Servi byen Labib
1. Ki ou kapab fer ler ou pe prepar pour predikasyon?
1 Nenport ki piblikasyon nou deside ofer dan predikasyon, i byen pour swazir en verse Labib ki fer reflesir pour partaz avek bann ki pou ekoute. (Ebr. 4:12) Par swazir en verse Labib ki dan sa piblikasyon ki ou pe ofer, pou ed ou diriz diskisyon lo sa piblikasyon. Bann proklanmater dan serten landrwa in vwar li itil pour anmenn zot Labib dan lanmen ler zot pe apros en dimoun oubyen ler zot pe pres port-an-port.
2. (a) Ki mannyer nou kapab konmans nou prezantasyon avek en verse Labib? (b) Ki size baze lo Labib ki enteres dimoun dan teritwar?
2 Konmans avek en Verse Labib: Serten proklanmater i konmans zot prezantasyon par demann sa met lakour en senp kestyon pwennvi lo en teks Labib ki apre zot lir. Sa i vitman diriz latansyon lo Parol Bondye. Eski serten sa bann lentrodiksyon i kapab efikas dan ou teritwar?
◼ “Si ou ti annan pouvwar pour fer li, eski ou ti pou fer sa bann sanzman swivan?” Lir Revelasyon 21:4.
◼ “Akoz nou pe viv dan letan difisil koumsa?” Lir 2 Timote 3:1-5.
◼ “Eski ou krwar nou kominote ti pou en landrwa pli meyer si tou dimoun ti swiv sa konsey?” Lir Matye 7:12.
◼ “Eski ou krwar ou zanfan pou kapab rezwir sa bann kondisyon ki’n ganny dekrir la?” Lir Psonm 37:10, 11.
◼ “Eski ou krwar en zour sa parol pou vin vre?” Lir Izai 33:24.
◼ “Eski ou familye avek sa sanzman gouvernman ki ganny mansyonnen la?” Lir Danyel 2:44.
◼ “Eski ou’n deza anvi demann Bondye sa kestyon?” Lir Zob 21:7.
◼ “Eski i posib pour vwar ankor bann dimoun ki nou ti kontan ki’n mor?” Lir Zan 5:28, 29.
◼ “Eski bann dimoun mor i konnen ki bann vivan pe fer?” Lir Eklezyast 9:5.
3. Ki mannyer nou kapab ed dimoun pour konpran bann verse Labib ki nou lir?
3 Eksplike, servi Legzanp, fer Laplikasyon: Ler en dimoun i pare pour fer en konversasyon avek ou, pa tay avek sa diskisyon. Pran letan pour eksplike, servi legzanp e fer laplikasyon sa verse Labib ki ou’n lir pour ki sa dimoun i konpran li. (Nee. 8:8) Ler dimoun i konpran e aksepte sa ki Parol Bondye i ansennyen, i kapab fer bann sanzman merveye dan zot lavi.—1 Tesa. 2:13.
4. Ki mannyer nou kapab byen servi Labib lo bann retourn vizit?
4 Kontinyen servi byen Labib ler ou devlop lentere dimoun. Ou kapab servi sa menm metod ler ou pe fer bann retourn vizit: (1) Swazir en verse Labib apropriye. (2) Demann en senp kestyon pwennvi konsernan sa verse. Apre lir li. (3) Eksplike, servi legzanp, e fer laplikasyon. Esey ogmant konnesans sa dimoun lo Parol Bondye sak fwa ou vizit li. Petet pa pou pran ou bokou letan pour konmans kondwir en letid Labib!