Eski ou kapab “pas dan Masedwann”?
1. Kwa ki ti fer Pol ek son bann konpanyon al Masedwann?
1 Zapot Pol ti kit Antyos ki kapital Siri apepre lannen 49 N.L. pour fer son dezyenm vwayaz misyonner. I ti’n fer plan pour vizit Efez ek lezot lavil dan Lazi Miner. Me dan plas swiv son plan pour al Efez, atraver en vizyon lespri sen ti demann li pour “pas dan Masedwann.” Pol avek son bann konpanyon ti aksepte e zot ti ganny sa privilez pour etablir sa premye kongregasyon dan sa rezyon. (Akt 16:9, 10; 17:1, 2, 4) Ozordi, dan plizyer landrwa dan lemonn, i annan en pli gran bezwen pour plis travayer rekolt. (Mat. 9:37, 38) Eski ou kapab ede?
2. Akoz serten pa pe mazin al dan en lot pei?
2 Petet ou osi ou ti a kontan vin en misyonner parey Pol me ou pa’n deza mazin seryezman pour deplase e al dan en lot pei. Petet ou pa pou kapab resevwar formasyon lekol Gilead pour vin misyonner akoz ou laz oubyen ou en ser selibater oubyen ou annan zanfan ki ankor pe depan lo ou. Petet ou pa’n mazin pour al dan en lot pei akoz ou krwar ki ou pa pou kapab aprann en lot langaz. Oubyen menm ou en imigran dan sa pei ki ou pe viv ladan e pour bann rezon ekonomik ou ezite pour al reste dan en lot pei. Me atraver lapriyer senser, petet ou pou vwar ki sa bann sirkonstans i pa neseserman anpes ou pour al dan en lot pei kot i annan bezwen.
3. Akoz i pa neseser pour ganny formen konman misyonner pour reisi dan sa travay predikasyon dan en lot pei?
3 Eski i neseser pour ganny formen konman en misyonner? Kwa ki ti fer Pol ek son bann konpanyon reisi konman misyonner? Zot ti depan lo Zeova ek son lespri sen. (2 Kor. 3:1-5) Alor, si ou sirkonstans pa permet ou pour al lekol misyonner, ou touzour kapab reisi dan sa travay predikasyon dan en lot pei. Osi, pa oubliye ki ou pe ganny formen atraver Lekol Minister Teokratik ek Renyon Servis. Si ou annan sa lobzektif pour asiste Lekol Gilead oubyen lezot lekol e deside pour al dan en lot pei pour goute konman servis misyonner i ete, sa pou kapab ed ou pour servi sa leksperyans pli tar si ou ganny aksepte pour atenn enn sa bann formasyon.
4. Akoz bann ki aze pa devret rezet sa lide pour fer travay predikasyon dan en lot pei?
4 Bann aze: Bann ki pli matir spirityelman ki annan en lasante ki ase bon i kapab ede dan bann pei kot i annan bezwen. Eski ou’n pran retret? Menm bann ki ganny en pti pansyon i kapab annan en lavi ase konfortab dan en pei ki pe devlope kot bann depans, enkli depans pour bann bon swen medikal, pa sitan ser parey dan sa pei kot zot sorti.
5. Rakont leksperyans en frer ki ti’n pran retret, ki ti al dan en lot pei.
5 En ansyen ki ti pionye sorti dan en pei ki koz Angle e ki ti’n pran retret ti al dan en landrwa touristik dan Sid Les Lazi pour li ed sa nef proklanmater ki ti dan en group ki koz Angle. Sa group ti pres avek sa 30,000 etranze ki ti viv dan sa teritwar. Zis dan de-z-an, 50 parmi sa bann etranze ti pe vin lasal. Sa frer ti ekrir: “Par vin isi, mon’n ganny bann benediksyon ekstraordiner ki mon pa’n zanmen deza gannyen oparavan. Letan pa ase pour rakont menm en ptigin sa bann benediksyon!”
6. Rakont leksperyans en ser selibater ki ti al travay dan en pei kot ti annan en pli gran bezwen.
6 Bann ser selibater: Zeova in servi bann ser dan en gran fason pour propaz bon nouvel dan bann pei kot i annan en pli gran bezwen. (Ps. 68:11) En zenn ser selibater ti anvi fer plis dan travay predikasyon dan en pei etranze, me son paran ti enkyet pour son sekirite. Alor i ti swazir en pei ki ti politikman ek ekonomikman stab. I ti ekrir biro brans sa pei e zot ti donn li bann lenformasyon spesifik ki pour ed li. Pandan sa si-z-an ki i ti viv dan sa pei i ti ganny bokou benediksyon. I dir: “Dan mon pei mon ti pou’n annan mwens loportinite pour ganny bann letid Labib. Me par servi kot i ti annan plis bezwen, mon’n kapab etidye Labib avek bokou dimoun e vreman devlop mon abilite pour ansennyen.”
7. Rakont leksperyans en fanmir ki ti al dan en pei etranze.
7 Bann fanmir: Si ou annan bann zanfan, eski sa pou anpes ou vwayaz dan en pei etranze pour propaz sa bon nouvel? En koup ki annan de zanfan aze wit ek di-z-an, ti deside pour esey fer sa. Sa manman i ekrir: “Nou vreman rekonesan ki nou’n kapab elve nou bann zanfan isi akoz zot ti parmi bann pionye spesyal ek misyonner. Nou annan en lavi pli satisfezan akoz nou pe servi la kot i annan en pli gran bezwen.”
8. Eski i posib pour servi dan en pei etranze san ki ou aprann en lot langaz? Eksplike.
8 Problenm langaz: Ler ou mazin pour aprann en lot langaz, eski sa i anpes ou pour al dan en lot pei? Petet dimoun i koz ou langaz dan serten sa bann pei kot i annan en pli gran bezwen pour bann proklanmater Rwayonm. En koup ki ti koz Angle ti al dan en pei ki koz Espanyol kot i ti annan bokou imigran ki ti koz Angle. Apre ki zot ti’n ganny lenformasyon avek biro brans konsernan serten kongregasyon dan sa pei ki koz Angle ki ti annan en bezwen, zot ti swazir enn parmi e zot ti vizit sa kongregasyon de fwa. Zot ti retourn se zot e zot ti koup zot bann depans e anmas sa larzan pour enn an. Kan zot ti’n pare pour al reste dan sa pei, bann frer ti ed zot trouv en lakaz ki pa ti tro ser.
9, 10. Ki bann ki kit zot pei pour al reste dan en lot i devret reflesir lo la e akoz?
9 Bann ki’n al reste dan en lot pei: Eski petet ou’n al reste dan en lot pei avan ki ou ti aprann laverite? I kapab ki i annan en bezwen pour bann travayer rekolt dan ou pei natal. Eski ou kapab mazin retournen pour donn en koudmen? Probableman, i pou pli fasil pour ou ganny en travay ek landrwa reste ki en lot dimoun ki sorti dan en lot pei. I tre probab ki ou ankor kapab koz sa langaz. An plis ki sa, bann dimoun pou pli pare pour ekout mesaz Rwayonm avek ou ki avek en dimoun ki zot konsider konman en etranze.
10 En zonm ki ti sorti Lalbani e ki ti al viv Itali konman en refizye ti ganny en bon travay e i ti kapab anvoy larzan pour son fanmir Lalbani. Apre ki i ti vin dan laverite, i ti konmans ansenny Lalbanyen avek en group Italyen ki ti pionye spesyal e ki ti pe al reste Lalbani akoz laba ti annan en pli gran bezwen. Sa frer i ekrir: “Zot ti pe al dan en teritwar ki mon’n kit deryer. Zot pa ti koz sa langaz, me zot ti kontan pour al laba. Mon langaz ek kiltir ti Lalbanyen. Ki mon pe fer Itali?” Sa frer ti deside pour retourn Lalbani pour propaz sa bon nouvel. I dir: “Eski mon regrete ki mon’n kit sa travay ek larzan ki mon ti pe gannyen Itali? Pa ni menm pour en segonn! Mon ti trouv sa vre travay Lalbani. Pour mwan, sa travay ki pli neseser e ki donn plis lazwa se servi Zeova avek tou sa ki ou annan!”
11, 12. Ki bann ki pe mazin al reste dan en lot pei i devret fer?
11 Fason pour fer li: Pol ek son bann konpanyon ti anvi vwayaz was avan ki zot ti al Masedwann me “Sent-Espri ti anpes zot” e alor zot ti al dan direksyon nor. (Akt 16:16) Kan zot ti pros avek Bitini, Zezi ti anpes zot kontinyen. (Akt 16:7) Atraver Zezi, Zeova pe kontinyen sirvey sa travay predikasyon. (Mat. 28:20) Alor, si ou pe konsider deplase pour al dan en pei etranze, rod gidans Zeova atraver lapriyer.—Lik 14:28-30; Zak 1:5; vwar bwat: “Fason pour konnen si i annan en bezwen dan sa pei kot ou anvi ale.”
12 Demann bann konsey fran avek bann ansyen ouswa frer ek ser matir. (Prov. 11:14; 15:22) Lir bann lartik ki’n ganny pibliye konsernan servi dan en pei etranze e fer resers lo sa pei kot ou anvi al reste. Eski ou kapab fer en pti vizit dan sa pei, petet zis pour detrwa zour? Si ou pe seryezman mazin pour al reste dan en lot pei ou kapab ekrir biro brans sa pei pour plis lenformasyon par servi ladres ki dan en Yearbook ki pli resan. Par kont, dan plas anvoy ou let direkteman kot biro brans, donn li avek bann ansyen pour ki zot a kapab azout zot komanter.—Vwar liv Organized to Do Jehovah’s Will, paz 111-112.
13. Ki mannyer biro brans i kapab ed ou, me ki responsabilite ou annan?
13 Biro brans pou anvoy ou bann lenformasyon enportan lo sa pei ki pou kapab ed ou fer bann desizyon, me biro brans pa pou kapab ed ou avek nenport ki keksoz ki annan pour fer avek lalwa imigrasyon sa pei, ni menm avek permi reste, landrwa reste, viza oubyen let sorti kot sa dimoun ki pou responsab ou. I ou responsabilite pour fer sa bann demars avan ki ou kit ou pei. Ou pou osi bezwen kontakte lanbasad oubyen konsila ou menm pour ganny lenformasyon konsernan viza ek permi travay. Bann ki pe deplase i devret kapab pran swen avek zot bezwen personnel ek bann zafer legal.—Gal. 6:5.
14. Ki bann prekosyon neseser nou kapab pran kan nou pe al vizit oubyen reste dan en pei kot travay predikasyon i anba restriksyon?
14 Bann pei kot sa travay predikasyon i anba restriksyon: Dan serten pei bann frer ek ser i bezwen pridan konsernan zot ladorasyon. (Mat. 10:16) San ki zot realize, bann proklanmater ki vizit oubyen al reste dan sa bann pei i kapab atir latansyon ki pa neseser lo nou travay e met nou bann frer ek ser lokal an danze. Si ou pe mazin al reste dan sa bann pei, silvouple ekrir ou biro brans atraver konsey ansyen avan ki ou fer bann prosedir.
15. Ki mannyer bann ki zot sirkonstans pa permet zot pour al reste dan en lot pei i kapab fer plis dan zot minister lokalman?
15 Si ou pa kapab ale: Si ou pa kapab al reste dan en lot pei, pa bezwen dekouraze. Petet i annan en lot gran laport ki ouver pour ou fer en gran travay. (1 Kor. 16:8, 9) Ou sirveyan rezyonal i kapab konn bann landrwa dan ou prop pei kot i osi annan en gran bezwen. Petet ou ti pou kapab ed en kongregasyon oubyen group ki koz en lot langaz ki pros avek kot ou reste. Oubyen, ou menm kapab fer plis dan ou minister par reste dan ou prop kongregasyon. Dan nenport ki sirkonstans, sa ki pli enportan se ador Bondye avek tou ou leker.—Kol. 3:23.
16. Ki mannyer nou devret azir anver bann ki anvi al reste dan en pei etranze?
16 Eski ou konn en Kretyen ki matir spirityelman ki annan sa lobzektif pour servi dan en lot pei? Akoz ou pa donn li ou sipor ek lankourazman? Kan Pol ti kit Antyos, kapital Siri, Antyos ti sa trwazyenm pli gran lavil dan Lanpir Romen (apre Ronm ek Alekzandri). Avek en sitan gran teritwar, i tre probab ki kongregasyon Antyos ti bezwen led Pol e zot ti pou mank li en kantite si i ti ale. Selman, Labib pa dir ki bann frer dan sa kongregasyon ti dekouraz li pour ale. I paret ki dan plas vwar keksoz dan en fason negatif, zot ti rapel ki “lemonn” ti zot teritwar.—Mat. 13:38.
17. Ki rezon nou annan pour mazin “pas dan Masedwann”?
17 Pol ek son bann konpanyon ti ganny bokou benediksyon akoz zot ti aksepte sa lenvitasyon pour pas dan Masedwann. Kan zot ti dan lavil Filip an Masedwann, zot ti rankontre Lidi e “Senyer ti ouver son lespri pour li ekout byen tou sa ki Pol ti pe dir.” (Akt 16:14) Imazin sa lazwa ki Pol ek son bann konpanyon misyonner ti gannyen kan Lidi ek tou sa ki ti reste kot li ti batize! Dan bokou pei, i annan bann dimoun ki annan en leker senser parey Lidi me ki pa ankor resevwar mesaz Rwayonm. Si ou “pas dan Masedwann” ou pou ganny bokou lazwa akoz ou pou kapab trouv sa bann dimoun e ofer zot ou led.
[Bwat lo paz 5]
Fason pour konnen si i annan en bezwen dan sa pei kot ou anvi ale
• Vwar sa Yearbook ki pli resan. Port latansyon lo proporsyon popilasyon pour sak proklanmater.
• Servi Index pour fer resers lo bann lartik ek leksperyans sorti dan sa pei.
• Koz avek bann proklanmater ki’n vizit oubyen reste dan sa pei.
• Si ou pe mazin al reste dan en pei ki koz ou langaz, konsilte bann sours lenformasyon tel parey Internet pour vwar ki kantite dimoun ki koz ou langaz.