Glorifye Zeova par Bann Bon Aksyon
1 Ler ou’n pri dan en move tanpet, pa i en soulazman pour kapab trouv en landrwa kasyet! Si dan sa landrwa i annan lasaler ek sekirite e si son met lakour i demontre lospitalite, ou pou kontan pour reste la. Travay predikasyon Rwayonm i diriz dimoun anver en tel labri kont sistenm Satan. Eski nou konportman toulezour i kapab ed lezot vwar ki degre atiran sa landrwa proteksyon i ete? Wi, akoz Zezi ti dir ki dimoun pou ‘war byen nou bann bonn aksyon e glorifye nou Papa ki dan lesyel.’—Mat. 5:16.
2 Konman ki nou kapab konport nou afen ki nou bann aksyon pou atrakte lezot anver Zeova ek son lorganizasyon? Par les bann parol Zezi ki ganny rikorde dan Lik 6:31 ek 10:27 fasonn nou lavi sak zour. Sa pou motiv nou pour demontre en lentere senser pour nou prosen, ki pou fer nou diferan avek sa monn ki napa santiman ek lafeksyon.
3 En ser ki ti pe vwayaze lo en bato ti obzerv en zenn madanm ki ti pe ganny mal-de-mer e i pa ti kapab pran swen avek son zanfan. Sa ser ti ofer pour okip sa zanfan. Ler sa madanm ti demande konman ki i kapab montre son rekonesans, sa ser ti dir: ‘Silvouple ekout bann Temwen Zeova ler zot vizit ou la prosenn fwa.’ Sa madanm ti fer sa, e ozordi li ek son mari in vin Temwen. Bann bon aksyon in fer ladiferans lo fason ki zot in reazir anver mesaz Rwayonm.
4 Nou Lavi Antye i Enplike: Nou kondwit dan kominote, dan travay oubyen dan lekol e pandan bann letan rekreasyon, i donn lezot lokazyon pour form en lopinyon lo nou ek nou larelizyon. An konsekans, i bon ki nou demann nou lekor: ‘Konman ki bann obzervater i vwar mwan ek mon fanmiy? Eski bann vwazen i vwar nou lakaz ek lakour prop e byen mentenir? Eski nou kanmarad travay ek kanmarad lekol i vwar nou konman bann dimoun ki aler e travay dir? Eski lezot i konsider nou laparans modes e respektab?’ Nou bann bon aksyon i kapab fer ladorasyon Zeova pli atiran pour lezot.
5 Pyer ti averti bann Kretyen ki lezot ti pou kritik nou. (1 Pyer 4:4) Nou devret fer sir ki nou kondwit i pa lakoz bann remark negatif. (1 Pyer 2:12) Si nou aksyon toulezour i glorifye sa Bondye ki nou pe adore, alor nou pou parey bann lalanp ki’n ganny mete anler, ki pe atir lezot ver sa landrwa proteksyon ki Zeova i fourni.—Mat. 5:14-16.