Pran aksyon deswit

Depi ki nou sit Enternet in ganny lanse, bann demann pour letid Labib in ogmante dan en fason enpresyonan. Nou bann nouvo fason donn temwannyaz an piblik in fer ki plis dimoun in fer demann pour etidye Labib. Biro brans i fer sa bann prosedir o pli vit posib. Par egzanp, si en demann in ganny fer lo jw.org, bann ansyen ki dan rezyon kot sa dimoun ki’n montre lentere i ete i souvan resevwar lenformasyon avek biro brans zis de zour pli tar. Par kont, serten rapor in montre ki serten dimoun ki’n demann en letid Labib pa’n ganny kontakte avan detrwa semenn oubyen plis. Ki mannyer nou kapab fer sir ki led i ganny donnen avan sa bann dimoun i perdi lentere?​—Mark 4:14, 15.

Si en dimoun ki pa reste dan ou teritwar i demontre lentere, deswit ranpli sa form Please Follow Up (S-43) e donn avek sekreter pa pli tar ki dan ou prosen renyon. Dan zis enn oubyen de zour apre, sekreter i devret pas sa lenformasyon avek sa kongregasyon ouswa anvoy li kot biro brans par servi Congregation tab lo jw.org. Bann ansyen i devret tanzantan al tyek lo nou sit Enternet. Si zot ganny lenformasyon pour vizit en dimoun, zot devret fer laranzman deswit. Nenport ki proklanmater ki ganny demande pour al vwar sa dimoun i devret konsider sa konman en priyorite. Si sa dimoun pa kot lakaz, ou kapab kit en not kot li avek ou nimero kontak.