En nouvo seri lartik pour ed nou konmans letid Labib
1. Ki sa nouvo lartik ki pou aparet dan edisyon piblik Latour Veyer, e ki son bi?
1 Konmansman lot mwan, en nouvo lartik pour ed nou konmans letid Labib pou aparet dan edisyon piblik Latour Veyer. Son tit i: “Aprann avek Parol Bondye.” San dout, i pou annan serten dimoun dan teritwar ki pou byen kontan lir sak lartik dan sa seri, me sa bann lartik in vreman ganny fer pour diskit lo la avek met lakour.
2. Ki serten laspe ki pou annan dan sa bann lartik?
2 Ki bann laspe ki pou annan dan sa nouvo seri?: Tit ek bann soutit in ganny mete dan form en kestyon pour kapab demann en met lakour ler ou pe koz avek li. Bann verse prensipal i zis ganny mansyonnen me zot pa ganny site pour ki sa met lakour i kapab ganny sa plezir pour aprann direkteman dan Parol Bondye. Bann paragraf i kourt pour ki zot kapab ganny egzaminen devan laport menm. Sak lartik i fer referans avek liv Ki Labib i dir, sa pou ed ou konmans letid dan sa liv kan i apropriye.
3. Ler nou pe pres portanport, ki mannyer nou kapab servi sa bann lartik pour konmans en letid Labib devan laport?
3 Ki mannyer pour servi li: Kan ou pe ofer magazin, ou kapab demann sa met lakour en kestyon zeneral lo topik sa lartik ki kapab evey son lentere. Par egzanp, magazin le 1 Fevriye i diskit lo valer ki Labib i annan. Ou kapab demande: “Eski ou konsider Labib konman Parol Bondye oubyen senpleman konman en bon liv? [Les sa dimoun reponn.] Mon annan en keksoz enteresan pour partaz avek ou lo sa size.” Montre li sa premye kestyon, lir sa premye paragraf e montre li sa premye verse ki’n ganny mansyonnen, dan Labib. Lir sa kestyon ankor enn fwa e demann sa met lakour son lopinyon. Egzamin lakantite lenformasyon ki apropriye pour sa met lakour par servi bann kestyon ki annan nimero o bor konman baz zot diskisyon. Avan kit sa lakour, atir son latansyon lo sa lot kestyon ki swiv e fer en bon laranzman pour retournen pour diskit lo la. Retournen pour egzamin en pti pe plis lo sa lartik sak semenn ziska ki ou kapab anmenn magazin lot mwan. En lot opsyon se ki ou kapab servi en lapros direk par senpleman ofer sa met lakour en letid Labib. Apre servi sa lartik dan sa magazin pour fer en demonstrasyon lo ki mannyer en letid i deroule.
4. Ki mannyer nou kapab servi sa bann lartik kan nou pe fer retourn vizit?
4 Sa nouvo seri lartik i kapab itil pour servi avek bann dimoun ki ou anmenn magazin pour zot tou le mwan e avek lezot retourn vizit. Ou kapab senpleman dir: “I annan en nouvo lartik dan nou Latour Veyer. Mon ti a kontan montre ou ki mannyer pour servi li.” Nou priye ki sa nouvo seri pou ed bokou plis dimoun pour “ganny konnesans laverite.”—1 Tim. 2:4.