Kwen Kestyon

◼ Eski bann proklanmater i devret servi Enternet ziska en degre ki zot rann temwannyaz oubyen etidye avek bann dimoun ki zot pa konnen ki pe reste dan en lot pei?

Serten proklanmater in servi Enternet pour ganny bann letid Labib dan bann landrwa kot nou travay i restrikte ouswa kot napa bokou proklanmater. Dan serten ka, i vre ki nou’n ganny bann bon rezilta. Par kont, i kapab danzere pour bann proklanmater fer lesanz imel e partisip dan bann diskisyon avek dimoun ki zot pa konnen dan chat room. (Vwar Nou Minister Rwayonm Zilyet 2007 p. 3.) Menm si lentansyon se pour zwenn bann ki annan leker senser avek sa mesaz Rwayonm, sa bann diskisyon i kapab anmenn en frer oubyen en ser pour antre an kontak avek bann move frekantasyon enkli bann aposta. (1 Kor. 1:19-25; Kol. 2:8) Deplis, dan bann landrwa kot sa travay Rwayonm i ganny restrikte oubyen bàn, i kapab ki lotorite pe sirvey nou bann konversasyon e sa i kapab met an danze nou bann frer ek ser. Alor, bann proklanmater pa devret servi Enternet pour al rod dimoun dan lezot pei pour partaz sa bon nouvel.

Par kont si nou koz avek en etranze pandan son vakans, pa esey kontinyen devlop lentere sa dimoun apre ki’n rantre se li, amwen ki biro brans i donn nou permisyon pour fer li. O kontrer, nou kapab montre li ki mannyer i kapab servi sa sit jw.org pour trouv plis lenformasyon oubyen ki mannyer i kapab kontakte biro brans Temwen Zeova pour son pei. Nou kapab ankouraz li pou vizit en Lasal Rwayonm pre kot i reste. I vre ki dan serten pei napa Lasal Rwayonm. Si i ti a kontan ganny vizite par en Temwen Zeova ki reste dan son zanmirant, nou devret ranpli en form Please Follow Up (S-43) e donn avek sekreter, ki pou anvoy sa bann lenformasyon par servi jw.org. Sa biro brans ki pe okip travay predikasyon dan sa pei kot sa dimoun ki’n demontre lentere i reste, i familye avek sirkonstans sa landrwa e zot pou dan sa pli bon pozisyon pour donn led spirityel.​—Vwar Nou Minister Rwayonm Zen 2014 p. 7 ek Nou Minister Rwayonm Novanm 2011 p. 2.

Si en dimoun ki nou pe deza vizite i al reste dan en lot pei oubyen si nou pe deza etidye avek en dimoun dan en lot pei ki nou ganny kontak avek zis atraver Enternet, nou devret swiv sa bann lenstriksyon dan paragraf presedan. Toudmenm nou kapab kontinyen devlop son lentere ziska ler i ganny kontak avek bann proklanmater dan son zanmirant. Selman, si i reste dan en pei kot nou travay i restrikte oubyen bàn, nou devret vreman fer atansyon kan nou pe diskit lo bann topik baze lo Labib ki swa par let, lo telefonn oubyen par bann lezot mwayen kominikasyon elektronik.​—Mat. 10:16.