Partisip plennman dan Rekolt
1 Bann profet Zeova dan letan pase e menm Zezi Kri ti koz lo en travay rasanbleman. (Iza. 56:8; Ezek. 34:11; Zan 10:16) Sa travay pe aprezan ganny akonpli anmezir ki bon nouvel Rwayonm pe ganny prese dan lemonn antye. (Mat. 24:14) Distenksyon ant sa bann ki servi Bondye ek sa bann ki pa servi li pe vin tre evidan. (Mal. 3:18) Ki sa i vedir pour nou?
2 En Responsabilite personnel: Nou kapab pran legzanp Pol, ki ti tre konsernen pour fer minister Kretyen al an avan. I ti santi ki i en lobligasyon pour li prese afen ki tou dimoun i kapab ganny loportinite pour antann sa bon nouvel e ganny sove. Sa ti pous li pour travay sanses pour zot lentere. (Rom. 1:14-17) Avek bann sitiasyon danzere ki pe afekte limanite ozordi, eski pa nou annan en pli gran responsabilite pour pres avek lezot dan nou teritwar?—1 Kor. 9:16.
3 Letan pour azir vit: Travay predikasyon i kapab ganny konpare avek en loperasyon sekour ki pe rod dimoun ki’n perdi. Bann dimoun i bezwen ganny retrouve e ede pour sove avan i tro tar. Letan i limite. Lavi i an risk! Se pour sa rezon ki Zezi ti demann son bann disip pour “sipliy Met rekolt pour anvoy zouvriye.”—Mat. 9:38.
4 Par rekonnet sa leta irzan ki egziste ozordi, plizyer bann travayer Rwayonm in ogmant zot par dan sa aktivite pour sov lavi. En garson adolesan ki ti apel Hirohisa ti viv avek son manman ek kat son bann frer ek ser. Pour li nobou siport son fanmiy, i ti bezwen lev trwa zer bomaten pour delivre bann zournal. Kantmenm sa, Hirohisa ti oule fer plis dan minister, e i ti konmans fer pionye ordiner. Eski i annan fason ki ou kapab partisip pli plennman dan sa travay ki pa pour zanmen ganny repete?
5 “Letan ki reste in redwir.” (1 Kor. 7:29, NW ) Alor, annou fer tou sa ki nou kapab dan sa travay pli enportan ki pe ganny fer konmela lo later—pres bon nouvel Rwayonm e fer disip. Zezi ti konpar sa minister konman en travay rekolt. (Mat. 9:35-38) An partisipan plennman dan rekolt, bann fri nou travay i kapab enkli ed en dimoun pour form parti sa gran lafoul adorater ki ganny dekrir dan Revelasyon 7:9, 10.