“Parol Bondye . . . i annan Pisans”
1 “Parol Bondye i vivan e i annan pisans,” zapot Pol ti ekri. (Ebr. 4:12) Ki i ti oule dir par sa? Parol Bondye, ki ganny trouve dan Labib i kapab annan en gran lenfliyans lo dimoun. Lasazes ki Labib i kontyen i annan sa pwisans pour sanz lavi en dimoun pour le meyer. Rekonfor ek lesperans ki i ofer i anmenn bann imen ver Zeova Bondye, sa Enn ki Donn Lavi. Son mesaz i kapab met bann ki annan leker senser lo sa semen ki anmenn ver lavi eternel. Sepandan, pour vwar son lefe, nou bezwen servi Labib letan nou temwanny avek lezot.
2 Lir en Verse Labib dan tou Lokazyon: I paret ki bokou proklanmater in perdi labitid servi Labib devan laport. Eski sa i leka pour ou? Vi ki bokou dimoun i paret napa letan pour en gran konversasyon, i kapab ki ou’n aprezan tonm dan sa routin pour selman ofer piblikasyon oubyen zis sit en verse Labib. Nou ankouraz tou bann proklanmater pour fer en zefor senser pour lir omwen en verse Labib letan zot pe prezant sa bon nouvel, afen ki sa i ava kapab fer sa dimoun vwar ki nou mesaz i sorti direkteman dan Parol Bondye.
3 Kantmenm pa bokou dimoun ki annan labitid lir Labib, i zeneralman ganny respekte. Menm bann dimoun ki okipe i parfwa rezerv enn ou de minit pour ekout mesaz ki pe ganny lir dan Parol Bondye. Letan en verse Labib apropriye i ganny lir avek santiman e briyevman eksplike, pwisans Parol Zeova i kapab fer en bon lefe lo sa enn ki pe ekoute. Me konman ou kapab fer en tranzisyon ant ou lentrodiksyon pour nobou lir en verse dan Labib?
4 Esey sa Legzanp dan Aktivite Magazin: En sirveyan rezyonal i servi byen Labib letan i pe partisip dan aktivite magazin. I anmenn en pti Labib dan son pos. Apre ki i’n prezant magazin e briyevman tret en lartik, i ouver son Labib san ezitasyon e lir en verse ki relye avek sa lartik. Petet i fer sa par senpleman demande, “Ki ou panse lo sa promes ankourazan?” e apre i kontinyen lir en verse ki i’n swazir.
5 Fer li ou lobzektif pour lir enn ou de verse dan Labib avek sak dimoun ki ou rankontre. Pwisans ki Labib i annan i kapab ouver semen pour plis dimoun ganny atire anver Bondye.—Zan 6:44.