“Si Mon Demenaze?”
1 An obeir komann Zezi pour ‘ale e fer tou pep vin bann disip,’ bokou serviter voue Zeova in demenaze pour servi kot i annan en pli gran bezwen. (Mat. 28:19) Zot pe imit Pol, ki ti reponn lapel: “Pas dan Masedwann e vin sekour nou.” (Akt 16:9) Ki mannyer sa i kapab ganny fer dan en fason pratik?
2 Pourswiv Enn Alafwa: Eski i annan teritwar dan ou kongregasyon ki rarman ganny travay? Si wi, ou ti a kapab diriz ou bann zefor ver sa bann rezyon. Avan ki ou bouze pour al en lot landrwa, konsilte bann ansyen pour vwar si ou ekipe pour demenaze. Ou kapab osi demann ou sirveyan rezyonal si i konn en kongregasyon dan rezyon kot ou kapab elarzi ou minister. Lo lot kote, petet apre ki ou’n kalkil depans, ou ti a swete konsider al ede dan en lot pei. Si sa i ou dezir, ou ansanm avek konsey bann ansyen ou kongregasyon devret ekrir biro brans Lasosyete pour enform zot konsernan sa landrwa kot ou enterese pour servi e osi konsernan ou formasyon teokratik. Petet i saz pour vizit sa landrwa avan ki ou deside vreman si ou pou fer en demenazman permanan.
3 Prekosyon Konsernan Imigre: Plizyer nou bann frer pe demenaz dan lezot pei akoz zot pe rod swa en pli bon standar lavi ouswa en soulazman avek persekisyon. Antretan, serten in tonm dan pyez bann endividi dezonnet ki promet pour ed zot etabli dan sa nouvo landrwa me ki zis pran zot larzan e apre abandonn zot. Dan serten ka, sa bann endividi i menm esey fors bann imigran dan kontrent imoral. Kan zot refize, zot ganny abandonnen dan bann kondisyon dezagreab sa pei ki zot in imigre ladan. Alor sitiasyon sa imigran in vin pli pir ki i ti ete dan son pei natal. Zot menm kapab demann bann frer lozman, si non lasistans, ki met en fardo lo lezot fanmiy Kretyen ki pe afront zot prop problenm ek difikilte. Akoz bann demenazman enpridan, bann manm lakour in ganny separe avek kanmarad fizikman, e bann fanmiy in afebli spirityelman.—1 Tim. 6:8-11.
4 Si ou anvi demenaze pour en lavantaz personnel, gard antet ki nenport ki landrwa kot ou reste, i annan problenm pour fer fas avek. I pli fasil pour sirmont problenm kot ou deza konn sa langaz ek kiltir, olye kot ou pe rekonmanse dan en lanvironnman ki ou pa familye avek.