Pa oubliy bann ki inaktif
1. Akoz nou devret ankouraz bann ki’n vin inaktif?
1 Eski ou konn okenn dimoun ki’n vin inaktif? Petet i’n aret asosye e i’n elwannyen avek kongregasyon. I kapab ki ou’n zwenn en tel dimoun dan predikasyon port-an-port. Nou devret gard antet ki sa dimoun i ankor nou frer spirityel. Nou anvi asir sa dimoun ki nou ankor kontan li e anvi ed li pour retourn dan kongregasyon e kot ‘sa berze, ki gardyen nou lam.’—1 Pyer 2:25.
2. Ki mannyer nou kapab donn lankourazman en dimoun ki inaktif?
2 Demontre Lentere: En kou-d-telefonn oubyen en vizit i kapab asir en dimoun ki’n vin inaktif ki nou pa’n bliy li. Ki nou kapab dir li? Nou kapab ankouraz en dimoun par senpleman les li konnen ki nou ti pe mazin li. Gard sa konversasyon pozitif e dan en fason ki pou batir li. (Fili. 4:8) Nou kapab mansyonn en pwen ki nou ti apresye resaman dan en renyon. Nou kapab osi envit li pour en prosen renyon oubyen lasanble e ofer pour anmas en plas pour li oubyen vin zwenn li.
3. Ki mannyer en ser ti revin aktif?
3 En ser ki ti’n vin inaktif pour plis ki 20 an ti ganny trouve dan teritwar. Menm si i pa ti anvi en letid Labib, sa ser ki trouv li ti kontinyen vizit li e kit bann nouvo magazin. Apre lasanble distrik, sa proklanmater ti diskit serten pwen enportan avek sa ser inaktif, e avek letan i ti revin aktif.
4. Ki mannyer nou devret tret en dimoun ki rekonmans asiste bann renyon?
4 Ler en Dimoun i retournen: Ler en frer inaktif i rekonmans vin renyon, ki mannyer nou devret tret li? Ki mannyer Zezi ti tret son bann disip apre ki zot ti’n abandonn li pour en pe letan? I ti senserman apel zot son bann “frer” e i ti montre ki i ti annan konfyans dan zot. I ti menm donn zot en travay spesyal. (Mat. 28:10, 18, 19) Zis en pe letan apre, zot ti pe pres sa bon nouvel “san arete.”—Akt 5:42, NW.
5. Mansyonn sitiasyon kot nou devret koz avek bann ansyen lo en dimoun ki inaktif.
5 Avan nou ofer en dimoun ki ti’n vin inaktif pour etidye Labib oubyen avan nou envit en frer ki ti inaktif pour en bon pe letan pour akonpanny nou dan predikasyon, nou devret rod konsey avek bann ansyen. Si nou zwenn en proklanmater ki’n vin inaktif dan teritwar, nou devret enform bann ansyen pour zot kapab ofer en lasistans neseser.
6. Ki lazwa nou kapab eksperyanse par ed bann ki’n vin inaktif?
6 Parey Labib i klerman montre, zis bann ki fini zot lakours ki pou ganny sove. (Mat. 24:13) Alors, annou pran an konsiderasyon bann ki’n tonbe e ki’n elwannyen. Si avek pasyans nou reflekte lanmour Zeova par demontre lentere senser dan sa bann dimoun, nou pou eksperyans lazwa pour vwar zot repran zot servis sakre obor nou.—Lik 15:4-10.