Kwen Kestyon
◼ Konman ki en dimoun ki’n inaktif pour lontan i kapab ganny led pour kalifye ankor konman en proklanmater sa bon nouvel?
Kan en dimoun inaktif i demontre ki i annan en dezir senser pour servi Zeova, sa i en rezon pour rezwir. (Lik 15:4-6) Probableman, sa endividi in permet lopozisyon oubyen presyon lavi anpes li fer son letid personnel, asiste renyon, e partisip dan predikasyon. Konman ki lasistans personnel i kapab ganny donnen dan en pli bon fason, afen ki i pou kapab progrese spirityelman?
Nou tou nou devret pran linisyativ pour reasir li nou veritab lanmour Kretyen. Bann ansyen pou vitman evalye son bezwen spirityel. (Zak 5:14, 15) Si sa proklanmater pa’n prese pour en kourt peryod letan, lasistans en proklanmater eksperyanse i kapab sifi pour revin aktif dan predikasyon. Toutfwa, si i pa’n asosye avek kongregasyon pour en bon pe letan, probableman i pou bezwen plis led. En letid Labib personnel dan en piblikasyon apropriye i kapab en bon mwayen pour batir son lafwa ek lapresyasyon. Dan sa ka, sirveyan servis pou aranze pour en proklanmater kalifye kondwir sa letid. (Ebr. 5:12-14; vwar Kwen Kestyon dan Nou Minister Rwayonm Novanm 1998.) Si ou konn en dimoun ki bezwen en tel led, koz avek sirveyan servis dan ou kongregasyon.
Avan envit en dimoun ki’n inaktif pour en bon pe letan pour partisip ankor dan minister, i apropriye pour de ansyen zwenn avek li pour vwar si i kalifye konman en proklanmater Rwayonm. Zot pou swiv menm prosedir ki ganny servi dan sa renyon avek bann nouvo ki’n demann pour vin en proklanmater sa bon nouvel. (Vwar La Tour de Garde le 15 Novanm, 1988, paz 17.) Sa enn inaktif i bezwen annan en dezir senser pour partaz sa bon nouvel avek lezot. I osi bezwen ranpli bann kondisyon debaz ki ganny detaye lo paz 98-9 dan liv Notre Ministère e i bezwen asiste regilyerman bann renyon kongregasyon.
En bon progranm spirityel pou fer bokou pour ed sa endividi bokou pour fortifye e mentenir son relasyon presye avek Zeova e pour kontinyen mars lo semen lavi eternel. (Mat. 7:14; Ebr. 10:23-25) An fezan ‘tou zefor’ serye e devlop bann kalite Kretyen ki dirab, sa pou ed li pour kontinyen reste “aktif e prodiktif” konman en disip Kretyen.—2 Pyr. 1:5-8.