi sa bann lartik pour ed ou etidyan Labib prepar li pour predikasyon. Lir sa bann lenformasyon ansanm e les ou etidyan zwe rol sa proklanmater. Dan sa fason, sa etidyan Labib i kapab eksprim son krwayans avek bon zizman. (Kol. 4:6) Sirman, sa bann lartik i enn parmi plizyer fason ki Zeova i ed nou ‘ranpli nou devwar’dan predikasyon.​—2 Tim. 4:5.