Kwen kestyon

◼ Lekel ki sipoze ranpli bann koupon oubyen fer bann demann atraver Internet?

Souvan i annan bann koupon dan nou bann piblikasyon ki dimoun i kapab ranpli e poste kot biro brans pour zot ganny bann piblikasyon ouswa pour en Temwen Zeova vizit zot. Dimoun i osi kapab al lo nou sit Web www.watchtower.org pour demann en letid Labib. Sa bann diferan provizyon pe ed plizyer dimoun pour aprann laverite. Par kont, bann proklanmater in servi sa bann provizyon pour fer laranzman pour zot fanmir oubyen lezot dimoun ganny bann piblikasyon ouswa vizite par Temwen Zeova e sa in koz serten problenm.

I annan dimoun ki’n konplent avek biro brans akoz zot in ganny bann piblikasyon ki zot pa ti’n rekomande. Zot krwar ki nou lorganizasyon pe sifok zot e ki zot non i lo en lalis dimoun ki ganny bann piblikasyon tou le mwan otomatikman. Bann proklanmater ki’n ganny demande pour vizit bann dimoun ki pa ti’n demande pour zot ganny vizite in santi zot anbarase kan sa bann dimoun ti eksprim zot mekontantman. Alor, bann demann ki ganny fer atraver nou sit Web oubyen bann koupon i devret ganny fer par sa dimoun li menm me pa par sa proklanmater. Si biro brans i remarke ki en demann in ganny fer par en proklanmater, zot pa pou konsider sa demann.

Be ki mannyer nou kapab ed en fanmir oubyen en dimoun ki nou konnen spirityelman? Si ou ti a kontan ki i ganny nou piblikasyon, akoz ou pa anvoy sa piblikasyon direkteman kot li konman en kado? Si sa dimoun i demontre lentere e i ti a kontan ki en Temwen i vizit li me ou pa konnen ki mannyer ou pou kontakte bann ansyen dan kongregasyon kot i reste, ou pou bezwen ranpli en form Please Follow Up (S-43) e donn avek sekreter dan ou kongregasyon ki li an retour pou anvoy kot biro brans. Par kont, si sa dimoun i dan kaso, prizon, lopital oubyen en lenstitisyon parey Mont Royale, ou pa devret kontakte biro brans dan son plas. O kontrer, ou devret ankouraz li pour kontakte sa bann frer ki vizit sa bann landrwa oubyen ekrir biro brans personnelman.